II Atannit 15 - Labrador Inuttitut Heritage Bible

Asarja Jothamelo atannîk Judakune. Sacharja, Sallume, Menaheme, Pekaja, Peka, Hosealo, atannit Isralitine. Israelitit aularudsauningita Assiriamut pigiarningat.

¹ Jerobeamib Israelitit atanningata Jâringita 27 ingane atanningorpok Asarja, Amaziab Judakut atanningata erninga;

² Jârekalaukporlo 16 nik atanningorame, atanniotilunelo Jerusaleme, Jârit 52 git nâlugit. Anânanga attekalaukpok Jechaljamik, Jerusalemiojok.

³ Pinniarporlo Nâlekab namagijanganik, taimaluatsiak atâtanetut Amaziatut;

⁴ Pôktojulle pêjartaulaungilet, innugiartoksuille tunnergutinik tunnijivut isserluanititsilutiglo sulle pôktojune.

⁵ Nâlekablo atannek annauva, kallaᴋarporlo, toᴋome uvlunga tikkilugo, innekalunelo iglome ingmigolingajome. Jothamele atanniub erninga iglomik aulatsivok idluarsailunelo innugiartoksoarnik nuname.

⁶ Unipᴋautsille tamakkoa assingit Asarja pivlugo, tamaitalo pinniarlauktangit, ahâk, tamanna aglaksimavok Judakut atanningita aglangine.

⁷ Asarjalo sinnisilerpok atâtagijaminut ailune, illijartortauvorlo atâtagijamine Davidib iglugasaksoangine. Erningalo Jothame attaningorpok innangêrlugo.

⁸ Asarjab Judakut atanningata Jâringita 38 ingane Sacharja Jerobeamib erninga atanningorpok Israelitinut Samariame, atanniotilaukporlo takkit 6 it nâlugit;

⁹ Pinniarporlo Nâlekab idluigijanginik, sorlo atâtagijangit pinniarlaungmatta. Jerobeamib Nebatib erningata Israelitinik idluitullititsijub idluitulliningit allarlaungilait.

¹⁰ Sallumelo Jabesib erninga angerᴋattigêngnekartitsivok akkerartorlugo, annaulerpâlo innugiartoksuit takkoane, toᴋolâlo, atanningorlunelo innangêrdlugo.

¹¹ Unipᴋautsit tamakkoa assingit Sacharja pivlugo, ahâk, tamanna aglaksimavok Israelitit atanningita aglangine.

¹² Tamannauvorlo Nâlekab oᴋauserilauktanga Jehumut: Igvit ᴋitorngakartuksauvotit Israelitit iksivautaksoangane iksivajunik, ᴋitorngarêt sittamangat tikkidlugo; taimailaurivok.

¹³ Sallumele Jabesib erninga atanningorpok, Asarjab Judakut atanningata Jâringita 39 ingane, atanniotivorlo takkek attausek nâlugo Samariame.

¹⁴ Tagva Menaheme Gadib erninga majorarlune takpaungarpok Tirzamit, tikkilunelo Samariamut, ullimarpâlo Sallume Jabesib erninga Samariame, toᴋopâlo, atanningorlunelo innangêrdlugo.

¹⁵ Unipᴋautsit tamakkoa assingit Sallume pivlugo, angerᴋattigêngnekartitsiningalo, ahâk, tamanna aglaksimavok Israelitit atanningita aglangine.

¹⁶ Taipsomane Menahemib Tifsa, ilunnaitalo tapᴋonanêlauktut kiglilervingillo Tirzab miksâne ullimârpait, itterkojomalaungimatsuk; singaijungillo ilunnaita ullimarpait, alliktorlaitalo.

¹⁷ Asarjab Judakut atanningata Jâringita 39 ingane Menaheme Gadib erninga atanningorpok Israelitinut, atanniotilunelo Jârit 10 it nâvlugit Samariame.

¹⁸ Pinniarporlo Nâlekab idluigijanginik. Inôsermine tamât Jerobeamib Nebatib erningata Israelitinik idluitullititsijub idluitulliningit allârlaungilait.

¹⁹ Fulelo Assiriamiut atanningat tikkipok nunamut. Menahemiblo Fule tunnitsivigiva Talentinik 1,000 dinik Silberemik, illilertuiᴋovlugo tapsominga, atannioviglo sokkosijuitilugo tapsomunga piᴋovlugo.

