II Atannit 13 - Labrador Inuttitut Heritage Bible

Joahasib Joasiblo atanniojuk Israelitinut atanniotinigik. Elisab toᴋoninga.

¹ Joasib Ahasjab erningata Judakut atanningata Jâringita 23 ingane, Joahas, Jehub erninga atanningorpok Israelitinut Samariame, atanniotilunelo Jârit 17 it nâlugit.

² Pinniarporlo Nâlekab idluigijanganik, agvertarlunelo Jerobeamib Nebatib erningata Israelitinik idluitullititsilauktub idluiningit malliklugit, allailungilarlo tapᴋoninga.

³ Nâlekablo ningausinga ilunngertulerpok Israelitit pivlugit, tunnilaitalo Hasaelib Siriamiut atanningata agganginut, Benhadadiblo Hasaelib erningata agganginut, innôsingit nâlugit.

⁴ Tagva Joahas tuksiarpok Nâlekamut, Nâlekablo tussarpa; Israelitit okumaiksartitauningat takkogamiuk, Siriamiut atanningata okumaiksartimagit.

⁵ Nâlekablo Israelitit piuliklertemik tunnitsivigivait, tessiortemik tapᴋoninga Siriamiut pitsartuninganit, Israelib ᴋitorngangit iglomingne innekarmiᴋovlugit sivurnganetut.

⁶ Sullele Jerobeamib Israelitinik idluitullititsilauktub iglomiokotingita idluitulliningit allarlaungilait; agvertarpulle tapᴋonane. Nappartullo (Gûdingoataggit) Samariame, tagvanetsainarlaurivut.

⁷ Taipsoma Joahase unnurnersanik amiakoᴋarkolaungimago ablangajunit 50 ginit horsit ᴋângine, kamutinillo aksalloalingnit 10 nit, angutinillo pissuktunit 10,000 dinit. Siriamiut atanningata toᴋolaungmagit, illingatilaukpaillo sanniktitut ᴋakᴋojaksat tullertautilugit sorlo.

⁸ Unipᴋautsit tamakkoa assingit sulle Joahas pivlugo, tamaitalo pinniarlauktangit, pitsartuningalo, ahâk, tamanna aglaksimavok Israelitit atanningita aglangine.

⁹ Joahaselo sinnisilerpok, atâtagijaminut ailune, illijartortauvorlo Samariame. Erningalo Joase atanningorpok innangêrlugo.

¹⁰ Joasib Judakut atanningata Jâringita 37 ingane, Joas, Joahasib erninga atanningorpok Israelitinut Samariame, attaniotilunelo Jârit 16 it nâlugit;

¹¹ Pinniarporlo Nâlekab idluigijanginik, Jerobeamiblo, Nebatib erningata Israelitinik idluitullititsilauktub idluitulliningit allarlaungilait, agvertarporle tapᴋonane.

¹² Unipᴋautsillo assingit sulle Joas pivlugo, pinniarlauktangillo, pitsartuningalo, ᴋanok Amazia Judakut atanningat sorsugvigilaungmago; ahâk, tamanna aglaksimavok Israelitit atanningita aglangine.

¹³ Joaselo sinnisilerpok atâtagijaminut ailune. Jerobeamelo ingipok iksivautanganut. Joasele illijartortauvok Samariame Israelitit atanninginut.

¹⁴ Elisale ᴋanimalerpok, ᴋanimaserme toᴋojutigijamine. Joasiblo Israelitit atanningata attersarvigiva, kugviorlunelo sângane oᴋarlunelo: Atâtâk, atâtâk! Israelitit aksalloalikotingit, ablangajoᴋotingallo horsine!

¹⁵ Elisable oᴋautiva: Tigusilerit pittiksemik, kargjutiniglo. Tigusivorlo pittiksemik kargjutiniglo.

¹⁶ Tamnalo oᴋarpok Israelitit atanninganut: Aggangnut pittikse kelluleruk; kelluvâlo aggangminut. Elisablo aggane illivait atanniub aggangita ᴋânginut,

¹⁷ Oᴋarlunelo: igalâk unnunga sangmijok angmaruk. Tapsomalo angmarpa. Elisalo oᴋarpok: Pittikserit; tamnalo pittikserpok. Elisale oᴋarpok: Kargjut attausek sâlaᴋarnartok Nâlekamit; kargjut attausek piulijaunartok Siriamiut akkerartorlugit; igvillo Siriamiut ullimarniarpattit Afekeme, nungutaukârtinagit.

¹⁸ Oᴋarporlo: Kargjutit tigukit. Tapsomalo tiguvait. Tamnalo oᴋarpok Israelitit atanninganut: Nuna annauleruk. Annaulerpâlo pingasuêrtorlune, noᴋarlunelo.

¹⁹ Tagva Gûdib anguteᴋotingata ningarilerpâ, oᴋarlunelo: Tallimêrtorlutit pingasojortoêrtorlutillonêt annaulernilauruvit, tagva Siriamiut sâlaginiarajarpattit nungutaukârtinagit, mannâle pingasuêrtorlutit salaginiarpattit.

²⁰ Elisale toᴋovok, illijartortaulunelo. Moabiterillo sorsuktuksangit ittâvut nunamut Jâreme taipsomane.

²¹ Pijoᴋalaukporlo, angut illijartormatsuk, sorsuktuksalle takkungmattigik, angut tamna egipât Elisab illuvinganut. Tamnalo unnungarame, Elisablo sauningit âktoramigit, omârpok tullerarlunelo ittikaminut.

²² Hasaelible Siriamiut atanningata Israelitit okumaiksartilaukpait Joahasib innôsingane tamât.

²³ Nâlekable saimarvigivait napkigilaitalo, sâlugillo, angersimanine Abrahamut, Isaangmullo, Jakomullo pivlugo, asseroromalaungilaillo, ajaktorlaungilaillo kênaminit manna tikkilugo.

²⁴ Hasaelelo Siriamiut atanningat toᴋovok, erningalo Benhadad atanningorpok innangêrdlugo.

²⁵ Tagva Joasib Joahasib erningata iglugasaksuit tigulerivait Benhadadib, Hasaelib erningata agganginit, taipsoma tigulauktangit Joahasib atâtame agganginit unnatadlarnerme. Pingasuêrtorlune Joasib sâlagiva Israelitillo iglugasaksoagilauktangit sattortautipait.