II Atannit 11 - Labrador Inuttitut Heritage Bible

Athaljab pinniarlungningit. Joasib atanningortitauninga Judakunut. Athaljab toᴋotauninga.

¹ Athaljale Ahasjab anânanga, takkogame ernine toᴋungmat, parngnailerpok, toᴋotsilunelo atanniub kinguvânginik ilunnainik.

² Josebable atanniub Joramib panningata Ahasjab najangata tiguva Joase, Ahasjab erninga, tiglikpâlo atanniub ᴋitornganginit toᴋotaujunit pairijinga aiparilugo innime sinnigvingme; ijerpâlo Athalja pivlugo, toᴋotaukonnago;

³ Ijertaumalaukporlo tamna (pairijine) aiparillugo Jârit 6 it nâlugit. Athaljale atanniolaukpok nuname.

⁴ Jârille 7 ingane Jojada tilliklerpok, angajoᴋajallo 100 dinut, kappitallo sorsuktuksallo ilagillugit tiguvait, itterkolugillo tapsomunga Nâlekab iglunganut, angerᴋattigivaillo, angermarikovaillo Nâlekab iglungane, atanniublo erninga takkojautipa tapᴋonunga,

⁵ Perkolugillo oᴋalarmelo: Tamannauvok piniaraksase: Illipse pingasoliluse, pingajuise attautsit nangeriartortuksauvut Sabbatib uvlungane, udsertortuksauvlutiglo atanniub iglungane;

⁶ Pingajuiselo attautsit, itterviksoarmêtuksauvut Suremik atelingme, pingajuiselo attautsit itterviksoarme sorsuktuksat tunnuanetome, taimaglo iglo udsertorsiuk, agviarluselo.

⁷ Pingajuisele maggoit, Sabbateme nûlertose, udsertortuksauvose Nâlekab iglungane atanniub avatâne;

⁸ Illumajaksarivasse, attunît sakkokotipsingnik tigumiarluse aggapsingnut; kinalo kerdlerotijok siaktut akkorngatigut tamna toᴋotaujuksauvok; atannermeleritselo annileraikpat itteraikpallo.

⁹ Angajoᴋajallo 100 dinut pinniarput tamainik, sorlo Jojadab ajochertuijub perkungmagit, pitipaillo attunît ingmingnut anguteᴋotitik, Sabbateme tikkitut, Sabbatemelo nûlertut, tikkilutiglo ajochertuijomut Jojadamut.

¹⁰ Ajochertuijublo angajoᴋait tunnitsivigivait kallugiarnik, sappulutaniglo, atanniub Davidib pigilauktanginik, Nâlekablo iglunganetunik.

¹¹ Sorsuktuksallo nangerput atanniub avatâne, attunît sakkomingnik tigumiarlutik, iglub sennerangata tallerpianit, iglub senerangata saumia tikkidlugo, Altaremelo, iglomelo.

¹² Tapsomalo atanniub erninga annitipa; niaᴋoserpâlo, perkojaniglo tunnitsivigiva, attaningortipâlo, mingoarlâlo aggatiglo pattiktipait nipliarlutiglo: Atannek innôle!

¹³ Athaljablo sorsuktuksat, innugiartoksuillo nipliarningit tussaramigit, tikkilerpok innugiartoksoarnut Nâlekab iglunganut.

¹⁴ Takkosarlunelo, ahâglo, atannek nangerpok nappajome, sorlo illusiovalaungmat, angajoᴋaunerôjullo tiptulausijartullo atannek nangerᴋattigivât, nunablo innungiartoksoangit ilunnatik kuviasudlalaukput, tiptulausijarlutiglo. Athaljable annorane allikpait nipliarlunelo: Pikkablojoksônek, pikkablajoksônek!

¹⁵ Ajochertuijuble Jojadab angajoᴋajat 100 dinut sorsuktuksanut angajoᴋangortitaumajut perkovait, oᴋautilugillo: Annitisiuk siaktut akkornganut, malliktorlo tapsominga toᴋosiuk saviksoarmut. Ajochertuijok oᴋalaungmat: Toᴋotauniarane Nâlekab iglungane.

¹⁶ Aggatiglo illivait tapsomunga; aivorlo apᴋosinerme horsit aivigivaktangine atanniub iglunganut, toᴋotauvorlo tagvane.

¹⁷ Jodadalo angerᴋattigêngnekartitsivok Nâlekab atanniublo innugiartoksuillo akkorngane, Nâlekab inuᴋotigijaksaringmagit; taimaktauk atanniub innugiartoksuillo akkorngane.

¹⁸ Tagva nunab innugiartoksoangit ilunnamassiatik itterput Baalib ᴋattimavinganut, imitipâllo Altarekotingit, Gûdingoakotingillo serᴋomipait; Matthanelo Baalib ajochertuijoᴋotinga toᴋopât Altarit sângine. Ajochertuijorlo udsertortoᴋartitsivok Nâlekab iglungane.

¹⁹ Tiguvaillo angajoᴋat 100 dinut. kappitallo, sorsuktuksallo, nunablo innugiartoksoangit ilunnaita, atannerlo attersartipât Nâlekab iglunganit, tikkilutiglo apᴋosinerme, sorsuktuksat itterviksoanganit pijome, atanniub iglunganut; ingiporlo atanniub iksivautaksoanganut.

²⁰ Innugiartoksuillo nuname ilunnamassiatik kuviasudlalaukput, iglugasaksuillo innilangalaukput. Athaljale toᴋopât saviksoarmut atanniub iglungane.

²¹ Joaselo Jârekalaukpok 7 nik atanningorame.