Idluarsaijut 19 - Labrador Inuttitut Heritage Bible

Gibeamiut kangunartunik pitlartaunartuniglo pinniarneᴋarput.

¹ Nalliutome taipsomane ataneᴋalaungilak Israeleme. Angutelo Leviteôjok tujormiolaukpok Efraimib ᴋakᴋangata sivinganingane, pannervgarnilaukporlo Bethlehemit Judamêtomit.

² Saniagullo ajortullilaurame ᴋemavâ, atâtame iglunganut Bethlehememut Judamêtomut, tagvanêlunelo takᴋit sitamat nâlugit.

³ Uingalo parngnailerpok, malliklugolo, pitsiarlune oᴋarᴋattigijomavlugo, aijomangmilugo ingminut, aipaᴋalunelo nukapiamik, siuteᴋoktojungniglo maggûngnik. Tapsomalo atâtame iglunganut ittertipa. Arnablo atâtangata takogamiuk ᴋuviasulerpok illelliorpalo.

⁴ Sakkingatalo, arnab atâtangata inapa, uvlunik pingasunik uvlilerᴋovlugo; nerrilutiglo imerlarmiglo siniktarlutiglo unnuarme tagvane.

⁵ Uvlut sittamangane uvlarme makkijajovut, nikᴋoviporlo aularomavlune. Tagva arnab atâtanga ningaungminut oᴋarpok: Omattit nakoksitiᴋâruk niakojârsungmut, kingorngane aulartuksauvose.

⁶ Ingilaukpuglo nerriᴋattigêlutiglo imerlarmiglo. Tagva arnab atâtanga angumut tapsomunga oᴋarpok: Nagliktara, unnuak ovanelerit ommatillo serrilerle.

⁷ Angulle makkimat aularomavlune, sakkingata unniksarpa sinniktarᴋovlugo tagvane.

⁸ Uvlut tallimangata uvlângôningane makkijajovok aularomavlunelo. Tagva arnab atâtanga oᴋarpok: Nagliktara, ommatit nakoksititsuk, tuavitaililutalo uvloklilerᴋârtinago; taimaglo nerriᴋattigêkpuk.

⁹ Angullo nikᴋovipok aularomavlune panervgane nukapiakotinelo illagillugik, sakingatale, arnab atâtangata oᴋautiva: Ahâk uvloklilerpok unnuleromalunelo, unnuak ovanêlerit. Ahâk siniktarviᴋarpok sulle uvlome, unnuak ovanelerit, omattillo serrilerle; ᴋaupat makkijajovose aularluselo apᴋotipsingne iglungnut.

¹⁰ Angulle tamna siniktaromalaungilak, parngnailerporle aularlunelo, tikkilarmelo Jebusib, tagva Jerusalemib sânganut; najorteᴋalaukporlo siuteᴋoktojungnik maggûngnik nangmartungnik, pannervgaminiglo aipaᴋarivok.

¹¹ Jebusiblo ᴋanitanginut pigamik uvloklilerpok. Nukapiarlo angajoᴋaminut oᴋarpok: Nagliktara, Jebusiterit iglugasaksoanginut tamakkonunga itterta, siniktarlutalo unnuak.

¹² Angajoᴋangale oᴋarpok tapsomunga: Takorngartat, Israelib ᴋitornganginut illingalungitut iglugasaksoanginut itteromangilagut, akkianulle pijomavogut Gibeamut.

¹³ Oᴋarporlo nukapiaᴋotiminut: ᴋait, sivumuarta kaglilerᴋovluta iniksamut siniktarviptingnut, Gibeamullonêt Ramamullonêt.

¹⁴ Sivumuarpullo arvertarlutiglo, seᴋinerlo nippivok Gibeab Benjaminemêtub ᴋanitanganêtillugit.

¹⁵ Sâlerpullo tagvunga, itteromavlutik siniktaromavlutiglo Gibeame. Itteramele ingipok iglugasaksuit apᴋosininganut; siniktarᴋojijoᴋalaungimat tapkoninga unuarme iglomine.

