Idluarsaijut 18 - Labrador Inuttitut Heritage Bible

Danekut Laise aksarnigarivait, kivgartorneᴋartitsivullo tagvane Gûdingoarmik.

¹ Nalliutome taipsomane ataneᴋalaungilak Israeleme. ᴋitorngarêllo Danekut kingormgutijaksamik nunagijungnartamingnik ᴋenerasuarput; uvlorle tamânna tikkidlugo kingormgutijaksangat nallautaulaungilak sulle tapkonunga, Israelib ᴋitorngarêngita akkorngane.

² Daniblo ᴋitorngangit abvakungnermingnit, kiglilervingmingnit Zareamit Esthaolemillo tilliklerput angutinik tallimanik sorsugungnartunik, nunna nautsertoriarlugo, ᴋemergolugolo, oᴋautivaillo: Aularitse, nunnalo nautsertoriarsiuk. Tikkipullo Efraimib ᴋakᴋanginut, Michab iglunganut, sinniktarlutiglo tagvane.

³ Michablo iglomioᴋattinginêdlutik nukapiab Leviteôjub nippinga illitarivât; sâlerpullo tapsomunga, oᴋautivâllo: Kia ovunga âlauᴋâtit? Sunamik sullijaksaᴋarkît mâne? Sunaᴋarᴋîllo mâne?

⁴ Tapsomalo kiovait: Imâglo, imâglo Michab pinniarvigilaukpânga, attartorlungalo ajuᴋertuijoᴋutauᴋovlunga tapsomunga.

⁵ Tapkoa oᴋautivât: Naglingnartotit, Gûde apperiuk tukisilerᴋovluta, apkosinivut arvertarvigijavut sullinaralloarmangât?

⁶ Ajuᴋertuijub kiovait: Aularitse ullapirsauteᴋarluse; apkosinise arvertarvigijase idluarpok Nâlekab sângane.

⁷ Tagva angutit tallimat tapkoa aularput, tikkilutiglo Laisemut, takolutiglo inuit tagvanetut terlingmatta, sorlo Zidonemiut illusingittitut, uimajaratik terliklutiglo; tagvanelo kiksartitsijoᴋalaungilak tapkoninga, kinakalaungilarlonêt angajoᴋaujomik tapkonunga; ungasidlalaukpullo Zidonemiunit, inuillo sullivigilaungilait.

⁸ Utterpullo ᴋatangutimingnut Zareamut Esthaolemullo; ᴋatangutingitalo oᴋautivait: ᴋanok illingavise?

⁹ Tapkoa oᴋarput: Attaik! Takpaungalerta; nunâle tamna ᴋemergolaukpavut, ahâglo, ânanaudlarpok. Tamânna pivlugo tuavititse aularluselo, erkinaulugasse, tikkiᴋovluse tagvunga, nuna tamna aksarnigarilugo.

¹⁰ Takpaungarupse inuᴋatigêksoarnut terliktunut tikkiniarpose; nunalo angijôvok, Gûdib tunningmago aggapsingnut; nuna imaitok, ajoksarnarlungitok sunamik nunametomik.

¹¹ Tagva aularput tagvangat, Danib abvakunginit, Zareamit Esthaolemillo, angutit 600 dit, oppalungairlutik sakkomingnut unatadlarnermut.

¹² Takpaungarpullo, tangmarlutiglo Kireat-Jearimeme Judametome. Tamânna pivlugo inne tamânna tailaukpât Danib tangmarvinganik uvlok tamânna tikkilugo, Kireat-Jearimib ungatanêtok.

¹³ Tagvangallo aivut Efraimib ᴋakᴋanginut, tikkilutiglo Michab iglunganut.

¹⁴ Tagva angutit tallimat aularlauktut, nunamik Laisemik nautsertorlutik, kiovut, oᴋarlutiglo ᴋatangutimingnut: ᴋaujimagivise iglune tamakkonane pitaᴋarmat ikkiarmik ivsornaitovingmiglo, adsingoarmiglo, Gûdingoarmiglo? Mânna isumaksarsiorungnarpose ᴋanok pinniartuksaunipsingnik.

¹⁵ Tapkoa tagvunga itterput, tikkilutiglo nukapiab Leviteôjub iglunganut, tagva Michab iglunganut, salutipâllo pitsiarlutik.

