Idluarsaijut 4 - Labrador Inuttitut Heritage Bible

Deborab, Barakib, Jaeliblo maksoaninginik.

¹ Israelible ᴋitorngangit ama idluitullilaurivut Nâlekab sângane, Ehud toᴋolaungmat.

² Nâlekablo niorvgotigivait Jabinib Kanaaniterit ataningata Hazoremelauktub agganginut; sorsuktuksoaᴋotingitale angajoᴋangat Sisseraôlaukpok, nunaᴋalaukporlo Harosetheme nallojunut illingajome.

³ Israeliblo ᴋitorngangit niplialerput Nâlekamut; Aksalloaliᴋuteᴋalaungmat kikkiangnik 900 dinik, Israeliblo ᴋitorngangit aksorornermut oᴋumaiksartipait jârinik 20 ginik.

⁴ Nalliutomelo taipsomane idluarsaijolaukpok Israelitinik nallautaijok arnak Debora, Lapidotib nulianga.

⁵ Nunaᴋalaukporlo Deborab Palmikotingita atâne, Ramab Betheliblo akkonigingne, Efraimib ᴋakᴋangine. Israeliblo ᴋitorngangit takpaungarlaukput tapsomunga idluarsaivingmut.

⁶ Tamna tilliklerpok Barakemut Abinoamib erninganut, Kedesemetomut Nafthalime, oᴋautsauᴋolugolo: Nâlekab Israelib Gûdingata perᴋolaungilatit: Aularit ailutillo ᴋakᴋamut Thaboremut, illaseariᴋillo angutit 10,000 dit, Nafthalib Sebuloniblo ᴋitornganginit?

⁷ Sissera Jabinib sorsuktuksaksoaᴋotingita angajoᴋangat aulartitsomagapko illingnut kôngmut Kisonemut, aksalloaliᴋotingit unuktoᴋotingillo illaliudlugit, tunnijomavaralo aggangnut.

⁸ Barak oᴋarpok tapsomunga: Aiᴋattiginiarumga, aijomavunga; aiᴋattigingiᴋumgale, aijomangilanga.

⁹ Tamna oᴋarpok: aiᴋattigijomavagit, nertortaunerle, nangmineriniangilet aularnerne tamattomane; Nâlekable Sissera tunniniarpa arnab agganginut. Taimak Debora parngnailerpok, aularlunelo Barak aiparilugo Kedesemut.

¹⁰ Tagva Barakib Sebulonekut, Nafthalikullo ᴋaikᴋovait Kedesemut, pisuklunelo aularpok angutit 10,000 dit ilagillugit. Deborablo aularᴋattigiva.

¹¹ Heberele Kenitereôjok, Keniterinnit, Hobab, Mosesib sakkingata ᴋitornganginit aularlaukpok, tangmarlunelo Zaanaimib Eichingine, Kedesib saniane.

¹² Tagva Sissera oᴋautsaulerpok, Barak Abinoamib erninga aularsimangmat ᴋakᴋamut Thaboremut.

¹³ Tapsomalo aksalloaliᴋotine ilûnaita katterᴋovait, aksalloaggit kikkiengôjut 900 dit, inugasaksuillo ilagijine ilûnaita, nallojut Harosetinganit, kôngmut Kisonemut.

¹⁴ Deborale Barakemut oᴋarpok: Atte! tamânna uvlôvok Nâlekab tunnijivinga Sisseramik aggangnut, Nâlegak sivorleriniarangne. Taimak Barak ᴋakᴋamit Thaboremit attersarpok, 10,000 dillo tapkoa mallikpât.

¹⁵ Nâlekable Sissera kavaksartipa, aksalloalikotingit ilûnaita, sorsuktuksoaᴋotingillo ilûnaita illaliudlugit, Barakib saviksoangata kênanganut, Sissera niungmat Aksalloaliᴋotiminit ᴋemâlunelo pisuklune.

¹⁶ Barakible aksalloaggit, sorsuktuksoaᴋattigêllo udlapait, nallojut Harosetingat tikkilugo. Sisserablo sorsuktuksoaᴋotingit ilûnaita ochovut saviksub kênanganut amiakoᴋaratik atautsemiglonêt.

¹⁷ Sisserale pisuklune ᴋemâvok Jaelib Heberib, Kenitereôjub nuliangata tuppinganut; Atanek Jabin Hazoreme, Heberiblo Kennitereôjub iglomioᴋotingit Ullapirsauteᴋarᴋattigêlaungmatta.

¹⁸ Jaele annivok Sissera pachrearlugo oᴋautivâlo: Itterit, Nâlegâk, itterviginga, sivoranaglo. Ittervigivâlo tuppinganut; ullikpâlo ulliksoarmut.

¹⁹ Tapsomale oᴋautiva: Nagliktara imilaunga imermik imerudlarama. Tagva imiᴋautit illangat mattoêrpa imilâlo, ulliklugolo.

²⁰ Tapsomalo oᴋautiva: Tuppiub pânganut nangerit, tikkitoᴋarpallo appertsortomik, mânêtoᴋangimangat kimik, tagva oᴋarit: Ahaila.

²¹ Tagva Jaelib Heberib nuliangata kikkiek tuppermit tiguva ujaratsiarlo aggangminut, terrêdlunelo ittervigiva, kikkierlo katsukpa niaᴋungata tigliktângagut nunamut pilune. Tamnâle sinisilerpok isumairotilunelo toᴋolerpok.

²² Barakible Sissera udlangmago Jaelieb pachreartorpâ annilune, oᴋautilugolo: Tamaungarit, angut ᴋennertat takojautitsomavara illingnut. Ittervigingmagolo Sissera toᴋongavlune nallavok naterme, kikkierlo niaᴋungata tiglertanganelaukpok.

²³ Taimak Nâlekab nalliutome taipsomane Jabin Kanaaniterit ataningat ajugaujuêrtipa Israelib ᴋitorngangita sângine.

²⁴ Israeliblo ᴋitorngangita aggangit piganerlaukput songolutiglo Jabinemut Kanaaniterit ataninganut nungutsiᴋârtinagit tapsominga.