II Atannit 10 - Labrador Inuttitut Heritage Bible

Ahabib kinguvangita. Baaliblo kivgangita nungutauningit. Jehublo toᴋunga.

¹ Ahabelo ernekalaukpok 70 ginik Samariame. Jehulo aglangnik aglakpok, tillikliutivaillo Samariamut, iglugasaksuit Jesreelib angajoᴋanginut, angajoᴋaunerôjunut Ahabiblo ᴋitorngangita pairijinginut, tapᴋoa imâk oᴋarput:

² Aglait ukkoa illipsingnut tikkipatta, najortekarapse angajoᴋapse erninginik, kamutinginiglo, horsekotinginiglo, iglugasaksoarniglo sôngojunik, sakkuniglo.

³ Tagva takkungiarsiuk namanerpâk, pikkaringnerpâglo angajoᴋapse erninginit, pitisiuglo angajoᴋapse iksivautaksoanganut, angajoᴋapselo iglomiokotingit sorsugutisigik.

⁴ Taipkoale sivoradlarput, oᴋarlutiglo: Ahâk, atannîk magguk nangerungnarlaungilâk sângane, ᴋanok uvagut tagva nangeromavita?

⁵ Iglublo iglugasaksuillo angajoᴋangit, pairksijullo tilliklerput Jehumut, oᴋautsaukovâllo: Kivgauvogut illingnut, tamainik pinniaromavogut oᴋauserijarnik uvaptingnut; uvagut atanningortitsijomangilagut kinamik; pinnialaurit namagijarnik.

⁶ Tagva aglait aipainginik aglagvigivait, imâk oᴋartunik: Ilagigupsinga, nippigalo nâlekupsiuk, tagva angajoᴋapse erningita niakungit tigulersigik, ᴋailugillo uvamnut, ᴋaupat nalliutome tamattomane, Jesreelemut, (Atanniuble erningit, angutaulaukput 70 git. Iglugasaksuillo angajoᴋaunerungita nullasavait.)

⁷ Aglait tapᴋoa manna tapᴋonunga tikkimatta, tiguvait atanniub erningit, toᴋopaillo angutit 70 git, niakungillo illivait amargaujanut, tillikliutivaillo tapsomunga Jesreelemut.

⁸ Tillijarlo tikkipok nallojungnaitilâlo, oᴋarlunelo: Atanniub erningita niakungit âlaukpait ovunga. Tamna oᴋarpok: Illisigik, maggoililugit kallerêktisigik, itterviksub upkoangata sângane ᴋaupemut.

⁹ Uvlakullo annigame, nangeriartorpok tagvunga, oᴋarlunelo innugiartoksoarnut ilunnainut: Illipse idluartovose. Ahâk uvanga angerᴋattigêngnekartitsilaukpunga angajoᴋara akkerartorlugo, toᴋolaukparalo; kiale ukkoa ullimarlaukagit?

¹⁰ Tagva illitarksileritse Gûdib oᴋausingita oᴋauserilauktangita Ahabe pivlugo ilangallonêt kattaksimangimat nunamut; Nâlegarlo pinniarlaukpok, sorlo oᴋalaurame kivgamigut Eliakut.

¹¹ Jehublo amiakojut Ahabekunit Jesreeleme ilunnaita ullimarpait, angajoᴋakotingit ilunnaita, ilangillo, ajochertuijoᴋotingillo, amiakoᴋakonago attautsemiglonêt.

¹² Parngnailerporlo, aularlunelo tikkilarmelo Samariamut. Apᴋosiniublo senniane igloᴋalaukpok mianersijunut illingajomik.

¹³ Tagvane Jehub Ahasjab Judakut atanningata kattangutingit naipipait, oᴋarlunelo: Kikovise? Tapᴋoa oᴋarput: Ahasjab kattangutigivâtigut, attersarpogullo atanniub ᴋitorngangit, atanniublo nulliangata ᴋitorngangit sallutitsomavlugit.

¹⁴ Tamnâle oᴋarpok: Tigusigik innôtillugit. Tiguvaillo innôtillugit, toᴋopaillo immertarvingme mianersijut iglungata sennianetome, angutit 42 git, amiakoᴋarkojilungilarlo tapᴋonangat attautsemiglonêt.

¹⁵ Tagvangallo sivumuarpok, naipipalo Jonada Rechabib erninga, pârsijok tapsominga; salutipâlo oᴋautilâlo: Omattit nallagôrka, sorlo omattiga illingangmat omatingnut? Jonada oᴋarpok: Ahaila. Taimaipat tagva aggaktit tunnikit uvamnut. Agganelo tunnivait tapsomunga. Ikkikovâlo ingminut aksalloalingnut;

¹⁶ Oᴋarlunelo: Aiparilaunga takkolutillo ilunngertornimnik Nâlegak pivlugo. Taimaglo kemuksiutitaukova ilagilugo kammutekotimine.

