Idluarsaijut 9 - Labrador Inuttitut Heritage Bible

Abimeleche nangminênarasuarlune ataningortipok Israelitinut, naggateᴋarporle kappianartomik.

¹ Abimelechele Jerub-Baalib erninga aivok Sichemut, anâname anninginut, tapkoalo anânamelo atâtangata iglomioᴋotingita abvakungit ilûnaita oᴋarᴋattigivait, oᴋarlunelo:

² Nagliktakka, angutit Sichemiut ilûnatik siutingita sângine oᴋaritse: Suna nekkornersauva illipsingnut, angutit 70 git, ilûnatik ᴋitorngaujut Jerub-Baalemut, Nâlegaupatta illipsingnut, ubvalo angut atausek Nâlegaukpat illipsingnut? Erᴋaikasiudjileritsetauk sauneᴋattigilungalo uvineᴋattigigapsinga.

³ Tagva anânangata anningita oᴋautsit tamakkoa tamaita tapsomangat oᴋauserivait, angutit Sichemetut siutingita sângine; omattingillo mannilerput Abimelechemut, isumagamik: ᴋatangutigivavut.

⁴ Tunnitsivigivâllo Silberlinginik 70 ginik, Baal-Beritib iglunganit, Abimelechiblo tamakkonunga angutit uivêtut kuksâlaitullo pissiarivait malliktut tapsominga.

⁵ Tikkilunelo atâtame iglunganut Oframut, toᴋotsilunelo ᴋatangutiminik Jerub-Baalib ᴋitornganginik, angutinik 70 ginik ujarᴋame (atautseme). Amiaᴋovorle Jerub-Baalib erningita nuᴋardlerpângat, ijersimalaungmat.

⁶ Sichemiullo angutingit ilûnatik katimalerput, Milloblo iglomiokotingit ilûnatik, ailutiglo ataningortipâllo Abimeleche Eicheme poktojome Sicheme nappajome.

⁷ Tamânna oᴋautigijaulaungmat Jotamemut, aivok nangeriartorlunelo ᴋakᴋab Grisimib kôtsiktoninganut, nippinelo kagvarpa, ᴋaigarsuklunelo oᴋarpok tapkonunga: Tussarsinga angutiojose Sicheme, Gûde tussarᴋovlugotauk illipsingnik:

⁸ Nappartut ailaukput ataneᴋartitsijomavlutik mingoarlugo ingmingnut, oᴋarlutiglo nappartomut orksulingmut: Ataniolerit uvaptingnut.

⁹ Nappartuble orksuliub kiolune oᴋautivait: Orksuᴋarnera Gûdinut inungnullo nertortaujok uvamne, sapkotaksarivigo, ailungalo, ᴋollangiarᴋovlunga nappartut ᴋângine?

¹⁰ Tagva nappartut nappartomut Feigelingmut oᴋarput: Igvit ᴋailerit ataniolutillo uvaptingnut.

¹¹ Nappartuble Feigeliub oᴋautivait: Mamarnera paungakkalo ânanât sapkotaksarivakka, ailungalo ᴋollangiarᴋovlunga nappartut ᴋângine?

¹² Tagva nappartut nappartomut Weineliksamut oᴋarput: Igvit ᴋailutillo ataniolerit uvaptingnut.

¹³ Nappartable Weineliksab oᴋautivait: Iptera sapkotaksarivigo, Gûdinik inungniglo ᴋuviasuktitsijok, ailungalo ᴋollangiarᴋovlunga nappartut ᴋângine?

¹⁴ Tagva nappartut ilûnatik orpingmut kakkilautilingmut oᴋarput: Igvit ᴋailutillo ataniotit uvaptingnut.

¹⁵ Orpiglo kakkilautelik oᴋarpok nappartunut: Taimaimarikpat atanermut mingoarapsinga illipsingnut, tagva ᴋaileritse unertutigiluselo tachamnut; taimaitsomangikupsele tagva ikkoma annilerle orpimit kakkilautelingmit, nungutsilunelo Cederinik Libanonemêtunik.

¹⁶ Idluartomik nallagortomiglo pinnialauᴋise mânna, Abimeleche ataningortilaurapsiuk? Nâmaktomiglo pinnialauᴋise Jerub-Baaleme, iglomioᴋotinginelo; pinniarvigilaukpissiuglo sorlo pivluse pijaksaulaungmat,

¹⁷ Atâtaga pivluse sorsulaungmat, tarninelo egilaungmago, piuliluse Midianiterit agganginit?

¹⁸ Illipselo mânna kippalidlarpose atâtama iglunganut, inuarluselo ᴋitornganginik, angutinik 70 ginik ujarᴋame atautseme; ataningortitsiluselo Abimelechemik, kivgangata erninganik, angutinut Sichemetunut, ᴋatangutigigapsiuk.

