Idluarsaijut 21 - Labrador Inuttitut Heritage Bible

ᴋitorngarêt Benjaminekut nuliaᴋartitauninginik.

¹ Israelible angutingit angermarilaukput Mizpame, oᴋarlutiglo: Kialonêt panine tunnijaksaringila Benjaminekunut nuliaksamut.

² Inugasaksuillo ᴋailaukput Gûdib iglunganut, tagvanêlutiglo Gûdib sângane unnuk tikkilugo, kagverlutiglo nippimingnik, ᴋêavaksoadlarlutiglo,

³ Oᴋarpullo: Nâlegak Israelib Gûdinga, sôg tamattominga pijoᴋalauᴋa Israeleme, uvlome Israelib ᴋitorngarêngit atautsenik ikkinersaulersimangmatta?

⁴ Kaub aipangane inugasaksuit makkijajovut, sanalutiglo tagvane Altaremik, tunnijilutiglo tunnergutinik ôtaksanik, ᴋujalijutiksaniglo.

⁵ Israeliblo ᴋitorngangit oᴋarput: Kikkogalloarkât Israelib ᴋitornganginit takpaungarᴋataulungitut illagêt illagillugit Nâlekamut? Angijomik angernermik pijoᴋalaungmat, takpaungarlungitok Nâlekamut Mizpamut toᴋotaksaungmat.

⁶ Israeliblo ᴋitorngangita Benjaminekut, ᴋatangutitik ᴋaᴋialerutigivât, oᴋarlutiglo: Uvlome kinguvarêt atautsit naviksimavut Israelekunit.

⁷ ᴋanok pinniarvigijomavittigik amiakungit Nuliaᴋalerᴋovlugit? Angermarilaurapta Nâlekame, paniptingnit tunnitsivigijomanginaptigik nuliaksanik.

⁸ Oᴋarpullo: Kikkogalloarkât Israelib ᴋitorngarênginit takpaungarlungitut Nâlekamut Mizpamut? Ahâglo, tagva pitaᴋalaungilak kinamik illagêt tangmarvingine Jabesemit Gileademetomit.

⁹ Inugasaksuit kittilaungmagit, ahâglo tagvanetoᴋalaungilak Jabesemiomik Gileademetomit.

¹⁰ Tagva illagêt tagvunga tilliklerput angutinik 12,000 dinik, angutinik sorsugungnartunik, perᴋolugillo, oᴋalarmiglo: Aileritse ullimarniluselo saviksub kênanganut Jabesemiunik Gileademetomiunik, nuliangit ᴋitorngangillo illaliudlugit.

¹¹ Imâgle pijuksauvose: Anguteôjut ilûnaita, arnallo innangalauktut angume, aseroraksarivase.

¹² Jabesemiunelo Gileademetomiune nachvârput arnanik 400 dinik, uigasojunik, inangalaungitunik angume, tapkoa âpait tangmarvingmut Silomut Kanaanib nunanganetomut.

¹³ Tagva illagêt ilûnatik tilliklerput oᴋarᴋattigêkojilutiglo Benjaminib ᴋitornganginik, ᴋairtome Rimonemetunik, ᴋaikᴋolugillo ullapirsarnartomik.

¹⁴ Taimak Benjaminib ᴋitorngangit ᴋailaurivut nalliutome taipsomane, tunnitsivigivaillo arnanik tapkoninga, pilauktamingnik arnanit Jabesemit Gileademetomit, nachvârungnaipullo taimaitunik.

¹⁵ Tagva inugasaksuit Benjaminekut ᴋaᴋialerutigivait, Nâlegak Israelib ᴋitorngarêngine koppaᴋartitsilaungmat.

¹⁶ Illagêktullo angajoᴋangit oᴋarput: Sunamik pinniaromavita asingittauk nuliaᴋalerᴋovlugit? Arnat Benjaminekune pêjarsimangmatta.

¹⁷ Oᴋarpulle: Amiakojut Benjaminekunit kingormgutigijatik pigênaraksarivât illa, kinguvarêt atautsit nungutaukonagit Israelemit.

¹⁸ Uvagullo paniptingnik tunnitsivigijungnangilavut nuliaksanut. Israelib ᴋitorngangit angerᴋattigêmarilaungmatta, oᴋarlutiglo: Ominarsijaule tunnijijok nuliaksamik Benjaminekunut.

¹⁹ Oᴋarpullo: Ahâk uvloksiorviôvok Nâlekamut Silome avanêtome Bethelib akkilinganetome, kitâne, apᴋosinerme takpaungarviojome Bethelemit Sichemut, Lebonablo seᴋerngane.

²⁰ Benjaminiblo ᴋitorngangit perᴋovait oᴋautilugillo: Aileritse utakᴋiluselo nappartune Weineliksane.

²¹ Takoniarupselo tagva, Silomiut paningit annilermatta imgerlutik okkigêsermut, tagva annisâdlaritse nappartunit Weineliksanit, attunnîllo nuliaksamik tigusileritse Silomiut paninginit, ailuselo Benjaminekut nunanganut.

²² Atâtangille ᴋatangutingillonêt ᴋainiarpatta Akkiortauᴋoluse, oᴋautijomavavut: Napkigisigik pivluta, angutinut ilûnainut nuliaksamik pilaunginapta unatadlarnerme; illipselo tunnijomalaunginapsigik tapkonunga, pasijaksauvose tamattomane.

²³ Benjaminiblo ᴋitorngangit taimailiorlaukput, tigusilutiglo nuliaksanik unnurnitik malliklugit, okkigêsertunit, aksarnigarijamingnik, aularlutiglo nunaᴋalarmiglo kingormgutijamingne, iglogaselliorlutiglo iglugasaksoarnik, innigivaillo.

²⁴ Israelib ᴋitorngangittauk taipsomane aularput tagvangat attunît kinguvanguᴋattimingnut illamingnullo, aularlutiglo attunît kingormgutijamingnut.

²⁵ Nalliutome taipsomane ataneᴋalaungilak Israelekune; attunit pinniarput nâmagijamingnik.