Idluarsaijut 14 - Labrador Inuttitut Heritage Bible

Simsonib pinniarnersoanga, nulianingninga, sagvainingalo nallaupsaraksamik.

¹ Simson attersarpok Timnatemut, takolunelo arnamik, Filisterit paningita akkornganne.

² Takpaungaramelo unipᴋarpok tamattominga atâtaminut, anânaminullo, oᴋarlunelo: Arnamik takolaukpunga Timnateme, Filisterit paningita akkorngane; tunnitsivigitinga mânna taipsominga nuliaksamnut.

³ Atatangalo anânangalo oᴋarpuk tapsomunga: Arnakangilâk mânna ᴋatangutivit paningita akkorngane, inuᴋotivillo tamaita akkorngane, aigavit tigusilutillo arnamik Filisterinit kippisimangitunit? Simson oᴋarpok atâtaminut; Tamna tunniuk uvamnut, ijingma pinnaringmakko.

⁴ Atatangale anânangalo ᴋaujilaungilak, Nâlekamit pingmat tamânna; pitjutiksarsiormat Filisterine. Filisterille ataniotivut nalliutome taipsomane Israelitinut.

⁵ Taimak tagva Simson attersarpok atâtanelo anânanelo illagillugik Timnatemut. Tikkimattalo perorsêvingnut Weineliksanik nappartolingnut, ahâk tagva Loeweâraub Errinaloaᴋijarlune pârpa.

⁶ Nâlekablo Annerningata tikkipa, alliktorpâlo tamna, sorlo angusâlloârsuk alliktortaupângmat; sunaᴋaranelonêllo aggangmine. Oᴋalungilarlo atataminut anânaminullonêt pinniarnerilauktaminik.

⁷ Unnungalo pigame arnak oᴋarᴋattigiva, Simsoniblo pinnariva ijingminut.

⁸ Uvlullo illangita kingorngane tikkilerivok nulianigomavlugo, sangulunelo apkomit Loewevinek ᴋemergojomavlugo; ahâk igupsaujartoksoaᴋarpok tagva Loewevinerme orksoᴋalunelo.

⁹ Tigusilaukporlo tagvangat, nerrilunelo apᴋome, ailunelo atâtaminut anânaminullo, tunnitsivigivâglotauk nerriᴋovlugik. Oᴋautingilâgle orksuk tigulauramiuk ᴋellovinermit Loewemit.

¹⁰ Atâtangalo attersarêrmat arnamut tapsomunga, tagva Simsone nuliarêlitainarnerminut nerrimârneᴋartitsivok, sorlo angutit inûsuktut pivangmatta.

¹¹ Takogamitsuglo illaᴋartipât tapsomanetuksanik 30 ginik.

¹² Simsonible oᴋautivait: Nallaupsaraksamik oᴋautijomavapse; tamânna nallaupsarupsiuk nallaugupsiuglo, nuliarêlitainarniub uvloksiorviksangine 7 ine tamakkonane, tagva tunnitsivigijomavapse uvinerᴋunik 30 ginik, annoratsianiglo uvloksiorviksiutinik 30 ginik.

¹³ Nallaujungnangikupsiugle, tagva illipse tunnitsivigijaksarivapsinga uvinerᴋunik 30 ginik, annorâtsianiglo uvloksiorviksiutinik 30 ginik. Tapkoalo oᴋautivât: Nallaupsaraksat oᴋautigiuk, tussarᴋovluta mattominga.

¹⁴ Tapsoma oᴋautivait: Nerᴋiksamik annijoᴋalaukpok nerrijoksoarmit, mamaksaumiglo sangijomit. Uvlunnelo pingasune nallaupsaraksak nallaujungnarlaungilât.

¹⁵ Uvlullo 7 ingane Simsonib nulianga oᴋautivât: Uit tillioruk oᴋarᴋovlugo uvaptingnut nallaupsaraksab tukinganik, ubvalo igvit atâtavillo iglomioᴋattingit illaliudlugit ikkomamut ôniarpaptigit. Inalaukpittigut ovunga aklulertitsomavluta? Taimaingilârlonêt?

¹⁶ Tagva Simsonib nulianga ᴋugviorpok tapsoma sângane, oᴋalunelo: Omigivarma nagligingilarmalo. Inuᴋotima ᴋitornganginut tunnijilaukpotit nallaupsaraksamik, oᴋautilaungilarmalo mattominga. Tapsomale oᴋautiva: Oᴋautigilaungilara atâtamnut anânamnullo, oᴋautigijaksarivigolo illingnut?

¹⁷ Tamnalo nuliarêlitainarnimik uvloksiorvingine ᴋugviutsainarlaukpok sângane; uvlulle 7 ingane oᴋautiva, pagvisadlarmago. Tapsomalo nallaupsaraksak oᴋautigiva inuᴋotime ᴋitornganginut.

¹⁸ Tagva iglugasaksuit angutingita oᴋautivât uvlut 7 ingane, seᴋinek nippilerkârtinago: Suna mamanersauva igupsaujartut orksunginit? Sunalo sanginersauva Loewemit? Tapsomale oᴋautivait: Poagrejarlaungikupse nochaᴋotimnut nallaupsaraksara nallaunajalaungilasse.

¹⁹ Nâlekablo Annerningata tikkipa, tamnalo atersarpok Askalonemut, angutillo 30 git annaulerpait, tigulaitalo annorângit, annoratsiallo tunnivait tapkonunga nallaupsaraksamik nallautsilauktunut. Ningarnerminelo ilûngertulerpok, takpaungârlunelo atâtame iglunganut.

²⁰ Simsonible nulianga tunnijaulaukpok tapsoma aiparilauktangita illanganut, ilannârijatut attorlauktaminut.