¹⁹ Mânna idluartomik nallagortomiglo pinnialaurupse Jerub-Baaleme iglunganelo uvlorme tamattomane, tagva Abimeleche ᴋuviasutigisiuk, tapsomalo ᴋuviasutigilise.

²⁰ Taimaingipalle ikkoma annilerle Abimelechemit, nungutsilunelo angutinik Sichemiunik, Milloblo iglomiokotinginik, ikkomalo annilerletauk angutinit Sichemiunit, Milloblo iglomioᴋotinginit nungutsilunelo Abimelechemik.

²¹ Jothamelo ᴋemâvok nûlunelo, ailunelo Beremut, nunaᴋalunelo tagvane, erksinermut angajuminik Abimelechemik.

²² Abimelechelo mânna jârinik pingasunik ataniotijarêrlaungmat Israelitinut,

²³ Gûde tilliklerpok pijomanermik idluitomik Abimelechiblo angutillo Sichemiut akkornganut. Angutille Sichemiut Abimeleche Nâlegungnailerpât;

²⁴ Issumagilugolo idluitullinek pilauktok Jerub-Baalib erninginut 70 ginut, tapkoalo aungat illivât Abimelechemut ᴋatangutinganut, toᴋotsilauktomut tapkoninga, angutinullo Sichemiunut agganginik pitsartutitsilauktunut tamattomunga, ᴋatangutiminik toᴋotsiᴋovlugo.

²⁵ Angutillo Sicheme terliarsijunik tilliklerlaukput ᴋakᴋat ᴋânganut, arktaivigivaillo ilûnaita apkosinerme ingergarasuarlauktut tapkonunga. Abimelechelo oᴋautsaulaukpok tamattominga.

²⁶ Gaalele Ebedib erninga ᴋatangutingillo tikkiput, itterlutiglo Sichemut. Angutillo Sichemiut sungertutigivât.

²⁷ Annilaukpullo perôrsêvingmut, pejailutiglo Paungaᴋotimingnik Weineliksanik, iptêjailutiglo, okigêserlutiglo, ailarmiglo Gûdimik iglunganut, nerilutiglo immerlarmiglo, oᴋarnerlutigivâllo Abimeleche,

²⁸ Gaalelo Ebedib erninga oᴋarpok: Kinauva Abimeleche? Sunauvâlo Sicheme, kivgartoraksarigaptigo? Jerub-Baalib Erneringiᴋaûk? Sebulelo kivgane pitilaukpa avunga angajoᴋangortilugo Hemorib Sichemib atâtangata inuᴋotinginut. Suna pivlugo kivgartoraksarivittigo?

²⁹ Gûdelo pijomale inugasaksuit aggamnênajarninginik, singitsiᴋovlunga Abimelechemik. Abimelechelo oᴋautsauvok: Sorsuktuksaᴋotitit unnurnersautikit aularlutillo.

³⁰ Sebulele iglugasaksuit angajoᴋangat tussarame Gaalib Ebedib erningata oᴋausinginik, ilûngertudlalerpok ningarnermut.

³¹ Tilliklerlunelo angigutsivlune akpartuksanik Abimelechemut, oᴋautsauᴋovâlo: Ahâk, Gaal Ebedib erninga ᴋatangutingillo tikkisimavut Sichemut, akkerartortipaillo iglugasaksoarmiut illingnut.

³² Tagva parngnailerit mânna unnuarme, igvit inuᴋotitillo illingnêtut, terliarsivingmiglo âkᴋiksoilerit perorsêvingme,

³³ Uvlarmelo seᴋinek nuilerpat annijajolerit opingârlugillo iglugasaksuit. Tamnalo tagva, inugasaksuillo tapsomanêtut anniniarpatta illingnut, tagva pinniarvigiuk aggakpît pijungnarningititut.

³⁴ Abimeleche makkipok unnuarme, inugasaksuillo tapsomanêlauktut ilûnatik, torarlunelo Sichemut, katimgajunut sitamainut.

³⁵ Gaalelo Ebedib erninga annivok, nangeriartorlunelo upkoab iglugasaksuit itterviksoangata sânganut. Abimelechele annilerpok terliarsivingmit, inugasaksuit ilagilugit.

³⁶ Gaaliblo mânna inugasaksuit takogamigit, oᴋarpok Sebulemut: Ahâk inugasaksuit attersarput ᴋakᴋab kôtsiktoninganit. Sebulible oᴋautiva: ᴋakᴋat tachangit inunasugivattit.

³⁷ Gaalelo unnurnersanik oᴋauseᴋalaukpok sulle, oᴋarlunelo: Ahâk inugasaksuit, nunab ᴋerᴋanit attersarput, katimgajulle atautsit aggerput apᴋosinerme Eicheme angakoktorvingme.

