Idluarsaijut 16 - Labrador Inuttitut Heritage Bible

Simsonib kattengninga, ajulerninga, akkiniarningalo kingorlerpâk.

¹ Simson ailaukpok Gasamut, takovalo tagvane arnak anguniarpaktok, ittervigivalo.

² Tagva Gasamiut oᴋautsaulerput: Simson ittersimavok tamaunga. Illumavâllo udsertortauᴋolugolo unnuak nâlugo iglugasaksuit itterviksoangane, unnuarlo nâlugo innilangalaukput, oᴋarlutiglo: ᴋaupat, ᴋaumalerpat toᴋotsomavavut.

³ Simsonele innilangalaukpok unnuab ketterarninga tikkilugo. Tagva unnuab ketterarningane makkipok, iglugasaksuillo itterviksoangata upkoaksoagik tamarmik tiguvak, nappajugik illaliudlugik, kiviklugiglo saneroangit illaliudlugit, pitilugillo tuingminut, erksuglaitalo ᴋakᴋab Hebronib sânganetub ᴋânganut.

⁴ Kingorngane arnak ungagilerpa, kôngme Sorekeme, Delilamik atelik.

⁵ Tapsomunga Filisterit ataningit takpaungarput, oᴋautilâlo: Tillioruk issumasiorlugolo, naukut taimak angijomik pitsartuneᴋarninganik, sunamullo sâlagijungnarmangaptigo, ᴋellaksorᴋovluta tapsominga makkutilugolo; tagva attunît tunnitsivigijomavaptigit Silberlingnik 1,000 dinik 100 diniglo.

⁶ Delilalo Simsonemut oᴋarpok: Nagliktara oᴋautilaunga sukutsikut taimak angijomik pitsartuneᴋarnernik, sunamullo ᴋellaksortaujariaᴋarkît makkutijauᴋovlutit?

⁷ Simsonib oᴋautiva: ᴋellaksortaunajaruma aklunanut 7 inut, nappartub ameranganit nutamit pannersimangitomit sanamajunut; tagva sangêlerajarpunga, inuktullo asiptut înajarpunga.

⁸ Tagva Filisterit ataningita aklunat 7 it nappartub ameranganit nutâmit sanamajut, pannerlungitut sulle âpait tapsomunga, Delilablo ᴋellaksorpa tapkonunga.

⁹ (Inningatale aiparusingane udsertortoᴋalaukpok tapsominga.) Tapsomalo oᴋautiva: Filisterit illingnut pivut, Simson! Tapsomale aklunât taipkoa kiktorautivait, sorlo aklunarârsuk kiktorangmat îkkomamut pilerpat; tukisijaulungilarlo pitsartuninga nakit pingmangat.

¹⁰ Tagva Delila Simsonemut oᴋarpok: Ahâk mittagvigivarma Sagloᴋilungalo; mannâle oᴋautilaunga, sunamut ᴋellaksortaujungnarᴋît?

¹¹ Tamnalo oᴋarpok tapsomunga: ᴋellaksortaunajaruma aklunânut nutânut, attortaulaungitunut sulle kinamut, tagva sangêlerajarpunga, inuktullo asiptut înajarpunga.

¹² Tagva Delilab aklunât nutât tiguvait, ᴋellaksorpâlo tapkonunga, oᴋarlunelo: Filisterit illingnut pivut, Simson! (udsertortoᴋalaukporle tapsominga inningata aiparusingane) tapsomalo kiktorautivait ivaluksatut sorlo.

¹³ Delilale oᴋarpok tapsomunga: Sulle mittagvigivarma, Sagloᴋilungalo. Nagliktara oᴋautilaunga, sunamut ᴋellaksortaujungnarkît? Tamnalo oᴋarpok tapsomunga: Niaᴋungma nujangit ingmigolingajut erᴋesulangajut 7 it pergainajarungne ᴋellaksiutiksamut, atsungertilugolo kikkiangmut.

¹⁴ Tapsomalo oᴋautiva: Filisterit pivut illingnut, Simson! Tamnâle tuppakpok siningnerminit, ᴋellaksutillo pergaimajut, kikkiarlo ᴋellaksiutiksarlo illaliudlugit nutsukpait.

¹⁵ Tagva tapsoma oᴋautiva; ᴋanok oᴋarungnarᴋît nagligigamga, omattivit ilagingigalloarmanga? Pingasuertorlutit mittagvigivarma, oᴋautinangalo sukutsikut taimak angijomik pitsartuneᴋarnernik.

