Idluarsaijut 2 - Labrador Inuttitut Heritage Bible

Israelib ᴋitorngangita nippunganingat, ᴋatangningallo pitlartauningallo.

¹ Nâlekable Engelinga ᴋailaukpok takpaunga Gilgalemit Bochimemut, oᴋarlunelo: Tesiorlaukpapse takpaunga Egiptenemit, tikkiutiluselo nunamut atâtagijapsingnut angerutigilauktamnut, oᴋalaukpungalo: angernera illipsingnut soᴋosertitsomanginapko isoᴋangitomut:

² Illipse angerᴋattigêngnermik pijuksaunginapse nunab tamattoma inunginut; Altareᴋotingillo serᴋomitaksarigapsigik. Illipsele nippiga Nâlelaungilasse. Sôg taimailiorlauᴋise?

³ Tagva oᴋalaurivunga: Pêjaromangilakka sivunapsingne, kellerutiksangolerᴋovlugit illipsingnut, Gûdingoangillo nulluangolerᴋovlugit.

⁴ Nâlekablo Engelinga taimaitunik oᴋautsinik oᴋarêrlaungmat Israelib ᴋitornganginut ilûnainut, inugasaksuit nippitik kagvarpait ᴋêalutiglo.

⁵ Innelo tamânna atserarpât Bochimemik, tunnijilutiglo tunnergutinik Nâlekamut,

⁶ Josuable inugasaksuit aularᴋolaungmagit, Israeliblo ᴋitorngangit aularlaungmatta, attunit kingormgutijamingnut, nuna aksarnigarilugo,

⁷ Inugasaksuit Nâlegak kivgartorlaukpât Josua inotillugo, angajoᴋajallo, akkunit Josuab kingorngane inôlauktut, takolauktullo Nâlekab pinniarnersoanginik tamainik, piniarnerilauktanginik Israelitinut, inotillugit.

⁸ Josualo nunib erninga, Nâlekab kivganga toᴋolaungmat jâreᴋarlune 110 nik,

⁹ Illijartorpât kingormgutijangata kiglilervingane, Thimnath-Hereseme, Efraimib ᴋakᴋanginetome, ᴋakᴋab Gaasemik atigub tachâne.

¹⁰ Ilûnatiglo, nalliutome taipsomane inôlauktut, kattersortaujarêrlaungmatta atâtagijamingnut, tagva tapkoa kingorngane kinguvarêᴋalerpok asianik, Nâlekamik illitarksilungitunnik, pinniarnerniglonêt pinniarnerilauktanginik Israelitinut.

¹¹ Tagva Israelib ᴋitorngangit idluitullivut Nâlekab sângane, Baalillo kivgartorpait,

¹² ᴋemakpâllo Nâlegak atâtagijangita Gûdingat, tesiornilauktok tapkoninga nunamit Egiptenemit, malliklutiglo Gûdib asinginik, inuᴋattigêksuillo avatinginelauktut Gûdinginiktauk, tuksiarvigivaillo, Nâlegarlo ningarosuktipât.

¹³ Nâlegak ᴋemaᴋatarmatsuk, kivgartorlutiglo Baalemik, Astharotemiglo.

¹⁴ Taimak tagva Nâlekab ningarninga ilûngertudlalaukpok Israelitit pivlugit, tunnivaillo arktainiktut tapkoninga agganginut, aksarniᴋovlugit tapkoninga, niorvgutigivaillo omigijingita avatânetut agganginut. Akkerartorungnarungnailaukpaillo omigijitik;

¹⁵ Naukulle annijomavingine, Nâlekab aggangita akkerartorpait pillorijuijutiksanginut, sorlo Nâlekab oᴋautilaungmagit angervigimarilaungmagillo; angijomiglo oᴋumaiksartitaulaukput.

¹⁶ Nâlegak tagva idluarsaijoᴋartitsilaurangat piuliklertunik tapkoninga, arktaijut agganginit,

¹⁷ Tagva idluarsaijut Nâlelaunginivait; ajortullilutigle Gûdib asinginut, tuksiarvigivaillo, sangusârailutiglo apkomit atâtagijamik arvertarvigilauktanganit Nâlegak Nâleklugo, pinniarlaungilello taipkotitunak.

¹⁸ Nâlekable idluarsaijoᴋartilaurangagit, tagva Nâlekab idluarsaijok aiparilaukpa, ikkajorlugillo omigijingita agganginit idluarsaijok inotillugo. Nâlekab tapkoa ogguarningit, taipkoa oᴋumaiksartitsijut tapkoninga pivlugit, illapsugosujutigingmagit.

¹⁹ Idluarsaijorle toᴋolaurangat, tagva sangulerput, asseroinersaulutiglo atâtagijamingnit, mallingnermut Gûdib asinginik, kivgartorlugit, tuksiarvigilugillo; allailaungilet kajusimanermingnik, illinganermingniglonêt tappatonelingmik.

²⁰ Tamânna pivlugo Nâlekab ningarninga ilûngertulerlaukpok Israelitit pivlugit, oᴋarᴋovlugo: Inugasaksuit ukkoa angernera tappagilaungmatsuk atâtagijanginut perᴋolauktara, nippigalo Nâlelungimatsuk,

²¹ Tagva mattoma kingorngagut nallojut Josuab amiakotilauktangit toᴋotillugo pêjaromanginivakka;

²² Oktorᴋovlunga Israelitinik tapkonane, Nâlekab apkosininganênarmangatta, agvertarlutiglo tamattomane, sorlo atâtagijangit tamattomanênarlaungmatta, pingimangattalonêt.

²³ Taimak Nâlekab nallojut taipkoa tunnilaungitane Josuab agganginut, tagvaneᴋovait pêjarsârnagit.