³⁸ Tagva Sebulib oᴋautiva: Nanêᴋa mânna ᴋanît, oᴋalauktok: Kinauva Abimeleche, kivgartoraksarigaptigo? Inugasaksoangongilât tapkoa nachogilauktatit? Aularit mânna sorsugvigilugolo.

³⁹ Gaalelo aularpok angutinik Sichemiunik sivorlerlune, sorsugiarlunelo Abimelechemut.

⁴⁰ Abimelechible aijalikpa, ᴋemâtilâlo, unnuktullo ullimarsimajut ochovut itterviksub upkoanga tikkilugo:

⁴¹ Abimelechelo Arumame nokᴋangavok. Sebulible Gaale ᴋatangutingillo ᴋemâtipait Sichemetsungnarᴋonagit.

⁴² ᴋaulermalle inugasaksuit annilerput perorsêvingmut. Abimeleche oᴋautsaulermat tamattominga;

⁴³ Inugasaksuit tiguvait, avitilugillo pingasuilivlugit terliarsijoᴋartitsilunelo tapkoninga perorsêvingme. Takogamelo mânna inuit iglugasaksoarnit anningmatta makkijutigivait, ullimârlugillo.

⁴⁴ Abimelechible, katimgajullo tapsomanêlauktut opingârpait, tikkilutiglo iglugasaksuit upkoaksoanganut; katimgajullo maggoit opingârpait ilûnaita perorsêvingmelauktut, ullimarpaillo.

⁴⁵ Tagva Abimelechib iglugasaksuit sorsugvigivait uvlok tamna nâvlugo, sâlagivaillo, inuillo illuanelauktut toᴋopait, serᴋomilugillo iglugasaksuit, sioraujamiglo ᴋataraivigivait.

⁴⁶ Angutit Sichemib nuvugosektanganelauktut tamattominga tussaramik, tagva itterput Gûdingoab Beritemik atigub iglungata avaluksoanginut.

⁴⁷ Abimelechelo tussarame angutit ilûnatik Sicheme nuvugosermelauktut katimangmatta;

⁴⁸ Aivok ᴋakᴋamut Zalmonemut, inuᴋotine tapsomanelauktut ilûnaita ilagilugit, tigusilunelo ullimaumik aggangminut, nakkatsilunelo akkerkomik nappartunit, kiviklugolo illiva tuiminut, oᴋarlunelo inugasaksoarnut tapsomanêlauktunut: Takojase pinniarnerijara, tamânna illipsetauk pinniarsârsiuk uvaptut.

⁴⁹ Tagva inugasaksuit ilûnatik attunnit akᴋerᴋomik nakkatsilerput malliklutiglo Abimelechemik, illijilutiglo tapkoninga avaluksoarnut, ikkitsilarmiglo ikkomamut, toᴋolaungmattatauk angutit ilûnatik Sichemib nuvugosektanganelauktut, angutit arnallo katilugit 1,000 diôkassait.

⁵⁰ Abimelechele aivok Thebezemut, illulugillo sâlagilaitalo.

⁵¹ Nuvugosekalaukporle songojomik iglugasaksuit ᴋerᴋâne, tagvunga ᴋemâvut angutit arnallo ilûnatik, iglugasaksuillo inungit ilûnatik, tunnumikullo pallangairsivut majoarlutiglo nuvogutsib ᴋânganut.

⁵² Tagva Abimeleche ᴋaivok nuvogusermut sorsugvigivâlo, najutilunelo nuvogutsib upkoanganut, ikkitsomavlugo ikkomamut.

⁵³ Arnalle illangata serᴋallitsiviub ujaraktangata illanga ᴋataktipa Abimelechib niaᴋunganut, makkanganiglo serᴋopjêvigiva.

⁵⁴ Tagva errinesuklune kivgane, sakkunginik akjarsijok, ᴋaikᴋova oᴋautilugolo: Saviksuit amuleruk toᴋolungalo, oᴋautauᴋonanga: Arnab toᴋolaukpa. Tagva kivgangata kappiva, toᴋoᴋovlugo.

⁵⁵ Israelitille ilagijangit takogamik Abimeleche toᴋongmat, ilûnatik attunit aivut nunagijamingnut.

⁵⁶ Taimak Gûdib Abimeleche akkiniarvigiva idluitullinek pivlugo, atâtaminut pinniarnerilauktanga, ᴋatangutiminik 70 ginik toᴋotsilaurame.

⁵⁷ Taimaktauk angutit Sichemiut idluitulliningit taimaita Gûdib akkiniarutigivait niaᴋunginut, tikkitaulutiglo Jothamib Jerub-Baalib erningata ominauteᴋarᴋojininganut.