¹⁷ Samariamullo tikkiname Ahabekut amiakungit Samariame ilunnaita ullimârpait nungumariktitsikârtinane tapᴋoninga, Nâlekab oᴋausingit, oᴋauserilauktangit Eliamut, malliklugit.

¹⁸ Jehublo innugiartoksuit ilunnaita ᴋattikovait, oᴋautsaukolaitalo: Ahabib Baal kêtatuinarmik kivgartorlaukpa, Jehub namanersamik kivgartoromavâ.

¹⁹ Mannalo Baalib nallautaijoᴋotingit ilunnaita, kivgakotingillo ilunnaita, ajochertuijoᴋotingillo ilunnaita ᴋaiᴋosigik uvamnut, tikkitailijoᴋarniarane; tunijijariakarama Baalemut tunnergutiksamik angijomik. Tikkitailijok innôjuksaungilak. Jehule taimailiorpok pingitsertorlune Baalib kivgangit toᴋotsomavlugit.

²⁰ Jehulo oᴋarpok: Baalib uvloksiorvinga ivsornaitisiuk, akpautigijaukosiuglo.

²¹ Jehulo tilliklerpok Israelitinut ilunnainut, tikkerkojilunelo Baalib kivganginik ilunnainik, amiakoᴋalungimat attautsemiglonêt tikkilaungitomik. Tikkipullo Baalib iglunganut, Baaliblo iglunga tattamalaukpok issuanit issuanut, aipânut.

²² Oᴋarporlo pimaklertunut iglomik annorâktalingmik: Baalib kivgangit ilunnaita annitsivigisigik annorângnik. Annorângniglo ᴋaitsivut tapᴋonunga.

²³ Jehublo Jonada Rechabib erninga itterᴋattigiva Baalib ᴋattimavinganut, oᴋarlunelo Baalib kivganginut: Nautsertoleritse takkoluselo mâne pittaᴋangimangat akkonapsingne Nâlekab kivgangita nallianik, Baalible kivganginik kisênik.

²⁴ Itterpullo tunnergutinik, tunnergutiniglo otaksanik tunnijijomavlutik. Jehuble silatâne angutit 80 git perkolaukpait, oᴋalauklunelo: Angutit tapᴋoa aggapsingnut tunnijama nalliat ᴋemâkpat, tagva innôsise akkiksaujuksauvut, tapsoma innôsingata inningane.

²⁵ Tunnergutiksarlo ôtaksak tunijaulerêrmat, Jehu sorsuktuksanut angajoᴋangnullo oᴋarpok: Itteritse, ullimarlugillo ilunnaita, nalliallonêt annitailitisiuk. Ullimârpaillo saviksub kênanganut. Sorsuktuksello angajoᴋaillo egipait silamut, ailutiglo iglugasaksoarnut Baalib ᴋattimavingata najugânut,

²⁶ Annipaillo nappajut Baalib ᴋattimavingata illuanit, ikkilaitalo.

²⁷ Baaliblo nappajunga, ᴋattimavinga ilaliudlugo serᴋomipât, annagvingortipâllo uvlok tamanna tikkilugo.

²⁸ Taimak Jehub Baale pêjarpa Israelemit.

²⁹ Jerobeamible Nebatib erningata, Israelitinik idluitullititsilauktub, idluiningit, tagva nochangoâk Goldik Betheleme Danemelo allarlungilak.

³⁰ Nâlegarlo Jehumut oᴋarpok: Tamanna pivlugo kunnutuilauravit, pinniarlutit namagijamnik, Ahabekunelo pinnialauravit tamainik, omattimnelauktunik, iksivajoᴋartuksauvotit Israelitit iksivautaksoangane ᴋitorngakotingnit, kinguvarêt sittamangat tikkidlugit.

³¹ Jehuble kamagingila Nâlekab Israelib Gûdingata perkojangit malliklugit agvertarlune omamut tamâmut; Jerobeamib Israelitinik idluitullititsilauktub idluiningit allârlungimagit.

³² Nalliutome taipsomane Nâlegak pigiarpok Israelitit ilangerlugit; Hasaeliblo sâlagivait Israelitit kiglilervingine ilunnaine,

³³ Jordanemit sekkerngub nuijarviata nallânut, nuna Gileademik atelik ilunnât, Gadekullo nunangat, Rubenekullo nunangat, Manassekullo nunangat, Aroeremit ᴋongmêtomit Arnonib ᴋanitanganêtomit, Gileadelo Basanelo.

³⁴ Unipᴋautsit makkoa assingit Jehu pivlugo, pinniarlauktangit, sôngoningalo tamât, ahâk, tamanna aglaksimavok Israelitit atanningita aglangine.

³⁵ Jehulo sinnisilerpok atâtagijaminut ailune, illijartorpâllo Samariame. Erningalo Joahas âttanningorpok innangêrlugo.

³⁶ Jehuble atanniotivinga Israelitinut Samariame, Jâreôvut 28 git.