Idluarsaijut 8 - Labrador Inuttitut Heritage Bible

Midianiterit amiakojut sulle sâlagijauvut, Sebalo Zalmunalo pijauvuk.

¹ Angutillo Efraimemit oᴋautivât: Sôg taimailiorvigilaukpittigut, ᴋaikᴋolaunginaptigut aularlutit unatadlarnermut Midianiterinik? Aivadlarpâllo.

² Tapsomale oᴋautivait: Sunamik pinialaukik mânna piniarnipsetut nalligêktomik? Efraimib nappartungita Weineliksat akkerungat atausek namanersaungilâk Abieserib kattersininginit Weineliksanik ilûnainit?

³ Gûdib Midianiterit angajoᴋaksoagik Orebe Sebelo tunilaukpak aggapsingnut. ᴋanok uvanga taimailiorungnarajalaukik? Taimaitomik oᴋautingmagit ningausingata allarpa.

⁴ Gideonelo Jordanemut pigame ikkârpok, angutit 300 dit ilagijangit ilagilugit, merngortorlaukpullo, udlanilutiglo sulle.

⁵ Inungnullo Suchotemetunut oᴋarpok: Nagliktakka inuit Nâlektikka tunnitsivigisigik ᴋakᴋojat illanginik; merngortormatta, udlaniᴋovlunga Midianiterit atanigingnik Sebamik Zalmunamiglo.

⁶ Angajoᴋajallo Suchoteme oᴋautivât: Sebab Zalmunablo aggangit aggangnejarêrᴋât, katimgajoᴋotitit ᴋakᴋojanik tunnitsivigijaksarigaptigik?

⁷ Gideon oᴋarpok: Atauk, Nâlekab Seba Zalmunalo tunniniarpagik aggamnut, tagva uvinise orpinut kakkilautilingnut sunaᴋajuitomit pijunut ᴋesertutinullo nerᴋersudlartiniarpakka.

⁸ Tagvangallo aularpok Pnuelemut, taimaglotauk oᴋarvigivait. Inuillo Pnueleme akkiorpât Suchotemetutitut.

⁹ Inungnullo Pnueleme oᴋarpok: Ullapirsauteᴋarlunga utterniaruma, nuvugoseksoak una serᴋomitsomavara.

¹⁰ Sebale Zalmunalo ᴋarkoremelaukpuk, katimgajoᴋotingillo ilagilugit, 15,000 dioᴋassait, amiakolauktut katimgajoksoarnit ilûnainit unanemiunit. 120,000 dit saviksoarmik amusijungnarlauktut ochomalaukput.

¹¹ Gideonelo majorarpok apᴋosinekut tuppernik igloᴋarvikut ununga, Nobamut Jagbehamullo, ullimarpaillo katimgajut; terlilaungmatta katimgajut.

¹² Sebalo Zalmunalo ᴋemâvuk; Gideonible udlapait, angulugiglo Midianiterit atanigik Seba Zalmunalo, katimgajullo ilûnaita siamartipait.

¹³ Gideonelo, Joasib erninga, uttermat unatadlarnermit, Seᴋinek nuiᴋârtinago,

¹⁴ Nukapiak anguva Suchotemiunit, apperilugolo; tapsomalo aglagvigiva angajoᴋajanik Suchoteme, angajoᴋaunerojuniglo, angutinik 77 ginik.

¹⁵ Tikkilaukporlo inungnut Suchotemetunut oᴋarlunelo: Ahâk mânêpuk Seba Zalmunalo mittauteᴋarutigilauktâkse uvamnik, oᴋarluselo: Sebablo Zalmunablo aggangit, aggangnêjarêrᴋat, inutitatit merngortortut ᴋakᴋojanik tunnitsivigijaksarigaptigik?

¹⁶ Tiguvaillo iglugasaksuit angajoᴋangit, orpillo kakkilautiggit, ᴋesertutillo, ikpigijautipaillo Suchotemiunut.

¹⁷ Pnueliblo nuvugosektanga serᴋomipa, iglugasaksoarmiullo toᴋopait.

