II Atannit 18 - Labrador Inuttitut Heritage Bible

Hiskia atannek Judakunut. Jerusalemib illumajauninga Sanheribemut.

¹ Hoseab Elab erningata Israelitit atanningata Jâringita pingajuane, Hiskia Ahasib Judakut atanningata erninga atanningorpok;

² Jârekalaukporlo 25 ginik atanningorame atanniotilunelo Jârit 29 it nâlugit Jerusaleme. Anânanga attekalaukpok Abimik, Sacharjab pannia.

³ Pinniarporlo Nâlekab namagijanganik, atâtagijangatut Davidetut.

⁴ Pôktojut attorungnaitipait, nappajullo serᴋomipait, nappartullo pêjarpait, kuglugiangojartorlo kannujangôjok, Mosesib sennalauktanga tugarlugo serᴋaliva; nalliutok taipsoma tikkilugo Israelib ᴋitorngangita isserluanititsivigilaungmatsuk, atserartauvorlo Nehustanemik.

⁵ Tapsoma Nâlegak Israelib Gûdinga tettigiva, kingornganelo Judakut atanningita ilunnatik akkorngane adsekalaungilak, sivurnganelauktullo akkornganêlonêt.

⁶ Tapsoma Nâlegak ungagiva uniorksivigingilalo, perkojangillo mallikpait, Nâlekab perkolauktangit Mosesemut.

⁷ Nâlekablo aipariva; ilunnanelo namut aivigijamine pillorilaukpok. Assiriamiullo atanningat allârpa nâlegungnailugolo.

⁸ Filisterillo ullimarpait Gasa tikkidlugo, asserorlugillo erᴋangit, udsertortib nuvugusinganit iglugasaksuit sôngojut tikkilugit.

⁹ Hiskiab Judakut atanningata Jâringita sittamangane, tagva Hoseab Elab erningata Israelitit atanningata Jâringita 7 ingane, Salmanasser Assiriamiut atanningat aularlune takpaungarpok Samariamut, sorsugvigilugit, illumavaillo,

¹⁰ Sâlagivaillo Jârit pingasut kingorngane, Hiskiab Jâringita 6 ingane, tagva Hoseab Israelitit atanningata Jâringita 9 ingane Samaria sâlagijauvok.

¹¹ Assiriamiullo atanningata Israelitit aularutivait Assiriamut, nunakartipaillo Holame Haboremelo Gosanib kôngane, Mederillo iglugasaksoangine.

¹² Tamanna pivlugo Nâlekab Gûdimik nippinga nâlelaungimatsuk, angerningalo; tamaitalo Mosesib Nâlekab kivgangata perkolauktangit tappagilaungmattigik, nâlelaungimattigiglo, pinniarlaungimattigiglonêt.

¹³ Atanniuble Hiskiab Jâringita 14 ingane Sanherib Assiriamiut atanningat aularlune takpaungarpok, Judakut iglugasaksoangit sôngojut ilunnaita sorsugvigilugit, aksarnigarivaillo.

¹⁴ Tagva Hiskia Judakut atanningat tilliklerpok Assiriamiut atanninganut Lachisemut, oᴋautsaukovalo: Idluitullilaukpunga, aularit uvamnit; tunnijaukojattit uvamnut tunnijomavakka. Tagva Assiriamiut atanningata Hiskia Judakut atanningat tunnijikova Talentenik 300 dinik Silberemik, Talentiniglo 30 ginik Goldemik.

¹⁵ Taimak Hiskiab Silberit tamaita Nâlekab iglungane, atanniublo iglungata perkutitalingine nachvartaumajut tunnivait.

¹⁶ Nalliutome taipsomane Hiskiab Goldit Nâlekab iglungata upkoanginit nappajunillo, Hiskiab Judakut atanningata silapartaukolauktanginit pêrpait, tunnilaitalo Assiriamiut atanninganut.

¹⁷ Assiriamiulle atanningata Tartane, Rabsariselo Rabsakelo tillivait Lachisemit, ilakarlutik ᴋattimgajoksoarnik atannermut Hiskiamut Jerusalemut, majorarlutiglo takpaungarput. Tikkinamiglo nokᴋarput tetsib kogvasiktub, ergortuijut perorsêvingata apᴋosingata sennianêtub kôvingane,

¹⁸ Atannerlo nipliarvigivât. Tagva Eliakimib Hilkiab erningata, aulatsijub, atanniub iglunganik, Sebenablo aglakpaktub, Joablo Assafab erningata angajoᴋaujub aglakpaktunut annivigivait.

¹⁹ Rabsakiblo oᴋautivait: Oᴋaritsetôk atannermut Hiskiamut: Imâk atannersoak Assiriamiut atanningat oᴋarpok: Tettekarnek tettigijat sunauva?

²⁰ Oᴋarpotit, (oᴋautsitille oᴋausetuinauvut): Atannertuineᴋarpunga, sôngonekalungalo sorsungnermut. Kinâle sungertutigiviuk nâlegungnailauramga?

