Idluarsaijut 17 - Labrador Inuttitut Heritage Bible

Micha kivgartorneᴋartitsivok Gûdeungitomik.

¹ Anguteᴋalaukpok Efraimib ᴋakᴋangine Michamik atelingmik.

² Tamna ananâminut oᴋalaukpok: Silberlingit 1,100 dit tigujaumajut illingnit, oᴋautelugjutigilauktattillo siutingma sângangne, ahâk kênaujat tapkoa uvamnêput, uvanga tigulaukpakka. Tagva anânanga oᴋarpok: Saimartitaulerit ernîk Nâlekamut.

³ Taimak Silberlingit 1,100 dit tapkoa tunnilaurivait anânaminut. Anânanga oᴋarpok: Kênaujat tapkoa perᴋutautilaukpakka aggamnit Nâlekamut, ernera pivlugo, adsingoarmik Gûdingoarmiglo sanajoᴋarᴋovlugo; taimaimat tunnilerivakka mânna illingnut.

⁴ Tapsomale kênaujat tunnigivait anânaminut. Tagva anânangata tiguvait Silberlingit 200 dit, tunnilaitalo sabviortemut Goldemik; tamna sanavok tapkonangat adsingoarmik, Gûdingoarmiglo, tamânna kingorngane Michab iglunganelaukpok.

⁵ Angullo tamna Micha taimak igloᴋalaukpok Gûdelingmik, sanalunelo ikkiarmik ivsornaitovingmiglo, ernimelo illangat saimarsarpa, ajuᴋertuijoᴋovlugo tapsomunga.

⁶ Nalliutome taipsomane ataneᴋalaungilak Israeleme, ilûnatigle attunît pinniarlaukput idluarasugijamingnik.

⁷ Inosuktoᴋalaukporlo angumik Bethlehememit Judametomit, Judakut akkorngane, tamna Leviteolaukpok, tujormiolaukporlo tagvane.

⁸ Aularporle iglugasengnit Bethlehememit, Judametomit, ingergaromavlune pijungnartaminut. Ingergarlaukporlo Efraimib ᴋakᴋangine, Michablo iglunganut pingmat,

⁹ Michab apperiva: Nakit pivît? Tamna kiovok: Leviteôvunga Bethlehemit Judametomit, ingergarlungalo namut pijungnartamnut.

¹⁰ Michable oᴋautiva: Uvamnêtsainarit, atâtaujuksauvotit uvamnut, ajuᴋertuijojuksaulutillo uvamnut; Jârine tamaine tunnitsivigijomavagit Silberlingnik 10 nik, annoraksarniglo, nerᴋiksarniglo. Levitelo taimak tagvunga pivok.

¹¹ Levitelo tamna tagvanêtsomalerpok angutime tapsomane; tapsomalo nukapiak tamna ernermitut pinniarvigilaukpa.

¹² Michablo Levite saimarsarpa, ajuᴋertuijoᴋovlugo tapsomunga; taimaglo Michab iglunganêtuarpok.

¹³ Michalo oᴋarpok: Mânna ᴋaujimavunga Nâlekab ajungitulliviginiarmanga, ajuᴋertuijoᴋuteᴋarama Leviteôjomik.