II Atannit 16 - Labrador Inuttitut Heritage Bible

Ahas Judakut atanningat.

¹ Pekab Remaljab erningata Jâringita 17 ingane, Ahas, Jothamib Judakut atanningata erninga atanningorpok.

² Ahase Jârekalaukpok 20 ginik atanningorame, atanniotilunelo Jârit 16 it nâlugit Jerusaleme. Pinniarlungilarlo Nâlekab Gûdime namagijanganik, atâtagijamitut Davidetut.

³ Agvertarporle Israelitit atanningita apᴋosiningine, erninelo ikkomakorkova, nallojut Nâlekab pêjarlauktangita Israelib ᴋitorngangita sivorngane, makkojungnartulliningit malliklugit;

⁴ Tunnergutiniglo tunnijivok isserluanititsilunelo poktojune, ᴋakᴋarulangnelo, nappartullo tungojortat ilunnatik attâne.

⁵ Taipsomane Rezin Siriamiut atanningat, Pekalo Remaljab erninga Israelitit atanningat, aularlutik takpaungarpuk Jerusalemut sorsugvigijomavlugit, illumavâglo Ahase; salagijungnarlaungilaille.

⁶ Nalliutome taipsomane Rezinib Siriamiut atanningata Siria sattorsitipa Elathemik, Judillo ajaktorpait Elathemit; Siriamiulle tikkilutik innigivaillo uvlok tamanna tikkilugo.

⁷ Ahasible tillijat tillivait Tiglat Pilesseremut Assiriamiut atanninganut oᴋautsaukovâlo: Kivgauvunga erniolungalo illingnut; majorarlutit ᴋailaurit tamaunga ikajorlungalo Siriamiut atanningata, Israelitillo atanningata agganginit, akkerartortuk uvamnik.

⁸ Ahasiblo Silbere Goldelo Nâlekab iglungane, atanniublo iglungata perkutitalingane nachvartaulauktut tiguvait, tujorpâlo Assiriamiut atanningat pilliutinik.

⁹ Assiriamiullo atanningata nâlekpâ, aularlunelo Damaskusemut, sâlagivaillo, aularutivaillo (Damaskusemiut) Kiremut, toᴋopâlo Rezine.

¹⁰ Atanniublo Ahasib Tiglat Pilesser Assiramiut atanningat aularlune pachrearpa Damaskusemut. Altarelo Damaskusemêtok takkogamiuk; atanniub Ahasib Altarib adsinga oktutingalo sorlo tamna sennajaulaungmat, tillikliutiva ajochertuijomut Uriamut.

¹¹ Uriablo ajochertuijub Altare sennava, taimaluatsiak sorlo Ahasib atanniub tilliklervigilaungmago Damaskusemit taimak sennava, atannek Ahase tikkikârtinago Damaskusemit.

¹² Atannerlo Damaskusemit tikkiname, Altarelo tamna takkogamiuk, tunnergutinik tunnijivok ᴋângane.

¹³ Ikkilugillo ᴋângane tunnergutine ikkoalajaksat, nerᴋiksallo, kovilugolo ᴋânganut tunnergutine immiksak tunnergutillo kujalijutiksat tunnijame aungit serᴋijartaukovait Altarib oma ᴋânganut.

¹⁴ Altarele kannujangôjok Nâlekab sângane nappajok nûktipa inninganit, nappakonago Altarib nutâb Nâlekablo iglungata akkorngangne; napparpâlo Altarib sennianut tachanut.

¹⁵ Atanniublo Ahasib Uria ajochertuijok perkova, oᴋarlunelo: Altareme angijome ikkitsijuksauvotit tunnergutinik ikkoalajunik uvlarme, tunnergutiniglo nerᴋiksanik unnungme, atanniublo tunnergutinginik ikkoalajaksanik, nerᴋiksaniglo, innugiartoksuillo nunamiut tunnergutinginik ikkoalajaksanik, tunnergutinginiglo nerᴋiksanik, tunnergutinginiglo imiksanik, tunnergutillo ikkoalajaksat, tunnergutillo assingita aungit tamaita serᴋijaraksarivattit ᴋânganut; Altarelo kannujangôjok pivlugo sulle issumaksarsioromavunga.

¹⁶ Urialo ajochertuijok tamainik pinniarpok, perkojaunerminik atannermut Ahasemut.

¹⁷ Atanniublo Ahasib ikkovrat sennerangit serᴋomipait, ukkusillo akkârtipait; immarbingoarlo tuktuvangoanit kannujangojunit tapsoma attânetunit akkârtipa, illivalo nettermut ujaraujomut.

¹⁸ Taimaktauk torksuk, Sabbatib torksunga kâlik, sennajaulauktok iglome, atanniublo torksunga silatanelauktok, nuktipak Nâlekab iglunganut, Assiriamiut atanningat pivlugo.

¹⁹ Unipᴋautsille tamakkoa assingit Ahase pivlugo, pinniarlauktangit, ahâk, tamanna aglaksimavok Judakut atanningita aglangine.

²⁰ Ahaselo sinnisilerpok atâtagijaminut ailune, illijartortaulunelo atâtagijamine Davidib iglugasaksoangine. Hiskialo erninga atanningorpok innangêrlugo.