Idluarsaijut 6 - Labrador Inuttitut Heritage Bible

Gideon idluarsaijungortitauvok.

¹ Israeliblo ᴋitorngangit idluitullilaungmatta Nâlekab sângane, Nâlekab tunnilaukpait Midianiterit agganginut jârit 7 it nâlugit.

² Midianiterillo aggangit songoluarlaungmatta Israelitinut, Israelib ᴋitorngangit sanavut ingmingnut ittersanik ᴋakᴋane, ᴋairosungniglo, ineniglo avaluksoalingnik.

³ Israelitillo sunamik ᴋarngasuilaurangatta, tagva Midianiterit Amalekiterillo, tapkoalo unanemiut takpaungarput tapkonunga;

⁴ Tangmarlutiglo akkerartorlugit, perortullo nuname ilûnaita asserorpait, Gaza tikkilugo, amiakoᴋartitsilaungilello nerᴋiksamik sunamiglonêt Israeleme, saugamiglonêt, tuktuvangmiglonêt, siuteᴋoktojomiglonêt.

⁵ Takpaungarlauramik nerguteᴋotitik tuppitiglo naksarlugit piglertaksoatitut unuktovaksoatitut, tapkoalonêt Kameleᴋotingillonêt kittiksaulaungimatta; ittarlaukpullo nunamut, asseroromavlugo.

⁶ Taimak Israelitit angijomik aklutitaulaukput Midianiterinut. Tagva Israelib ᴋitorngangit niplialerput Nâlekamut.

⁷ Nâlekamulle nipliarmatta Midianiterit pivlugit,

⁸ Nâlekab nallautaijok tilliva tapkonunga, tapsoma oᴋautivait: Imâk Nâlegak Israelib Gûdingat oᴋarpok: Egiptenemit tessiorlaukpapse, aulartiluselo iglomit kippalovingmit;

⁹ Piulilaukpapselo Egiptenemiut agganginit ilûnatiglo agganginit oᴋumaiksartitsilauktut illipsingnik, pingûdlalaukpakkalo sivunapsigut, nunangallo tunilaukpara illipsingnut.

¹⁰ Oᴋautilaukpapselo: Nâlegauvunga Gûdise, Amorterit nunangine nunaᴋarvigijapse Gûdingit sivoraginiarasigik. Illipselo nippiga Nâlalaungilase.

¹¹ Nâlekablo Engelingita illangat ᴋaivok ingilunelo Eichit (nappartut) illangata Oframelauktut atânut, perᴋutaulauktub Joasemut, Esriterit atâtanganut, erningalo Gideon Weizinik katjulaukpok iptêjaivingme, ᴋemâᴋovlugo Midianiterinik.

¹² Tagva Nâlekab Engelingata sakᴋervigiva, oᴋautilugolo: Nâlekab aiparilitit, songojotit sorsungnerme!

¹³ Gideonible oᴋautiva: Nâlegâk, Nâlekab ilagikpattigut, sôgle tagva tamakkoninga tamainik pilaukita? Naneᴋâllo tattamnartulliningit tamaita atâtagijapta unipkautigilauktangit uvaptingnut, oᴋarlauklutiglo: Nâlekab Egiptenemit tasiorlaukpâtigut? Mannâle Nâlekab ᴋemalaukpâtigut, tunilutalo Midianiterit agganginut.

¹⁴ Nâlekable savigiva oᴋarlunelo: Ailerit pitsartunerne tamattomane, igvit Israelitit piulijaksarivattit Midianiterit agganginit. Ahak tillilaukpagit.

¹⁵ Tamnâle oᴋarpok tapsomunga. Nâlegâk, sunamut Israelitit piulijaksarivakka? Ahak illakka mingnerôvut Mânnassekunit, uvangalo mingnerôvunga Atatama Iglomioᴋotinginit.

¹⁶ Nâlekable oᴋautiva: Aiparijomavagit Midianiterit ullimaraksarigangne, angutetut atautsetut sorlo.

¹⁷ Tapsomale oᴋautiva: Nagliktara saimaneksimaguma sângne, tagva nallunaikuteᴋartilaunga igviôgavit oᴋarᴋattigijara.

¹⁸ Nûniarnak tikkitsearilunga, naksarlungalo tunnergutiksamik nerᴋiksamik, tunniniartamnik sângne. Tamna oᴋarpok: Ovanetuaromavunga tikkitsêaringmilutit.

¹⁹ Gideonelo ᴋaivok, toᴋotsilunelo tuktungajomik angusâlloârsungmik, tigusilunelo sanaugamik sernaᴋangitomik Efa tatilugo, illijilunelo nerᴋemik amargaujamut, ᴋajorlo pitipa ukkusingmut, atsilunelo tamakkoninga silamut Eichib atânut, najutilunelo.

²⁰ Gûdible Engelingata oᴋautiva: Nerᴋe tiguleruk, Sernaᴋangitorlo, illilugillo ᴋairtomut manêtomut, ᴋajorlo ᴋoviuk. Taimailiorlaukporlo.

