Idluarsaijut 20 - Labrador Inuttitut Heritage Bible

Kinguvarêt Benjaminekut nungutaukasâlerput.

¹ Tagva Israelib ᴋitorngangit Danemit Bersaba tikkidlugo, nunamillo Gileademit, aularput katimalerlutiglo atautsemut, angutetut atautsetut sorlo, Mizpamut Nâlekab sânganut;

² Israeliblo kinguvarêngita tamaita Gûdib Illagêktoᴋotingine, inugasaksoangita angajoᴋangit katimalerput, angutit pisuktut 400,000 dit saviksoalijarlauktut.

³ Benjaminible ᴋitorngangit tussarlaukput, Israelib ᴋitorngangit takpaungarlaungmatta Mizpamut. Israeliblo ᴋitorngangit oᴋarput: Oᴋaritse, ᴋanok idluineâluk tamânna pilauᴋa?

⁴ Tagva Levite taimna, arnab toᴋotaumajub uinga kiovok oᴋarlunelo: Gibeamut Benjaminemêtomut pilaukpunga panervgara illagillugo, siniktaromamut tagvane.

⁵ Tagva Gibeamiut opalaukpânga, iglomelo unnuarme illumalaukpânga, toᴋotsomavlungalo, panervgaralo attornerlulaukpât toᴋolerᴋârtinago.

⁶ Tagva panervgara tigulaukpara avgorlugolo, tillikliutilugolo Israelib kingormgutijangata nunanginut ilûnainut; kuksâlainermik sillainermiglo pilaungmatta Israeleme.

⁷ Ahâk illipse ᴋitorngaujose Israelemut ilûnase manêpose; isumapsingnik, ᴋanorlo pinniaromanipsingnik oᴋaritse.

⁸ Tagva inugasaksuit tamaita nikovilerput angutetut atautsetut sorlo, oᴋarlutiglo: Ittertoᴋartuksaungilak kinamik tupperminut, uttertoᴋartuksaungilarlonêt iglominut,

⁹ Imagle pinniaromavogut mânna Gibeamut:

¹⁰ Imerarta; tigusilutalo angutinik tallimaujortunik 100 dinit, 100 diniglo 1,000 dinit, 1,000 diniglo 10,000 dinit, Israelib kinguvarênginit tamainit, tigusiᴋovlugit nerᴋiksanik inugasaksoarnut, aiᴋovlugit pinniarᴋovlugillo Gibeamut Benjaminemêtomut, tamaita sillainingit Sakᴋertilauktangit Israeleme malliklugit.

¹¹ Taimak Israelitit angutingit ilûnamatsiatik katimalerput angutetut atautsetut sorlo, iglugasaksoarnut taipkonunga, angerᴋattigêlutiglo.

¹² Israeliblo kinguvarêngit tilliklerput angutinik Benjaminib abvakunginut tamainut, oᴋautsaukolugillo: ᴋanok idluitoksoniôva, piniarnerijaulauktok illipsingne?

¹³ Tagva mânna angutit taipkoa, uivêtoâluit Gibeamêtut unertotigisigik uvaptingnut, toᴋotsiᴋovluta tapkoninga, pêjaiᴋovlutalo idluiniâlungmik mattominga Israelemit. Benjaminible ᴋitorngangita ᴋatangutimik Israelib ᴋitorngangita nippingat Nâlegomalaungilât.

¹⁴ Iglugasaksoarnille katimalerput Gibeamut, aularomavlutik unatadlarnermut Israelib ᴋitornganginut.

¹⁵ Nalliutomelo taipsomane Benjaminib ᴋitorngangit iglugasaksoarnit tamainit kittitaulaukput, angutit 26,000 dit saviksoalijartut, Gibeamiut pinagit, tapkoa kittitaulaukput 700 dit, angutit annerijaumajut.

¹⁶ Inugasaksuillo tapkoa akkorngane anguteᴋalaukpok 700 dinik annerijaumajunik, saumiolauktunik, illoreumullo nujak uvigarungnarlaukpât uniornagolo.

