Idluarsaijut 7 - Labrador Inuttitut Heritage Bible

Gideonib Midianiterit sâlagivait.

¹ Tagva Jerub-Baal, tagva Gideon, uvlârarsukut aularjajovok inugasaksuillo ilagijangit ilûnatik, tangmarlutiglo imertarvingme Harodemik atelingme, taimak Midianiterit katimgajoᴋattigêningit tachanelaungmatta udsertorviub ᴋakᴋarulangita ungatane, naksarme.

² Nâlekable Gideon oᴋautiva: Inuit ilagijattit unuluadlarput, Midianiderit tunnijaksarigapkit agganginut; Israelitit ingminik nertortinajarput akkerartorlunga, oᴋarlutiglo: Aggapta piulilaukpâtigut:

³ Tagva mânna kaggûdlarᴋojilerit inugasaksuit siutingita sângine, oᴋarᴋojilutillo: Illerasuktoᴋarpat, mungungolunelo pijok, utterle nûsarlunelo Gileadib ᴋakᴋanginit. Tagva inuit 22,000 dit utterput, amiakoᴋartuinarlaungmat, 10,000 dinik.

⁴ Nâlegarlo Gideonemut oᴋarpok: Inuit sulle unuluadlarput. Tasiorkit angmut imermut, tagvane oktoromavakka sângne, nalliatalo oᴋautiginiartama illingnut aiparijaksaringmattit, tapsoma aiparijaksarivâtit, nalliatale oᴋautiginiartama aiparijaksaringimattit, tamna illaujuksaungilak.

⁵ Tasiorlaukpaillo inugasaksuit angmut imermut. Nâlegarlo Gideonemut oᴋarpok: Nalliat oᴋaminut alluktok imermik, sorlo kingmek allungmat, tamna ingmigolitiuk; taimaktauk serᴋorsorlune immertok.

⁶ Tagva tapkoa allulauktut aggamingnit ᴋanermut, 300 deôlaukput; inuit asingit ilûnatik serᴋortorlutik imerlaukput.

⁷ Nâlegarlo Gideonemut oᴋarpok: Angutitigut 300 ditigut allulauktutigut piulijomavapse, tunijijomalungalo Midianiterinik aggangnut; inugasaksuille asingit aikᴋokit iniksanginut.

⁸ Inuillo tapkoa nerᴋiksamik taᴋoaksamik naksarput, Tiptulauteᴋotimingniglo. Israelitille asingit aikᴋovait attunit iglogijanginut; tamnâle pitsartutivok angutinut 300 dinut. Midianiterillo katimgajoᴋattigêningit tangmarsimalaukput sakkangane atsiktome naksarme.

⁹ Nâlekablo unuarme taipsomane oᴋautiva: Makkitit attersarlutillo tangmarvingmut: tunimagapkit aggangnut.

¹⁰ Attersariarle erksigigungne, tagva kivgat Pura attersarᴋattigiuk tangmarvingmut,

¹¹ Tussarᴋovlutit oᴋauserijanginik; kingorngane pitsartunelijarlutit attersartuksauvotit tangmarvingmut. Tagva Gideon kivgane Pura aiparilugo attersarpok pigârtut tangmarvingmelauktut ininganut.

¹² Midianiterillo Amaleᴋiterillo unanêmiullo ilûnatik nallalaukput naksarme piglertatitut unuktovaksoatitut; Kamelekotingillo kittiksaulaungilet unumut, siorᴋatitut imarbiub siksanganetutitut.

¹³ Gideonelo tikkitillugo, ahâk tagva tapkoa illangata ilagijane sinektomanermik unipkautiva, oᴋarlunelo: Ahâk sinektomalaukpunga, tautuᴋalaukpunga niaᴋojak Gersteovinek ôsimajok aksakâvok Midianiterit katimgajoᴋotinginut; tikkimallo tuppernut annaunikpok tapkoninga, ochotilugillo pussiktilugillo, ᴋângit alliotilugit, tuppit imiksimangmatta.

¹⁴ Tagva aipanga akkiorpok oᴋarlunelo: Tamânna sunaungilak asianik Gideonib Joasib Israeliteôjub erningata saviksoanganit. Gûdib Midianiterit katimgajoksoangit ilagilugit tunimavait tapsoma agganginut.

¹⁵ Gideonib tamna tussaramiuk sinaktomanermik taimaitomik unipᴋartok, tukkeᴋartitauningalo, pamangavlune tuksiarpok, uttermilunelo Israelitit katimgajunginut, oᴋarlunelo: Parngnaileritse Nâlekab Midianiterit katimgajungit, tunningmagit aggapsingnut.

¹⁶ Angutillo 300 dit tapkoa avikpait pingasuilivlugit attunîllo tunnitsivigivait tiptulautemik agganginut, macharniglo illuleᴋangitunik, nannergoaniglo takᴋamane.

¹⁷ Oᴋautivaillo: Takonârsinga taimailiorluselotauk; ahâglo katimgajut ininganut piguma, piniarniptut taimak piniarivose.

¹⁸ Tiptulaumik tiptulausijauteᴋaruma, ilûnatiglo ilagijakka, tagva illipsetauk tiptulausijartuksauvose, katimgajoksuit ilûnatik avatâtigut oᴋarluselo: Mâne Nâlegak Gideonelo!

¹⁹ Taimak Gideon, angutillo 100 dit ilagilugit tikkipok katimgajoksuit inninganut, udsertortut sivorlinginut, udsertorᴋojaujunut tuppaktilugillo tiptulausijarlutiglo, machaillo aggamingnetut serᴋomipait.

²⁰ Taimak katimgajut pingasuit ilûnatik tiptulausijarput machaillo serᴋomilugit pivut. Nannergoalle tigumiarpait aggangmingnut saumingminut, tiptulautillo aggangmingnut tallerpingmingnut, tiptulausijarlutik kaggûdlarlutiglo: Mâne Nâlekab saviksoanga Gideoniblo!

²¹ Attunîllo inimingne nangerput katimgajoksuit avatâne. Tagva katimgajoksuit ilûnamasiatik akpangertitaulaukput, kaggûdlarlutiglo ᴋemâvut.

²² Angutillo 300 dit tiptulausijartillugit, Nâlegak pititsivok katimgajune ilûnaine attunît illangata saviksoanga torartitaungmat illaminut. Katimgajoksuillo ᴋemâvut Beth-Sitta-Zeratamut tikkilutik, Abel-Meholablo Tabathemetub kiglilervia tikkilugo.

²³ Angutillo Israelitit Nafthalikunit, Asserekunillo, Mânnassekunillo ilûnainit, kaggûdlarlutik Midianiterit udlapait.

²⁴ Gideonelo akpartitsijunik tilliklerpok Efraimib ᴋakᴋanginut ilûnainut, oᴋarkojilunelo: Attersaritse Midianiterit pachrearlugit, imiksuillo Beth Bara Jordanelo tikkilugo tikkerᴋârsigik tapkonangat. Tagva ilûnatik Efraimekunit pijut kaggûdlarput akpangerlutiglo, Tikkerᴋârlutiglo imiksoarnut Beth-Baramut Jordanemullo.

²⁵ Angusilutiglo Midianiterit angajoᴋaksoanginit Maggûngnik, Orebemik Sebemiglo, Orebelo toᴋopât Orebib ᴋairtungane, Sebelo, Sebib iptêjaivingane (Weinemik); Midianiterillo ᴋemâtipait. Orebiblo Sebiblo niaᴋogik âpakit Gideonemut Jordanib akkianut.