Idluarsaijut 15 - Labrador Inuttitut Heritage Bible

Simsonib Filisterit angijomik ᴋanoêtoᴋartipait terrianianut, siuteᴋoktojublo aglerunganut.

¹ Uvlulle illangita kingorngane kattersiviub Weizenik nalliuningane, pijoᴋalaukpok, Simsonib nuliane nallipsarmago, angusâlloârsungmik tuktungajomik naksarlune. Isumaᴋaramelo: Nuliamnut aijomavunga sinigvingmut; tagva taipsoma atâtangata itterᴋojomalaungila.

² Oᴋarlunelo: Omigijaunasugilaukpara illingnut, tunnilaukparalo ilannârijarnut; nukᴋaᴋarporle ânanauᴋejanganik, tamna piuk, taipsoma inningane.

³ Tagva Simsonib oᴋautivait: Sullijomik pitjutiksaᴋarpunga Filisterinut; ᴋanoêtoᴋartitsomavapse.

⁴ Simsonelo aularpok, tigusilunelo terianianik 300 dinik, tigusilunelo aumalingnik, pamiungillo ᴋellaksorpait attunît aipangata pamiunganut, aumalingmiglo atautsemik pititsivok pamiuk maggûk akkonigingnut.

⁵ Ikkilugillo tapkoa ikkomamut, aitilugillo Filisterit ᴋakᴋojaksakotingita akkornganut, ikkitipaillo taimak ᴋakᴋojaksat kippisimajut, kippitallo kippisimangitullo, perorsêvillo Weineliksat, nappartullo orksuggit.

⁶ Tagva Filisterit oᴋarput: Kina tamattominga pinniarlauᴋa? Tagva oᴋartoᴋarpok: Simson, Thimnatemiub ningaunga; nulianganik aksarlauramiuk, tunnigamiuglo ilannârijanganut. Tagva Filisterit takpaungarput, ôpâlo atâtanga illaliudlugo ikkomamut.

⁷ Simsonible oᴋautivait; Taimailiorlauralloarupse, sulle akkiniaromavapse, kingornganelo nokᴋaromavunga.

⁸ Angijomiglo annaulerpait arriangittigut sibvêangittigullo. Attersarporlo ᴋairosuglo ᴋairtomêtok Ethameme innigiva.

⁹ Tagva Filisterit takpaungarput, Judakullo illumavait, tangmarlutiglo Lehime.

¹⁰ Judakullo oᴋautivait: Sôg takpaungarᴋise sorsugvigiluta? Kiovut: Takpaungarpogut Simson ᴋellaksoromavlugo, pinniarvigilugolo sorlo pinniarvigilaungmattigut.

¹¹ Tagva Judakunnit angutit 3,000 dit attersarput ᴋairosungmut Ethamemetomut, oᴋarlutiglo Simsonemut; ᴋaujimangilatît Filisterit ataniotingmatta uvaptingnut? Sôgle tagva taimaitomik pinniarvigilaukpittigut? Tapsoma oᴋautivait: Sorlo pinniarvigilaungmanga, taimak pinniarvigilaurivakka.

¹² Tapkoa oᴋautivât: Attersarpogut ᴋellaksoromavlutit unertotigijomavlutîllo Filisterit agganginut. Simsonib oᴋautivait: Tagva angervigimarisinga, agviaromanginapsinga.

¹³ Tapkoa oᴋautivât: Agviaromangilaptigit, ᴋellaksoromatuinarpaptigille, tunnilutillo taipkoa agganginut, toᴋotsomangilaptigillo. ᴋellaksorpâllo aklunângnut nutângnut, tessiorlâlo ᴋairtomit takpaunga.

¹⁴ Tikkimallo Lehimut Filisterit kaggûdlarvigivât ᴋuviasumut. Nâlekable Annerningata tikkipa, aklunâglo talligingnelauktuk ivaluksatut îlerpuk, ikkomamut ôtaujotut, ᴋellaksutik aggangine ᴋellarudsarmanik.

¹⁵ Nachvârpalo siuteᴋoktojub agleroa nutâk; tagvalo aggane issakpait, tigulâlo, annaulerlaitalo tapsomunga angutit 1,000 dit.

¹⁶ Simsonelo oᴋarpok: Tagga nallavut katimgajut: Siuteᴋoktojub aglerunganut angutit 1,000 dit annaulersimavakka.

¹⁷ Tamakkoalo oᴋauserijarêramigit aglerok egipâ aggangminit, innelo tamânna taiva Ramat-Lehimik.

¹⁸ Imerudlaramele Nâlegak nipliarvigiva oᴋarlunelo: Igvit taimak angijomik piulijaunermik tunnijilaukpotit kivgavit aggangittigut; mannâle toᴋojuksauvunga imerungnermut, pijaulungalo kippisimangitut agganginut.

¹⁹ Tagva Gûdib ittersak Lehimetok koppiva, tagvangallo imek kôlerpok. Immerlunelo annerninga utterpok, nekoksijaumalunelo. Tamânna pivlugo taijauvok sulle uvlok tamânna tikkilugo tuksiartub puailavinganik Lehimetomik.

²⁰ Idluarsaivorlo Israelitinik Filisterit nalliuningane jârinik 20 ginik.