II Atannit 17 - Labrador Inuttitut Heritage Bible

Kinguvarêt 10 it aularutijauningit Salmanassermut, Assiriamiut atanninganut, Hosea atanniotillugo. Takkorngartat nunaᴋarput Israelitit nunangane.

¹ Ahasib Judakut atanningata Jâringita 12 ingane, Hosea Elab erninga atanningorpok Israelitinut Samariame, atanniotilunelo Jârit 9 it nâlugit.

² Pinniarporlo Nâlekab idluigijanginik, Israelitille atanningitituungitok sivorlimetut.

³ Tapsomunga Salmanasser Assiriamiut atanningat tikkilerpok sorsuklune. Hosealo kivgangorpok tapsomunga, tunnitsivigivâlo pilliutinik.

⁴ Assiriamiulle atanningat tukkisilerpok Hosea angerᴋattigêngnekartitsingmat akkerartorlugo, tillijaniglo tilliklerlaungmat Somut Egiptenemiut atanninganut, pilliutiniglo tunnijijungnaimat Assiriamiut atanninganut sivornganetut Jârine tamaine. Tamanna pivlugo Assiriamiut atanningata illumava, pitipâlo kellaksorsimatillugo parngnanairsimavingmut.

⁵ Assiriamiullo atanningat tikkilerpok nunab ilunnanganut, Samariamullo, illumavaillo Jârit pingasut nâvlugit.

⁶ Hoseablo Jâringita 9 ingane Assiriamiut atanningata Samaria salagivait, Israelitillo aularutivait Assiriamut, nunakartipaillo Halame, Haboremelo Gosanib kôngane, Mederillo iglugasaksoangine.

⁷ Tamannalo pilaukpok, Israelib ᴋitorngangit idluitullilaungmatta Nâlekamut Gûdemingnut, tessiorlauktomut tapᴋoninga Egiptenemit, Faraub Egiptenemiut atanningata agganginit, Gûdiblo assingit sivoragilaungmattigik;

⁸ Agvertarlaukpullo nallojut, Nâlekab pêjarlauktangita Israelib ᴋitorngangita sivorngane illusingit malliklugit, sorlolo Israelitit atanningit pinniarlaungmatta.

⁹ Israeliblo ᴋitorngangit angigutsivlutik illuseᴋarput namalungitunik Nâlekab Gûdimik sângane, pôktojuniglo sennavut ingmingnut iglugasaksoakotimingne ilunnaine, nuvugosingnelo iglugasaksoarne sôngojune.

¹⁰ Nappajuniglo nappartitsivut, Gûdingoaniglo ᴋakᴋarulangne pôktojune ilunnaine, nappartullo tungojortat ilunnatik attâne;

¹¹ Isserluanititsilaukpullo tagvane poktojune ilunnaine nallojutitut, Nâlekab tapᴋoa sivorngane pêjarlauktangititut. Pinniarlutiglo idluitoâlungnik, Nâlekab ningaksartaujutiksanginik.

¹² Kivgartorlutiglo Gûdeungitunik, Nâlekab oᴋarutigilauktanginik tapᴋonunga: Taimaitomik pinniartuksaungilase!

¹³ Nâlekablo Israelitit Judakullo tennersarlaukpait nallautaijoᴋotimigut ilunnaitigut, takkojoᴋotimigullo, oᴋautsaukovaillo: Utteritse apᴋotipsingnit idluitunit, mallikluselo perkojamnik, innatsinimniglo; perkojat ilunnatik malliklugit atâtagijapsingnut perkolauktakka, tillikliutilauktakkalo illipsingnut kivgakotipkut nallautaijutigut;

¹⁴ Nâlelaungilelle ᴋongesetigle keratatipait atâtagijamiktut, okperlaungitutitut Nâlekamut Gûdemingnut.

¹⁵ Perkojangillo angerningalo, atâtagijanginut angerlauktanga, tennersariningillo tunnilauktangit tapᴋonunga, nachogivait, agvertarlutiglo Gûdingoat suksaungitut malliklugit, pinniarlutiglo suksaungitomik, nallojut malliklugit avatimingne nunakalauktut, Nâlekab perkojijutigijangit tapᴋoninga, taipkotitunak pinniartuksaungimatta.

¹⁶ Nâlekable Gûdemik perkojangit ilunnaita kemmakpait, sennalutiglo ingmingnut nochangoangnik kovijaumajungnik, nappartuniglo; tuksiarlutiglo ᴋilaub ᴋattimgajoksoanginut ilunnainut kivgartorlarmiglo Baalemik;

¹⁷ Ernitiglo pannitiglo ikkomakôrkovait, nallautailuklutiglo angakoktorlarmiglo; iggisimavullo ingminik tunnilutik Nâlekab idluigijanginik, ningaksarlugo.

¹⁸ Tagva Nâlekab Israelitit ningaridlalaukpait, pêrpaillo kênaminik; amiakoᴋalungilak kinguvarêt Judakut assinginik.

¹⁹ Judakuttauk Nâlekab Gûdimik perkojangit mallilaungilait, agvertarpulle Israelitit illusingit, sennalauktangit malliklugit.

²⁰ Tamanna pivlugo Nâlekab Israelib kinguvângit ilunnaita ajaktorpait, tetjarlugillo, tunnilaitalo arktaijut agganginut, egitsikârane tapᴋoninga kênaminit.