²¹ Tagva Nâlekab Engelingata ajaupiak tigumiartane aggangminut, issautiva aktorlugiglo nuvuanut nerᴋe sanaugarlo sernaᴋangitok. Ikkomalo annivok ᴋairtomit, nerrilunelo nerᴋemik sanaugamiglo sernaᴋangitomik. Nâlekablo Engelinga nippakpok ijigingnit.

²² Gideon mânna tukisigame Nâlegab Engeligingmago oᴋarpok: Nâlegak, Nâlegak, taimak illa Nâlekab Engelingata kênanga takolaukpigo?

²³ Nâlekable oᴋautiva: Ullapirsauteᴋarit! sivoraniarnak, toᴋoniangilatit.

²⁴ Tagva Gideon tagvane Altaremik sanavok Nâlekamut; tailugolo Nâlekamik ullapirsautelingmik. Tamna tagvanêtsainarpok sulle uvlok tamânna tikkilugo Oframe, atâtaulauktome Eseriterinut.

²⁵ Unnuarmelo taipsomane Nâlekab oᴋautiva: Atâtavit Tuktuvaᴋotinginit angusâllormik tigusilerit, angusâllormiglo asianik jârelingmik 7 inik; serᴋomitsilutillo Baalib Altaringanik, perᴋutaumajomik atâtarnut, nakkatsilutillo nappartunik Gûdingoartalingnik sanianêtunik;

²⁶ Sanalutillo Altaremik ᴋairtub ᴋângane Nâlekamut Gûdingnut, âkᴋiksorlugolo, tigusilutillo angusâllub aipanganik, tunnijilutillo tunnergutiksamik ôtaksamik ᴋejungmut nappartunit Gûdingoatalingnit nakᴋarlauktarnit.

²⁷ Tagva Gideon tigusivok kivgaminit angutinik tallimaujortunik piniarlunelo sorlo Nâlekab oᴋautilaungmago. Sivoralaukporle tamattominga piniarlune uvlôningane, atâtame iglomioᴋotingit pivlugit; piniarlunelo unuarme.

²⁸ Tagva mânna inuit iglugasaksoarne uvlarme makkimatta, ahak Baalib Altaringa serᴋomisimalaukpok, nappartullo Gûdingoataggit sanianelauktut nakᴋarsimavlutik; angusâllublo aipanga tunergutiksauvlune Altarib sanajaumajub ᴋângane.

²⁹ Oᴋautiutivullo ingminut: Kina tamattominga pinialauᴋa? Kennerlaungmatta apperᴋuteᴋalaungmattalo oᴋartoᴋarpok: Gideon Joasib erninga tamattominga pinialaukpok.

³⁰ Tagva iglugasaksuit inungit Joasemut oᴋarput: Ernît ᴋaitsuk; toᴋotaksauvok, Baalib Altaringa serᴋomilaungmago, nappartullo Gûdingoataggit tapsomanelauktut nakkalaungmagit.

³¹ Joasele ilûnainut nangerᴋattigijaminut oᴋarpok: Baal aivajutigijomavisiuk? Ikkajoromavisiuk? Aivajok tamna pivlugo, tamna uvlarme tamattomane toᴋojuksauvok. Gûdeôgune pivlune akkiniarle Altaringa serᴋomisimangmat.

³² Uvlormit tamattomangat taijaulaukpok Jerub Baalemik, oᴋartoᴋarporlo: Baal nangminek pivlune akkiniarle Altaringa serᴋomisimangmat.

³³ Tagva mânna Midianiterit ilûnatik Amalekiterillo, tapkoalo unanemiut atautsemut katimangmatta nunakorlutiglo, tangmarlaungmatta Jesreelib naksangane;

³⁴ Nâlekab Anerningata Gideon kajungersarpa; tiptulautiniglo tiptulausijautaukojilaukpok, ᴋaikᴋolugillo Abieserekut malliᴋovlugit tapsominga.

³⁵ Tilliklerporlo akpartitsijunik Mânnassekunut ilûnainut, ᴋaikᴋolugillo malliᴋovlugittauk tapsominga. Tilliklerpoktauk akpartitsijunik Asserekunut Sebulonekunullo Nafthalikunullo, tapkoa takpaungarput pachrearlugo.

³⁶ Gideonelo Gûdemut oᴋarpok: Israelitit aggapkut piulijomagungne sorlo oᴋalauravit;

³⁷ Tagva ammek merkolik katjugvingmut (ᴋakᴋojaksanik) illijomavara. Missuksoak ammermetuinarniarpat, nunalo ilûnane panerpat, tagva mallugosugomavunga, Israelitit aggapkut piulijomagangne sorlo oᴋalauravit.

³⁸ Taimaglo pilaukpok. ᴋaulermallo uvlakut makkijajolaurame amek silvotorpa, illulerkullo tattitipa imermik tamattominga.

³⁹ Gideonelo oᴋarpok Gûdemut: Ningarnivit ilûngertorviginiaraninga, ama oᴋarmigama. Ama oktoromavunga amek attorlugo. Panertuinarle amerme, misuksoaᴋartillugo nuname ilûnane.

⁴⁰ Gûdelo taimailiorlaukpok unuarme taipsomane, panertuinarlaungmat amerme, misuksoaᴋartillugolo nuname ilûnane.