II Atannit 12 - Labrador Inuttitut Heritage Bible

Joasib atanniub Judame atanniotininga.

¹ Jehub Jâringita 7 ingane Joase atanningorpok, atanniotilunelo Jârit 40 git nâlugit Jerusaleme. Anânanga attekalaukpok Zibeamik, Bersabamioviniôjok.

² Joaselo pinniarlaukpok idluartomik, Nâlekablo kuviagijanganik, taimak akkunêrtigijomik, ajochertortautillugo ajochertuijomut Jojadamut;

³ Kisiane pôktojut pêjartaulaungilet; innugiartoksuille tunnergutinik tunnijivut, isserluanititsilutiglo sulle poktôjune.

⁴ Joaselo oᴋarpok ajochertuijunut: Kênaujat ilunnaita ivsornaititaulertut, ittertitaujut Nâlekab iglunganut, kênaujat attortauvaktut, kênaujat ilunnatik attunît tunnijariakartangit tarnitik pivlugit, kênaujallo ilunnaita, nalliata tunnijangit perkojaunane omamut kunutuitomut Nâlekab iglunganut,

⁵ Tamakkoa ajochertuijut tigujaksarivait ingmingnut, attunît illitarijamingnit. Tamakkonangat âkiksoraksarivait sujuksimanerit Nâlekab iglungane, sujuksimanerit ilunnaita nachvartaulertut tagvane.

⁶ Ajochertuijullo atanniub Joasib Jâringita 23 ingane sujuksimanerit iglome akiksortaukolaungimattigik;

⁷ Atanniub Joasib ajochertuijok Jojada ᴋaiᴋova, ajochertuijullo assingit, oᴋautivaillo: Sôg sujuksimanerit iglome âkiksorlungipissigik? Mannalo kênaujat tigusijaksaringilase illitarijapsingnit, tunnijaksarilaukpassele iglub sujuksimaninginut.

⁸ Tagva ajochertuijut angerput tigusijungnairomavlutik kênaujanik innugiartoksoarnit, sujuksimanerillo iglome âkiksornagit.

⁹ Tagva ajochertuijub Jojadab iklervik tiguva, puttorlugolo ᴋilakartipa ᴋânga, illilâlo Altarib sennianut tallerpianut Nâlekab iglungata ittertauviata sennianut. Ajochertuijullo upkoamik udsertortut, takkamunga pititsivut kênaujanik ilunnainik, Nâlekab iglunganut ᴋaitaumajunik.

¹⁰ Takkopattalo kênaujakadlarmat iklervingme, tagva atanniub aglapaktokotinga, ajochertuijoksoarlo majorarlutik tikkilerpuk, pôlerlugillo, kittipaillo kênaujat naipitaujut Nâlekab iglungane.

¹¹ Kênaujalle kittitaumajut tunnivait sennajut sullijaksamik tamattominga, perkojaumajut aulatsiᴋovlugit Nâlekab iglunganik agganginut; tapᴋoalo tunnivait igloliortunut sennajunullo Nâlekab iglungane,

¹² Tagva karmaliortunut, ujarᴋaniglo ullimârtunut, kejuniglo ujarᴋaniglo ullimarsimajunik pissiniartunut, sujuksimanerit Nâlekab iglungane akiksortauᴋovlugit, tamaitalo nachvartangit akiktaujariakartut Nâlekab iglungane.

¹³ Sennakojilungilelle kênaujanit ᴋaitaumajunit Nâlekab iglunganut, itteringujanik Silberinik, savingniglo, pogutaniglo tiptulautiniglo, illulerkutillonêt nallianik Goldeôjomik Silbereôjomiglonêt;

¹⁴ Tapᴋoale sullijaksamik sennajut tunnitsiviovut tamattominga, akiksoiᴋovlugit sujuksimanernik Nâlekab iglungane.

¹⁵ Angutille tunnitsiviojut agganginut kênaujanik tunnijiᴋovlugit taipkonunga sennajunut, apperijaulaungilet kingorngane tapᴋoa pivlugit; nertornarlutik pinniarmatta.

¹⁶ Kênaujalle tunnergutinit akkiliksêrutiksanit, tunnergutanillo ajortoêrutiksanit, Nâlekab iglunganut âtaulungilet, ajochertuijunut illingangmatta.

¹⁷ Nalliutome taipsomane Hasael Siriamiut atanningat majorarpok, Gathelo sorsugvigivait, sâlagilaitalo. Hasaeliblo kênane sâtipa majoraromavlune Jerusalemut;

¹⁸ Tagva Joasib Judakut atanningata ivsornaititaumajut taimaita tiguvait, atâtagijame Josafatib, Joramiblo, Ahasjablo Judakut atanningita ivsornaitilauktangit, Goldelo tamât nachvartaumajok Nâlekab iglungata perkutitalingane, tillikliutivaillo Hasaelemut Siriamiut atanninganut, tagva aularpok Jerusalemit.

¹⁹ Unipᴋautsillo tamakkoa assingit Joase pivlugo, pinniarningillo tamaita, tamanna aglaksimavok Judakut atanningita aglangine.

²⁰ Kivgangillo pikablavut, angerᴋattigêngnekartitsivullo, annaulerpâllo Millob iglungane unnunga sangmijome Silamut.

²¹ Josabarib Simeatib erningata, Josabadiblo Somerib erningata annaulerlugo toᴋopâk. Illijartortauvorlo atâtagijaminut Davidib iglugasaksoangine. Amazialo erninga atanningorpok innangêrlugo.