²¹ Ahâk tettiksaᴋarpotit ipsominga ajaupiamik suvlulingmik, napvaujersimajomik Egiptenemik. Tapsoma kia ajakpakuniuk aggangit kappiniarpait puttorniarlaitalo. Taimailingavok Farao Egiptenemiut atanningat, ilunnainut tettekartunut tapsominga.

²² Oᴋautigupsingalo: Jehova Gûdivut tettigivavut. Tamnâle tamnaungilâk, Hiskiab pejaivigijanga pôktojoᴋotinginik, Altarekotinginiglo, oᴋalauklune Judakunut Jerusalemiunullo: Altarib oma Jerusalemêtub sângane tuksiartuksauvose?

²³ Mannalo attetôk angajoᴋara Assiriamiut atanningat angervigiuk: horsinik 2,000 dinik tunnitsivigijomavagit, ablangajoᴋartitsijungnaruvit tapᴋonunga.

²⁴ ᴋanok uttertitsijomagalloarkît angajoᴋangma aulatsijoᴋotingita mikkinerpângita ilanganik? Egiptenemigle sungertuteᴋarpotit, kammutit ablangajullo horsit ᴋângine pivlugit?

²⁵ Issumavîlle, uvanga Nâlegak pinago tamaungarama iglugasaksuit tamakkoa asserorlugit piᴋovlunga? Nâlekab oᴋautilaukpânga: Majorarit takpaunga nunamut omunga, asserorlugolo.

²⁶ Tagva Eliakime Hilkiab erninga Sebenalo Joalo oᴋarput Rabsakemut: Kivgatit Siriamiut oᴋausingit attorlugit oᴋarvigikit, tukkisigaptigik; Judillo oᴋausingit attorlugit oᴋarviginiaratigut, innugiartoksuit avaluksuit ᴋânginêtut siutingita sângine.

²⁷ Rabsakible oᴋautivait: Angajoᴋangma tillilaukpingale angajoᴋângnut illingnullonêt oᴋausekarᴋovlunga taimaitunik? Angutinulloungitok avaluksuit ᴋânginetunut, ilagiluse annarmingnik nerriᴋovlugit, itteromingniglo immerᴋovlugit?

²⁸ Tagva Rabsake nangeriartorpok tagvunga, nipliarlunelo nipiᴋôrtojomut, Judit oᴋausingit attorlugit, oᴋarlunelo: Tussaleritse atannersub Assiriamiut atanningata oᴋausinginik.

²⁹ Imâk atannek oᴋarpok: Uiverijautailititse Hiskiamut piulijungnangermasse aggamnit.

³⁰ Mannigortautailititselo Hiskiamut Nâlegak tettigivlugo pijuksaugapse, oᴋartillugo: Nâlekab piuliniarpâtigut, iglugasaksuillo makkoa tunnijauniangilet Assiriamiut atanningata agganginut.

³¹ Hiskia nâlengniarassiuk. Imâk Assiriamiut atanningat oᴋarmat: Ullapirsautekarᴋattigissinga, annivigilungalo, tagva ilunnase attunit, nerrijuksauvose nappartokotipsingnit Weineliksamit, Feigeliksamillo, immertuksauluselo immektârvikotipsingnit;

³² Tikkikârtinanga ailuselo nunamut, nunapse adsinganut, pittalingmut ᴋakᴋojaksanik, Weineliksablo paungangita iptinganik, ᴋakᴋojamiglo, perorsêvingniglo nappartolingnik Weineliksanik, nappartuniglo orksulingnik, orksumiglo, igupsaujartullo orksunginik, innoᴋovluse toᴋokonnaselo. Hiskia nâlengniarassiuk, tapsoma uiveringmasse, oᴋarlune: Nâlekab piuliniarpâtigut.

³³ Innuᴋattigêksuit assipse Gûdingita attunît nunakotitik piulilaurivattigik Assiriamiut atanningata agganginit?

³⁴ Hemathemiut Arpamiullo Gûdingit nanêkat? Sefarfaimemiut Henamiut, Iwamiullo Gûdingit naneᴋât? Samaria piulilaurivattigik aggamnit?

³⁵ Nalliangovât ilunnatik Gûdingita akkorngane, nunakotimingnik piuliklerlauktut aggamnit, Nâlekab Jerusalem piulijaksariniarmagit aggamnit?

³⁶ Innugiartoksuille niplilaungilet, kiolungilâllo sunamik; atannek perkojilaungmat, oᴋalaungmallo: Kioniarassiuk.

³⁷ Tagva Eliakimib Hilkiab erningata aulatsijub atanniub iglunganik, Sebenablo aglakpaktub, Joab Assafib erningata angajoᴋaujub aglakpaktunut, Hiskia tikkipât annoralijarlutik alliksimajunik, unipᴋautivâllo Rabsakib oᴋausinginik.