¹⁷ Israelitille (Benjaminekut illaliutinagit) kittitaulaurivuttauk angutit 400,000 dit, saviksoalijartut, sorsugungnartullo ilûnatik.

¹⁸ Tapkoa parngnailerput, takpaungarlutiglo Gûdib iglunganut, Gûdelo appertsorpât, oᴋarlutiglo: Kikut uvaptingnit aularᴋârtuksauvât, unatadlarnek pigiarlugo Benjaminib ᴋitornganginut? Nâlegak oᴋarpok: Judakut pigiartuksauvut.

¹⁹ Taimak Israelib ᴋitorngangit uvlarme parngnailerput, tangmarlutiglo Gibeab sivorânut.

²⁰ Angutillo Israelitit ilûnatik annivut sorsugomamut Benjaminekunut, oppalungaijailutiglo Gibea sorsugvigilugit.

²¹ Tagva Benjaminib ᴋitorngangit annisarput Gibeamit, ullimarnilutiglo ochotitsivut nunamut uvlorme taipsomane Israelitit akkorngane 22,000 dinik.

²² Inugasaksuillo, angutit Israelitit maksoatilerput oppalungaijailutiglo ama sorsugomavlutik, tagvane uvlub sivorlingane oppalungairvigilauktamingne.

²³ Israeliblo ᴋitorngangit takpaungarput, kugviorlutiglo Nâlekab sângane unnuk tikkilugo, Nâlegarlo appertsorpât, oᴋarlutiglo: Ama aijuksauvita sorsukluta Benjaminib ᴋitornganginut ᴋatangutiptingnut? Nâlegak oᴋarpok: Takpaungarvigisigik.

²⁴ Israeliblo ᴋitorngangita uvlub aipangane Benjaminib ᴋitorngangit najulermattigik,

²⁵ Benjaminekut annisârput Gibeamit, taipkoa pârlugit uvlorme taipsomane, ullimarnilutiglo, ochotitsilutiglo nunamut ama Israelib ᴋitornganginit 18,000 dinik, saviksoalijartunik ilûnainik.

²⁶ Tagva Israelib ᴋitorngangit ilûnatik, inugasaksuillo ilûnatik takpaungarput, ᴋailutiglo Gûdib iglunganut, kugviorlutiglo, uvlilutiglo tagvane Nâlekab sângane, nerrinatiglo uvlorme taipsomane, unnuk tikkilugo, tunnijilutiglo tunnergutinik ikkoalajaksanik, tunnergutiniglo ᴋujalijutiksanik Nâlekab sângane.

²⁷ Israeliblo ᴋitorngangita Nâlegak apperivât, (Gûdible angernerilauktangata iklervinga taipsomane tagvanelaukpok;

²⁸ Pinehaselo, Eleaserib Aronib erningata erninga nangerlaukpok tapsoma sângane nalliutome taipsomane) oᴋarlutiglo: Ama aulartuksauvita sorsukluta Benjaminib ᴋitornganginut ᴋatangutiptingnut, nokᴋartuksauvitalonêt? Nâlegak oᴋarpok: Takpaungaritse, ᴋaupat tunnijomavakka aggapsingnut.

²⁹ Israeliblo ᴋitorngangit utakᴋijoᴋartitsivut terliarsivingne Gibeab avatâne.

³⁰ Taimaglo Israelib ᴋitorngangit uvlut pingajuane takpaungarput Benjaminib ᴋitornganginut, oppalungaijailerlutiglo Gibeamut, sorlo sivorngane maggoêrtorlutik pilauramik.

³¹ Tagva Benjaminib ᴋitorngangit annisadlalerput inugasaksuit pârlugit, nulerlutiglo iglugasaksoarnit, pigialerlutiglo ullimarniklutik killerniglutiglo inugasaksoarnit, sorlo sivorngane maggoêrtorlutik pilauramik, natername, apkosinerne maggûngne, aipanga Bethelemut sangmijome, aipanga Gibeamut sangmijome, angutinik Israelitinik 30 ginik.

