II Atannit 14 - Labrador Inuttitut Heritage Bible

Amazia Asarjalo, atannîk Judakune; Jerobeame atannek Israelitine.

¹ Joasib Joahasib erningata Israelitit atanningata Jâringita aipangane, Amazia Joasib erninga atanningorpok Judakunut.

² Jârekalaukporlo 25 ginik atanningorame, atanniotilunelo Jârit 29 it nâlugit Jerusaleme. Anânanga Joadanemik attekalaukpok, Jerusalememiok.

³ Pinniarporlo Nâlekab namagijanganik, atâtamitulle Davidetuungitok, taimaluatsiarle sorlo atâtanga Joase pinniarlaungmat, taimailiorivoktauk.

⁴ Pôktojut pêjartaulungimatta, innugiartoksuille tunnergutinik tunijivut isserluanititsilutiglo pôktojune.

⁵ Pijoᴋalaukporlo atanniovingmine sôngogame, kivgane ullimarpait atâtanganik toᴋotsilauktut.

⁶ Innuartulle ᴋitorngangit toᴋolaungilait; sorlo aglaksimangmat Mosesib aglangine perkojaktalingne, Nâlegak perkojilaungmat, oᴋalaungmallo: Atâtait toᴋotaujuksaungilet ᴋitorngat pivlugit, ᴋitorngallo toᴋotaujuksaungilet atâtait pivlugit, nallialle ajornine pivlugit toᴋojuksauvok.

⁷ Edomiterillo ullimârpaittauk nâksame sioraujaktalingme 10,000 dit, iglugasaksuillo Selamik attiggit sâlagivait unatadlarnermut; atserarpaillo Jakteelemik, uvlok tamanna tikkidlugo.

⁸ Taipsomane Amaziab tillijat tillivait Joasemut Joahasib Jehub erningata erninganut, Israelitit atanninganut, oᴋautsaukovâlo: ᴋait takkonautilauluk.

⁹ Joasele Israelitit atanningat tilliklerpok Amaziamut, Judakut atanninganut, oᴋautsaukolâlo: Orpik Dorne Libanonemêtok, tilliklerpok Cederemut Libanonemêtomut, oᴋautsaukovalo: Pannît tunnileruk ernimnut nulliangoᴋovlugo tapsomunga. Omajulle nujuartut natername Libanoneme, orpik Dorne tullerajakpât tullerlugolo serᴋomipât.

¹⁰ Edomiterit salagilaukpattit, tamanna omattivit piojorijutigiva. Nertornaut tamanna pigiuk, nunangnêtuarlutillo, sôg ᴋanoêtoksiorkît, ochoᴋovlutit Judialo ilagillutit?

¹¹ Amaziale nâlelungilak. Tagva Joas Israelitit atanningat majorarlune takpaungarpok; takkonautivuglo tamna Amazialo Judakut atanningat, Bethsemeseme Judiametome.

¹² Judakulle sâlagijauvut Israelitinut, ilunnatiglo attunît ᴋemâvut iglomingnut.

¹³ Joasiblo Israelitit atanningata tiguva Amazia Judakut atanningat Joasib Ahasjab erningata erninga Bethsemeseme; tikkiporlo Jerusalemut, Jerusalemiblo avaluksoangit serᴋomipait, itterviksoarmit Efraimemik atelingmit terrekub itterviksoanga tikkidlugo, tallitut 400 ditut takkitigijomik;

¹⁴ Tiguvaillo Goldit tamaita, Silberillo tamaita, illulerkutillo tamaita nachvartaulertut Nâlekab iglungane, atanniublo iglungata perkutitalingane, tappilugillo sorrutsit sattoraksauvlutik, utterlunelo Samariamut.

¹⁵ Unipᴋautsille makkoa assingit Joase pivlugo pinniarlauktangit, sôngoningalo, ᴋanorlo Amazia Judakut atanningat sorsugvigilaungmago, ahâk, tamanna aglaksimmavok Israelitit atanningita aglangine.

¹⁶ Joaselo sinnisilerpok atâtagijaminut ailune, illijartortaulunelo Samariame Israelitit atanninginut. Erningalo Jerobeam atanningorpok innangêrdlugo.

¹⁷ Amaziale Joasib Judakut atanningata erninga, innôlaukpok Joasib Joahasib erningata Israelitit atanningata toᴋungata kingorngane Jârinik 15 nik.

¹⁸ Unipᴋautsille tamakkoa assingit Amazia pivlugo, tamanna aglaksimavok Judakut atanningita aglangine.

¹⁹ Jerusalemelo angerᴋattigêngnekartitsivut tamna akkerartorlugo, tamnâle ᴋemâvok Lachisemut. Tapᴋoalo tilliklerput malliklugo Lachisemut, toᴋopâllo tagvane.

²⁰ Apâllo horsekut, illijartortauvorlo Jerusaleme atâtagijamine Davidib iglugasaksoangine.

²¹ Innugiartoksuillo Judakut illuêngarlutik Asarja Jârekartillugo 16 nik tiguvât atanningortilâllo atâtangata Amaziab inningane.

²² Tapsoma Elathe iglugasaliorpait, sattortautilaitalo Judakunut, atannek sinnisilaukârdlune atâtagijane ilagillugit.

²³ Amaziab erningata Judakut atanningata Jâringita 15 ingane, Jerobeame Joasib erninga atanningorpok Israelitinut Samariame, (atanniotilunelo) Jârit 41 nâlugit.

²⁴ Pinniarporlo Nâlekab idluigijanginik, allailungilarlo Jerobeamib Nebatib erningata, Israelitinik idluitullititsilauktub idluitullininginik tamainik.

²⁵ Tapsomale Israelitit kiglilervingit sattortautipait Israelitinut Hemathemit, immarbik naternamêtok tikkilugo, Nâlekab Israelib Gûdingata oᴋausingit malliklugit, oᴋauserilauktangit kivgamigut Jonakut Amithaib erningagut, nallautaijokut, Gad Heferemit pijokut.

²⁶ Nâlekab Israelitit kappianarningat ilapsungnartok takkungmago, ilunnaita pijaulaungmatta, kivgaujut, kivgaungitullo, ikajortekalaungimallo Israelitine.

²⁷ Nâlegarlo oᴋalaungilak Israelitit atingit pêjaromagamigit ᴋilaub attâne; taimaglo ikajorpait Jerobeamekut, Joasib erningagut.

²⁸ Unipᴋautsit tamakkoa assingit Jerobeame pivlugo, tamaitalo pinniarlauktangit, sôngoninga, ᴋanorlo sorsuglaungninga, Judakunut Israeleme sattortautilaungmagit Damaskuse, Hematelo, ahâk, tamanna aglaksimavok Israelitit atanningita aglangine.

²⁹ Jerobeamelo sinnisilerpok, atâtagijane Israelitit atanningit ilaliudlugit. Erningalo Sacharja atanningorpok innangêrlugo.