III Johannesib 1 - Labrador Inuttitut Heritage Bible

Gajusib piloringninga oᴋautigijauvoᴋ.

¹ Angajoᴋaunerôjok Gajusemut naglingnartomut; tâmna nagligijara mikseᴋârnerme.

² Naglingnartotit ômât! ilûnâne inôtsiarᴋovagit atsuilerᴋolutillo, sorlotauᴋ tarnikut ᴋanoenginavit.

³ Angijomigle ᴋuviasûteᴋalauᴋpunga, ᴋatangutit tikinamik, mikseᴋârnît oᴋautigingmatsuk, mikseᴋârnerme inôgavit.

⁴ Anginersamik ᴋuviasûteᴋangilanga mattomangat, tussarangama ᴋitorngamnik mikseᴋârnerme inôjunik.

⁵ Naglingnartotit ômât! ᴋatangutigênut tujormianullo iliornît, nertornartomik pivotit.

⁶ Tâpkoa naglingnît oᴋautigilauᴋpât illagênut. Idluartomik pivotit, taᴋoaksaᴋartilaurangne, Gûdib nâmagijanga maliklugo.

⁷ Tâpsoma attinga pivlugo aulalaungmatta, nalojunillo sumiglônêt tigusilaungilat.

⁸ Taimautunik tagva pitsiarniktuksauvogut, ikajorteolerᴋovluat mikseᴋârnermut.

⁹ Illagêt aglagvigilauralloarpakka, Diotrefesible angajoᴋaujomajub tâpkonane, illaliungilâtigut.

¹⁰ Taimaimat tikikuma, piniarninganik iliorninganiglo erᴋaititsomârpara, oᴋâlagalâdlalarmelo mamaitunik oᴋauteᴋarmat uvaptingnik; taimaituinanginivoᴋ: ᴋatangutit nangmineᴋ illaliungilait, illalioromajulletauᴋ inerterpait, illagêktunillo pingudlarlugit.

¹¹ Naglingnartotit ômât! ajorneᴋ malingniarnago pît ajunginerle. Ajungitulijoᴋ Gûdemit pivoᴋ, idluitulijub Gûde takungilâ.

¹² Demêtriuse (ajungitomik) oᴋautigijauvoᴋ tamainut, mikseᴋârnermullo nangmineᴋ; uvagullotauᴋ kigligiutsigivogut, ilipselo ᴋaujimavose, kigligiutsinivut okpernarmat.

¹³ Unuktunik aglagutiksaᴋaralloartunga; aglagvigijomangilagille aglaumut sullungmullo.

¹⁴ Nerriukpungale takojomavlutit mânakut, tagva ᴋanikut oᴋaᴋatigêngniarpoguk.

¹⁵ Ullapirsautib illagilitit! Illanârijapta salutipâtit. Salutikit illanârijavut, atingit taivlugit.