¹⁸ Sebamullo, Zalmunamullo oᴋarpok: Angutit Taboreme toᴋolauktase ᴋanoêtomik tautuᴋalauᴋât? Tapkoa oᴋarpuk: Illiktut ilaukput, ilûnatiglo attunit ânanaulaukput, ataniub ᴋitorngangititut.

¹⁹ Tamnâle oᴋarpok: ᴋatangutaulaukput uvamnut, anânama ernerilaukpait. Sorlo mikseᴋârtomik Nâlegak inôngmat, toᴋonajangilaptik, taipkoa inoᴋolaurupsigik.

²⁰ Ernerminullo erniangoᴋârtomut Jetheremut oᴋarpok: Niᴋovilerit toᴋolugiglo. Nukapiable saviksoane amulaungila, sivoralaurame, nukapiangolaurame sulle.

²¹ Sebale Zalmunalo oᴋarpuk: Igvit nikovitit opaklunuglo; angut illinganermitut pitsartuneᴋarametauk. Taimak Gideon nikovipok, toᴋopaglo Seba Zalmunalo; tigusilunelo mattarêᴋutinik Kamelingita kongesinginêlauktunik,

²² Tagva Israelitit illangit oᴋarput Gideonemut: Nâlegaulerit uvaptingnut, igvit, ernillo ernerpîllo erninga, piulilauraptigut Midianiterit agganginit.

²³ Gideonele oᴋarpok tapkonunga: Nâlegaujomalungitunga illipsingnut, erneralo Nâlegaujuksaunginivok illipsingnut, Nâlegarle Nâlegaujuksauvok illipsingnut.

²⁴ Gideonele oᴋarpok tapkonunga: Atausek tussugivara illipsingnit; ilûnase attunit kaurutit aksarnigarijase tunnisigik uvamnut. Ismaeliteôlaungmatta kauruteᴋalaukput Goldenik.

²⁵ Tapkoa oᴋarput: Tapkoninga tunnitsivigijomavaptigit. Annorâglo issivipât, attunillo kaurutitik aksarnigarilauktatik illivait ᴋânganut.

²⁶ Kaurutillo Goldit, ᴋaikᴋojangita oᴋumainingit, Sekeliolaukput Goldit 1,700 dit, kittikasiutinagit Mattarêᴋutit, ᴋellaumgujallo, annorâllo aupalluktat, Midianiterit ataningita attortangit, Kamelillo kongesermiutingit kittiᴋasiutinagit.

²⁷ Gideonelo ikkiamik sanavok tapkonangat, pitipalo iglugasaksoarminut Oframe. Israelitillo illuêngarlutik ajortullijutigivât tagvane, sinaungajutaulerlunelo Gideonemut iglomiuᴋattinginullo.

²⁸ Taimak Midianiterit mannigotititaulaukput Israelib ᴋitornganginut, niaᴋotiglo kagvarungnailaukpait. Nunalo innilangalaukpok jârinik 40 ginik Gideon inôtillugo.

²⁹ Jerub-Baalo Joasib erninga, aivok igloᴋarlunelo iglomine.

³⁰ Gideonelo erneᴋalaukpok 70 ginik, makkitiminit pilauktunik; unnuktunik nuliaᴋalaurame.

³¹ Panervgakpângalo pigilauktanga Sicheme ernitarilaurivok tapsomunga, tamna Abi Melechemik atserarpa.

³² Gideonelo Joasib erninga kiglimorlune toᴋolerpok, illijartortaulunelo atâtame Joasib illuvingane Oframe, atâtaulauktub Eseriterinut.

³³ Gideonele toᴋojarêrmat, Israelib ᴋitorngangit sangulerput, ajortullilutiglo Baalim malliklugit, Gûdiotipâllo ingminut Baal Berite.

³⁴ Israeliblo ᴋitorngangita Nâlegak Gûditik issumagilaungilât, piulijitik omigijimik illumajimik ilûnatik agganginit.

³⁵ Napkiningnermiglo pinniarlaungilet Jerub Baalib, tagva Gideonib iglomioᴋattinginut, sorlo tamna ajungitunik tamainik pinniarlaungmat Israelitinut.