¹⁶ Tapkoalo 600 dit oppalungairsimajut sakkumingnut, Danib ᴋitornganginit pijut, nangerput upkoaksub sillatâne.

¹⁷ Angutillo tallimat nunamik nautsertorialauktut, takpaungarput tikkilutiglo tagvunga, tigusilutiglo adsingoarmik, ikkiarmiglo, ivsornaitovingmiglo, Gûdingoarmiglo; taimailiortillugit ajuᴋertuijok nangerpok upkoaksub silâtane 600 dine, oppalungairsimajune sakkomingnut unatadlarnermut.

¹⁸ Tapkoa Michab iglunganut pingmatta, tigusingmattalo adsingoarmik, ikkiarmiglo, ivsornaitovingmiglo, Gûdingoarmiglo, ajuᴋertuijub oᴋautivât: Suvise ovane?

¹⁹ Tapkoa oᴋautivât: Nippangerit, ᴋanîllo epummeruk, aularᴋattigilutalo, atâtauᴋovlutit ajuᴋertuijoᴋovlutillo uvaptingnut. Namanersauva illingnut angutib atausênaub iglungane ajuᴋertuijoguvit, Israeliblonêt ᴋitorngarêngita abvakungitalo illangane illuitome?

²⁰ Ajuᴋertuijub tamânna ᴋuviagiva, tigusilunelo ikkiarmik, ivsornaitovingmiglo adsingoarmiglo, ailunelo inugasaksuit akkornganut.

²¹ Utterlutiglo aularlauramik sorrutsit nergjutillo Pivianartoᴋottitiglo sivorlerᴋovait.

²² ᴋaningitomêmatta mânna Michab iglunganit, tagva angutit iglunit, Michab iglungita ᴋanitanganêtunit, katimalerput, malliklutiglo Danib ᴋitornganginik, nipliutidlarlugillo Danib ᴋitorngangit.

²³ Tapkoale kênatik ᴋeviarpait, oᴋarlutiglo Michamut: Suniarpît, taimaitomik kaggûdlarneᴋartitsigavit?

²⁴ Tamna kiovok: Gûdigijakka sanalauktakka tigulaukpase, ajuᴋertuijorlo, aularluselo; sunaᴋarᴋîk mânna sulle? Illipselo appertsorpose sulle, suniarnimnik?

²⁵ Danible ᴋitorngangita oᴋautivât: Nippît Tusartauᴋoniarnago uvaptingne, opaktauᴋonnak angutinut ningartunut; tarnit, iglomioᴋattivillo tarningit pêjartauᴋonagit.

²⁶ Taimak Danib ᴋitorngangit sivumuarput apᴋotimingne. Michalo takkolaurame songoluarmatta tapsomunga, utterpok tikkimilunelo iglominut.

²⁷ Tapkoale tigusivut Michab sanalauktanganik, ajuᴋertuijomiglo pigilauktanganik, tikkilutiglo Laisemut, inuᴋattigêngnut uimajangitunut, terliktunullo, ullimârpaillo saviksub kênanganut, iglugasaksuillo ikkipait ikkomamut;

²⁸ Piuliklertoᴋalaungilarlo tapkoninga, Zidonemit ungasilaungmatta, inuillo sullivigilaungilait, naksarmelaukpullo Beth-Rehobemetome. Tagvane iglogaselliorput nunaᴋarlutiglo tagvane.

²⁹ Atserarpaillo Danemik, atâtagijatik Dan, Israelib ernerijanga malliklugo. Iglugasaksuillo tapkoa sivorngagut ateᴋalaukput Laisemik.

³⁰ Daniblo ᴋitorngangita, pivlutik adsingoak taimna nappartipât. Jonathanelo, Gersonib Mânnasib erningata erninga, erningillo ajuᴋertuijôlaukput ᴋitorngarêt Danekut akkorngane, nalliutok tamna tikkilugo parngnanairsortauvlutik aulartitauᴋârtinagit nunnamit.

³¹ Taimaglo adsingoak Michab sanajauᴋolauktanga pitipât akkonamingnut, taimak akkunêrtigijomik Gûdib iglungata Silomelaungningatut.