¹⁶ Uvlut tamaitale pagvisarmago oᴋauserminut, oᴋumaiksartimagolo, tarninga nukingêrotilerpok toᴋo tikkilugo.

¹⁷ Omattinelo tamât oᴋautigiva tapsomunga oᴋautilugolo: Kipsautingnik pijoᴋalaungilak sulle niaᴋumnut; angernerijangôgama Gûdemut anânama timinganit. Sallinajarumga, tagva pitsartunera nulerajarpok uvamnit, sangêlerajarlungalo, inuillo asingititut ilûnaititut înajarlunga.

¹⁸ Delila tukisilerame mânna omattine tamât nallonarungnaitilaungmago tapsomunga, tilliklerpok, ᴋaikᴋojaukolugillo Filisterit ataningit, oᴋautsaukolugillo: Ama takpaungarmititse, omattine tamât nallonarungnaitilaungmago uvamnut. Tagva Filisterit ataningit takpaungarput tapsomunga, neksarlutiglo kênaujanik taipkoninga aggangmingne.

¹⁹ Sinniᴋovalo sâmine, ᴋaikᴋojilunelo salliniartomik tapsoma niaᴋungata nujanginik erkesulangajunik 7 nik. Makkutilerpalo. Tagva pitsartuninga nusimajarêrpok tapsomangat.

²⁰ Tapsomalo oᴋautiva: Filisterit illingnut pivut, Simson! Tuppakamelo issumakalerpok: Annijomavunga, sorlo piᴋatarlaurama nutsugomalungalo; ᴋaujimânnanelo Nâlegak nusimangmat tapsomangat.

²¹ Filisterille tiguvât, kappitsivigilâllo ijigingnik, attersartipâllo Gasamut, ᴋellaksorpâllo ᴋellaumgujanut maggûinut kannujarnut; parngnanaisimavingmelo serᴋalitsijuksaulaukpok.

²² Niaᴋungatale nujangit, sallijaulauktut perorlerivut.

²³ Filisterille ataningit katimaleramik Gûditik Dagon tunnergutiksamik âtsivigijomavlugo, ᴋuviasugomavlutiglo, oᴋarput: Gûdipta omigijivut Simson tunnilaukpa aggaptingnut.

²⁴ Taimaktauk, inugasaksuit takogamitsuk, Gûditik nakoridlarpât oᴋaramik: Gûdipta omigijivut tunnilaukpa aggaptingnut, nunaptingnik asseroilauktok, toᴋotsilauktorlo unnuktunik uvaptingnit.

²⁵ Omattingillo ᴋuviasudlalaungmatta mânna, oᴋarput: Simson aijaule, pingoarᴋovlugo sâptingne. Tagva Simson aivât parngnanaisimavingmit, pingoarporlo sângine, tapkoalo pitipât nappajuk maggûk akkonigingnut.

²⁶ Simsonele nukapiamut tasiortiminut aggangmikut oᴋarpok: Perᴋolaunga nappajungnik, iglub sukkagingnik aktuiᴋovlunga, egarᴋovlunga tapkongnunga.

²⁷ Iglole tattidlalaukpok angutinik arnaniglo. Filisterit ataningit ilûnatik tagvanelaurivut, iglublo ᴋângane pitaᴋalaurivoktauk angutinik arnaniglo 3,000 dioᴋasangnik, takonarlauktunik Simsonib pingoarninganik.

²⁸ Simsonible Nâlegak nipliarvigiva oᴋarlunelo: Nâlegak, Nâlegak erᴋaringa; pitsartutilungalo Gûde, ama tamattomane, ijikka pivlugik akkinniarᴋovlunga Filisterinik.

²⁹ Nappajuglo ᴋerkᴋanetuk, iglublo tungavigijangak sukkagiglo tiguvak, aipanga tallerpingminut, aipalo saumingminut,

³⁰ Oᴋarlunelo: Toᴋolanga Filisterit tapkoa illagillugit; oᴋungalunelo pitsartunerminut tamânut. Tagva iglo immikpok, atanernut inugasaksoarnullo tamainut illuanêlauktunut. Taimak toᴋongajut, toᴋongane toᴋotaulauktut, unnurnersaulaukput toᴋolauktaminit inosermine.

³¹ Tagva ᴋatangutingit, atâtamelo iglomioᴋotingit ilûnatik attersarput, tiguvâllo âlâllo takpaunga, illijartorlugolo atâtame Manoab illuvinganut, Zareab Esthaoliblo akkonigingnetomut. Israelitinigle idluarsailaukpok jârinik 20 ginik.