²¹ Israelitit pêrsimalaukput Davidib iglunganit; Jerobeamelo Nebatib erninga atanningortipât, tapsomalo Israelitit tunnutipait Nâlekamit, idluitullitilaitalo angijoksoarmik.

²² Taimak Israelib ᴋitorngangit agvertarlaukput Jerobeamib idluiningine sennalauktangine tamaine, allarlaungilaillo,

²³ Nâlegak Israelitinik pêjaikârtinago kênaminit, sorlo oᴋalaurame kivgamigut ilunnaitigut nallautaijutigut Taimak Israelitit nunamingnit aularutitaulaukput Assiriamut uvlok tamanna tikkilugo.

²⁴ Assiriamiullo atanningat tikkitoᴋarkojivok innungnik Babelemit, Kutamillo, Avamillo, Hemathemillo, Sefarfaimemillo, pitipaillo Samariab iglugasaksoanginut, Israelib ᴋitorngangit innangêrlugit. Tapᴋoalo Samaria nangminiutipât iglugasaksoangillo innigilaita.

²⁵ Nunakarnimigle pigiarningane Nâlegak sivuragilaungimatsuk, Nâlegak tilliklerpok Loewinik tapᴋoa akkornganut, tapᴋoa toᴋotsivut akkorngane.

²⁶ Assiriamiullo atanningat oᴋautsaukovât: Innugiartoksuit aularutilauktavit, pitilauktavillo Samariab iglugasaksoanginut, nunab tamattoma Gûdingata illusinga nallovât, tamanna pivlugo Loewit tillilaukpait akkornganut, ahâglo, tapᴋoa toᴋopait, nunab tamattoma Gûdingata illusinga illitaringimatsuk.

²⁷ Tagva Assiriamiut atanningat perkojivok, oᴋarlunelo: Atsileritse tagvunga ajochertuijut aularutjigilauktapse ilanganik, ailerluselo nunakarluselo tagvane, tapsomalo ajochertorlerligit nunab Gûdingata illusinganik.

²⁸ Tagva ajochertuijut taipkoa Samariamit aularutilauktangita ilangat tikkilerpok, nunakarlunelo Betheleme, ajochertorpaillo, ᴋanok Nâlegak sivuragijaksaringmatsut.

²⁹ Innuᴋattigêksuille ilunnatik attunît Gûditik sennavait, pitipaillo pôktojut iglunginut Samariamiut sennalauktanginut, innuᴋattigêksuit ilunnatik iglugasaksoamingne nunagijamingne.

³⁰ Babelemiovinît Suchot Benoth sennavât. Kutemiovinît Nergele sennavât. Hemathemiovinît Assima sennavât.

³¹ Avamiovinît Nibehase Tartakelo sennavâk. Sefarfaimimiovinît ernitik ikkipait Adrameliche Anamelechelo Sefarfaimemiut Gûdingoakotigik pivlugit.

³² Nâlegarlo sivuragikassiutivat, ajochertuijungortitsivullo nallimingnik pivlutik, poktôjunetuksanik, tapᴋoa tunnergutinik tunnijivut pivlugit iglune pôktojunetune.

³³ Taimak Nâlegak sivuragivât, Gûdingoakotitiglo kivgartorkassiutivait, innuᴋattigêksuit taipkoa aularutjauvigilauktamik tamaunga illusingit malliklugit.

³⁴ Uvlorlo tamanna tikkilugo taimailiorput, illutsit nutaungitut malliklugit Nâlegak sivuragijatuarilungilât, pinniaratiglo illuserivalauktatik, piuserivalauktatiglo malliklugit, pinniaratiglo illusiokojaujut perkojallo malliklugit, Nâlekab perkolauktangit Jakob, atserartaulauktub tapsomunga Israelemik, ᴋitornganginut;

³⁵ Nâlekab angerᴋattigingmagit, perkolaitalo, oᴋarlunelo: Gûdib assingit sivuraginiarassigik tuksiarviginagillo, kivgartorassigiglo, tunijitaililuselo tunnergutinik tapᴋonunga;

³⁶ Nâlegarle tessiortigijase Egiptenemit, pitsartunersoarmut tallerminullo issamijomut, tamna sivuragisiuk, tuksiarvigisiuglo, tunnergutiniglo tunnitsivigisiuk;

³⁷ Illutsillo, idluarnerillo, innatsinerillo, perkojallo aglagutigilauktangit pivluse, tapᴋoa malligaksarivasse, pinniatsainarlugillo; Gûdiblo assingit sivuraginagit,

³⁸ Angerᴋattigêngnerlo angernerilauktanga illipsingnut puigorniarassiuk, Gûdib atingit sivuragilugit pikonase;

³⁹ Nâlegarle Gûdise sivuragijaksarivasse, tapsoma piuliniarpâse omigijipse ilunnatik agganginit.

⁴⁰ Tapᴋoale nâlelaungilet, illutsitigle illuserilauktatik malliklugit pinniarlaukput.

⁴¹ Taimak innuᴋattigêt tapᴋoa Nâlegak sivuragivat, kivgartorkassiutilaitalotauk Gûdingoakotitik. Taimailiorlaurivuttauk taipkoa ᴋitorngangit erngutingillo uvlok tamanna tikkilugo, sorlo atâtagilauktangit pinniarlaungmatta.