³² Tagva Benjaminib ᴋitorngangit isumalaukput: Sâlagijaumavut sâptingne sivurnganetut. Israelible ᴋitorngangit oᴋarput: ᴋemâlerta nutjiᴋovluta tapkoninga iglugasaksoarnit apᴋosinermut.

³³ Tagva Israelib angutingit ilûnatik innimingnit annivut, oppalungaijailutiglo Baal-Thamareme. Israeliblo utakᴋijoᴋotingit terliarsivingme annivut innimingnit, kairosungmit Gabamik atelingmit,

³⁴ Gibeamullo tikkiput, angutit anerimajut Israelitinit tamainit 10,000 dit, unatadlarnek songolaungmat; nalludlalaukpulle ᴋanoêtub tikkiniarmagit.

³⁵ Taimak Nâlekab Benjaminekut ullimârpait Israelib ᴋitorngangita sângane, Israelib ᴋitorngangita uvlorme taipsomane asserorlaungmagit Benjaminekunit angutit 25,100 dit saviksoalijartut.

³⁶ Benjaminible ᴋitorngangit takolaungmatta sâlagijaunermingnik, Israelib angutingita iniksaᴋartipait; uttakkijut terliarsivingme Gibeametilauktatik sungertutigigamigit.

³⁷ Terliarsivingmêtullo tuavilaurivut, annilutiglo Gibeamut, najutilutiglo, ullimarnilutiglo iglugasaksoarmiunik taimainik saviksub kênanganut.

³⁸ Nallunaikuteᴋartigêlaukpulle Israelib angutingit, terliarsivingmêtullo, saviksoarmut opaklugit, isserluk iglugasaksoarnit ᴋongmuarajarpat.

³⁹ Israeliblo angutingit mânna sangulaungmatta unatadlarnerme, Benjaminekullo pigiarmatta ullimarniklutik; killerningmattalo Israelitinit angutinik 30 gekasangnik, isumaᴋarmatta, sâlagijaumavut sâptingne, sorlo unatadlarnerub tamattoma sivorlinganetut;

⁴⁰ Tagva isserluk pikunga ᴋongmualerpok iglugasaksoarnit, Benjaminekullo ᴋeviarput tunnumut; ahâglo, tagva ikkomaub ikkoalaninga ᴋongmuarpok iglugasaksoarnit.

⁴¹ Israeliblo angutingit sangulaurivut ᴋoaksârtilaitalo Benjaminekut; takolauramik ᴋanoêtub tikkitsomangmagit.

⁴² Tamânna pivlugo sangulerput Israelib angutingita sângine, apkome sunaᴋajuitomut sangmijome; unatadlarneruble mallikpait; taimaglotauk iglugasaksuit asinginit tamattomunga (unatadlarnermut) pilauktut asserorpait.

⁴³ Illumavaillo Benjaminekut udlapaillo Menuah tikkidlugo, tullerarpaillo Gibeab sivorânut tikkilugo, kitânut.

⁴⁴ Benjaminekunillo ochovut angutit 18,000 dit, ilûnatik anguteôlauktut sorsugungnartut.

⁴⁵ Tagva sangulerput ᴋemâlutiglo sunaᴋajuitomut, kairtomut Rimonemut; apᴋomele tamattomane ullimarpait angutit 5,000 dit, mallikpaillo Gideome tikkilugo, ullimarpaillo tapkonangat 2,000 dit.

⁴⁶ Taimaglo ochovut Benjaminekunit uvlorme taipsomane angutit 25,000 dit, ilûnatik saviksoalijartut, ilûnatiglo angutaulauktut sorsugungnartut.

⁴⁷ Angutit 600 dituinait sangulerput ᴋemâlutiglo Sunaᴋajuitomut, kairtomut Rimonemut, kairtomelo Rimonemêlaukput takᴋit sitamat nâlugit.

⁴⁸ Israeliblo angutingit utterivut Benjaminib ᴋitornganginut, ullimarnilutiglo saviksub kênanganut iglugasaksoarne, tamangnik inungnik nergjutiniglo, naipitaujuniglo tamainik; iglugasaksuillo tamaita naipitaulauktut ikkitauvut ikkomamut.