Idluarsaijut 5 - Labrador Inuttitut Heritage Bible

Deborab Barakiblo imgerutingit sâlaᴋarnermik opigotiksat.

¹ Tagva Debora Baraklo Abinoamib erninga imgerpuk nalliutome taipsomane oᴋarlutiglo:

² Nâlegak nertorsiuk, Israelitit kippalojungnaimingmatta, inugasaksuillo ᴋunutuilaungmatta tamattomunga.

³ Nalagitse ataniojose, kamatsiarluselo angajoᴋaksoangôjose! Uvanga, illa uvanga Nâlegak imgervigijomavara, Nâlegak Israelib Gûdingat imgervigijomavara nertordlerutiksanik.

⁴ Nâlegak Seiremit annilauktillutit, pitillutillo Edomib naternanganit, tagva nuna sajukpiludlalaukpok, ᴋilak kusidlalaukpok, nuvujallo kusidlalaukput imermik.

⁵ ᴋakᴋat auksilaukput Nâlekab sângane, ila Sinai Nâlekab Israelib Gûdingata sângane.

⁶ Samgarib Anatib erningata nalliuningane, Jaeliblo nalliuningane, apkosineᴋarungnailaukpok; ingergartuksaulauktullo, agvertarlaukput apᴋutitigut niungapateᴋeatigut.

⁷ Iglugasangne Israeleme inuit ikkinersaupallialaukput. Uvanga Debora pilerᴋârtinanga, pilerᴋârtinanga anânaujunga Israeleme.

⁸ Gûdib nutâk annerimava, upkoaksuit sorsugvigilaukpait. Sakᴋijârtoᴋalaungilak Israeleme sappulutamiglonêt ᴋallugiarmiglonêt, 40,000 dit akkorngane.

⁹ Omattima Israelib aulautsijingit ungagivait, ᴋunutuitut inugasaksuit akkorngane. Nâlegak nertorsiuk,

¹⁰ Ablangajose siuteᴋoktojune ᴋakortane, idluarsaivingme iksivajose, imgeritselo apᴋosinerme agvertartose.

¹¹ Pittiksertut nipliarvigilauktangine imertarvit akkorngane, tagvane Nâlekab idluarninga oᴋautigijaulaukpok, iglugaseillo Israeleme inungita idluarningat; tagva Nâlekab inuᴋotingit attersarput upkuaksoarmut.

¹² Atte, atte Debora, atte, atte, imgerutiksamik imgerit: Parngnailerit Barak, tigulugillo tigujomajitit, igvit erniôjotit Abinoamut!

¹³ Tagva ᴋemaktaumajut ataniotilaukput inungnut sangijunut; Nâlegak uvapkut ataniotilaukpok songûdlartunut.

¹⁴ Efrainememit amângat pivok Amalek akkerartorlugo, kingunakut Benjamin inuᴋotingne. Machiremit atanernik pijoᴋarpok, Sebulonemillo pijoᴋarpok aulatsijunik, aglaktub ajaupiangagut.

¹⁵ Angajoᴋaksuillo Isascharemit Debora ilagilaukpât; Isascharekullo Barak ilagilaukpât naksarme, tillijauvlutik Inuᴋotingit pisuktut ilagivlugit. Rubenekut piojorilaukput, avitilutiglo uvaptingnit.

¹⁶ Sôg nergjutit avalulingita akkornganetuarᴋise, katimgajut nipliadlarningit tussarlugit, piôjoriluselo, avitiluselo uvaptingnit?

¹⁷ Gileadekut Jordanib akkianetuarlaukput; sunalo pivlugo Danekut umiaksoarneᴋât? Asserekut imarbiksub siksangane iksivalaukput, iglugasanginetuarlaukput asserorsimajune.

¹⁸ Sebulonekulle Nafthalikullo inolaukput tarnemingnik tunijomalauktut toᴋomut naternaub timâne.

¹⁹ Atanît ᴋailaukput sorsuglutiglo, tagva Kanaaniterit ataningit sorsulaukput Thaanacheme Meggidob kôngane; sullilaungilalle.

²⁰ ᴋillangmit sorsugvigijaulaukput; uvloritset ingergarnermingne sorsulaukput Sisseramut.

²¹ Kôb Kisonib aksakatilaukpait, kôb Kaduminib, kôb Kisonib. Tarnik, songojut tuttidlarkit.

²² Tagvane Horsit itigangit kikkergalijarlaukput, ablangajingita songojut mungunganingit pivlugit.

²³ Iglugasaksuit Meros ominarsijaukosigik, Nâlekab Engelinga oᴋalaukpok; inungit ominarsijauᴋosigik, tikkilaungimatta Nâlegak ikkajorlugo, Nâlegak ikkajorlugo songojunut.

²⁴ Saimartaule arnat akkorngane Jaele, Heberib Kenitereôjub nulianga, saimartaule tupperme arnat akkorngane.

²⁵ Imungmik tunijilaukpok imermik ᴋaitsiᴋojitillugo, imublo orksuanik ᴋaitsivok pogutame ânanâme.

²⁶ Aggangminut kikkiek tigulaukpa, tallerpingminullo sabviortib ujaratsianga, katjuklunelo Sisseramik niaᴋungagut, serᴋomitsilunelo, puttojilunelo niaᴋungata tiglertanganik.

²⁷ Itigangine nimalaukpok, ochovok nallalunelo, nimavok ocholunelo itiganginut; nimavingmine nallavok asserorsimavlune.

²⁸ Sisserab anânanga ijainilaukpok igalakut kaggûdlarlunelo killapatakut: Sog aksalloalikotinga mulludlarka tikkingimat? ᴋanok aksalloaᴋotingita aksalloajungit kingoraidlarᴋât?

²⁹ Sillatunersat nuliangita akkorngane kiovut, tapsoma oᴋautsine ogguarutiksane attupsatsainarmagit:

³⁰ Nachvârtuksaungilelle, avititsilutiglo aksarnigaujunik? Angutinut ilûnainut attunit uigarsungmik atautsemik maggûngniglonêt perᴋutiksanginut, Sisseramullo annorângnik minguarutelingnik aglaksimajuniglo perᴋutiksanganut; annorângnik mingoarutelingnik sunatuinarnik aglaksimajuniglo kongesinganut, piksanganut?

³¹ Taimak nungutuksauvut, Nâlegak omigijitit ilûnaita! Tapsomingale naglingniktut îtuksauvut seᴋerngub nuiningatut songonermine. Nunalo inilangalaukpok jârenik 40 ginik.