¹⁶ Ahâglo, tagva angut îtok ᴋaivok sullinerminit perorsêvingmit unnuame; Tamnatauk Efraimib ᴋakᴋanginit pilaukpok, tujormijolunelo Gibeame; iglugasaksuille inungit Jeminib ᴋitorngarivait.

¹⁷ Takosaramelo, takolunelo tujormijomik apkosinermêtomik iglut akkorngane, oᴋautiva: Namungâromavît, nakillo pivît?

¹⁸ Tapsomale oᴋautiva: Bethlehemit Judametomit pivogut, ingergarlutalo Efraimib ᴋakᴋangata ikkianganut nunaᴋarvimnut; Bethlehemullo Judametomut ailaukpogut, ailungalo mânna Nâlekab iglunganut, siniktarviᴋarᴋojijoᴋangilarlo uvamnik.

¹⁹ Iviᴋarpogut nerᴋiksaᴋalutalo siuteᴋoktojoᴋotiptingnut, Niaᴋojakalutalo, Weinekalaptalo uvamnut kivgarnullo arnamut, nukapiamullo kigavit ilagijagingnut; ajoksarniangilagut sunamik.

²⁰ Itôk tamna oᴋarpok: Ullapirsauteᴋarit! Kingomajattit tamaita naipipattit uvamne; unnuakulle iglut akkorngane apᴋosinermetuinarniarnak.

²¹ Tasiorpâlo iglominut, siuteᴋoktojuglo Nerripᴋautiksamik tunnitsivigivak, itigatiglo ubvarpait, nerrilutiglo imerlarmiglo.

²² Ommatingille serridlartillugit mânna, ahâk, tagva iglugasaksuit inungit uivêtoâluit tikkiput, iglulo illumavât, avilortarlutiglo upkoamut, oᴋarlutiglo îtomut, iglub angajoᴋanganut: Angut iglungnut tikkitok annitileruk, illitarksilerᴋovluta tapsominga.

²³ Angulle iglub angajoᴋanga annivok tapkonunga, oᴋautilugillo: Aukak ᴋatangutikka, taimak idluitulliniarase; angut tamna itterlauᴋârmat iglumnut, taimaitomik sillaineᴋartitsiniarase.

²⁴ Ahâk panneᴋarpunga uigasôjomik sulle, tamnalo pannervgaᴋarpok, tapkoa anititsomavâka illipsingnut, tapkoa unêt sujuktitsungnarpasse, pinniarvigisigiglo pijomajapsingnik; angulle tamna sillainermik taimaitomik pinniarviginiarasiuk.

²⁵ Inuille Nâlegomalaungilât. Tagva angutib tapsoma pannervgane tiguva annitilâlo, tamna illitarilerpât, attornerluglugolo unnuak nâlugo, ᴋauk tikkilugo; uvlogatâlermallo aularᴋovât.

²⁶ Tagva arnak tamna uvlogatâlertillugo ᴋaivok, pâlaklunelo iglub angajoᴋame najortangata upkoangata sânganut, nallalunelo tagvane ᴋaulermariᴋârtinnago.

²⁷ Angajoᴋangalo uvlârme makkimat, iglublo upkoanga upkuêrmago, anningmallo aularomavlune; ahâk, tagva pannervganga nallavok iglub upkoangata sângane, aggangillo ᴋataub manoanganêlaukput.

²⁸ Tapsomale oᴋautiva: Makkitit, aulartalo. Tamnâle kiolungilak. Tagva siuteᴋoktojoᴋotiminut illiva, parngnailerpok aularlunelo nunagijaminut.

²⁹ Angeraramelo mânna, savik tiguva, pannervganelo tigumiarlugo pivok, avgorpalo sauningit illaliudlugit 12 ôlivlugolo, tillikliutilaitalo Israelib kiglilervinginut tamainut.

³⁰ Kinalo takolauktok tamattominga, tamna oᴋarpok: Taimaitomik takojoᴋalaungilak, pijoᴋalaungilarlo, Israelib ᴋitorngangita aularninganit Egiptenemit, uvlok tamânna tikkilugo. Mânna tamânna isumaksarsiorutigisiuk, atanioriarluselo, oᴋarluselo isumapsingnik.