²⁰ Menahemelo perkojivok akluinersat Israeleme angutit attunît tunijiᴋovlugit Sekelinik 50 ginik Silberemik, tunijiᴋovlugo tamakkoninga Assiriamiut atanninganut. Taimak Assiriamiut atanningat aularlune angerarpok, nunamêtuarlungilarlo.

²¹ Unipᴋautsille tamakkoa assingit Menaheme pivlugo, tamaitalo pinniarlauktangit, ahâk, tamanna aglaksimavok Israelitit atanningita aglangine.

²² Menahemelo sinnisilerpok atâtagijaminut ailune, Pekajalo erninga atanningorpok innangêrdlugo.

²³ Asarjab Judakut atanningata Jâringita 50 ingane, Pekaja Menahemib erninga atanningorpok Israelitinut Samariame, atanniotivorlo Jârîk magguk nâlugik;

²⁴ Pinniarporlo Nâlekab idluigijanginik, Jerobeamib, Nebatib erningata, Israelitinik idluitullititsilauktub idluitulliningit allarlaunginamigit.

²⁵ Peka, Remaljab erninga, angajoᴋakotinga angerᴋattigêngnekartitsivok akkerartorlugo, ullimarpâlo Samariame, atanniub igloksoangane, Argobe, Arielo ilaliudlugit, angutillo 50 git Gileadib ᴋitornganginit ilagivât, toᴋopâlo, atanningorlunelo innangêrlugo.

²⁶ Unipᴋautsit tamakkoa assingit Pekaja pivlugo, tamaitalo pinniarlauktangit, ahâk, tamanna aglaksimavok Israelitit atanningita aglangine.

²⁷ Asarjab Judakut atanningata Jâringita 52 ingane, Peka Remaljab erninga atanningorpok Israelitinut Samariame; atanniotilunelo Jârit 20 git nâlugit;

²⁸ Pinniarporlo Nâlekab idluigijanginik; Jerobeamib, Nebatib erningata Israelitinik idluitullititsilauktub idluitulliningit allarlaunginamigit.

²⁹ Pekab Israelitit atanningata nalliuningane, Tiglat Pilesser Assiriamiut atanningat tikkipok, tigulaitalo Hion, Abel, Bethmaecha, Janoha, Kedes, Hazor, Gilead, Galilialo, Naftalikullo nunangat ilunnât, aularutivaillo Assiriamut.

³⁰ Hosealo, Elab erninga angerᴋattigêngnekartitsivok Peka Ramaljab erninga akkerartorlugo, annaulerlugolo toᴋopa, atanningorlunelo innangêrlugo, Jothamib Usiab erningata Jâringita 20 ingane.

³¹ Unipᴋautsille tamakkoa assingit Peka pivlugo, tamaitalo pinniarlauktangit, tamanna aglaksimavok Israelitit atanningita aglangine.

³² Pekab Remaljab erningata Israelitit atanningata Jâringita aipangane, Jothame Usiab Judakut atanningata erninga atanningorpok,

³³ Jârekalaukporlo 25 ginik atanningorame, atanniotilunelo Jârit 16 it nâlugit Jerusaleme. Anânanga attekalaukpok Jerusamik, Zadokib pannia.

³⁴ Pinniarporlo Nâlekab namagijanganik, taimaluatsiak sorlo atâtanga Usia pinniarlaungmat.

³⁵ Kisiane pôktojut pêjartaulungilet, innugiartoksuille tunnergutinik tunnijivut, isserluanititsilutiglo sulle pôktojune. Tapsoma itterviksoak kogvasiktok Nâlekab iglungane sennava.

³⁶ Unipᴋautsit tamakkoa assingit Jothame pivlugo, tamaitalo pinniarlauktangit, ahâk, tamanna aglaksimavok Judakut atanningita aglangine.

³⁷ Nalliutome taipsomane Nâlegak pigiarpok tilliklerlune Judamut Rezinemik Siriamiut atanninganik, Pekamiglo Remaljab erninganik.

³⁸ Jothamelo sinnisilerpok atâtagijaminut ailune, illijartortaulunelo atâtagijamine Davidib atâtagijame iglugasaksoangine. Ahaselo erninga atanningorpok innangêrlugo.