Idluarsaijut 13 - Labrador Inuttitut Heritage Bible

Simsonib oᴋautauninga inulerningalo.

¹ Israeliblo ᴋitorngangit idluitulligannerput Nâlekab sângane; Nâlekablo tunnilaukpait Filisterit agganginut jârit 40 git nâlugit.

² Anguteᴋalaukporle Zareame, Danib abvakungita illanganit pijomik, Manoamik atelingmik; nuliangalo ᴋitorngisuilaukpok, ernilaungilarlo.

³ Nâlekablo Engelingata arnak tamna sakᴋervigiva oᴋautilugolo: Ahâk ᴋitorngisuipotit, ernilungilatillo sunamik; singailerniarpotille, erniniarlutillo ernermik.

⁴ Tagva udsertorit mânna, Weinemik pitsartojomiglonêt imiksamik imerᴋonak, nerriᴋonaglo ivsornartomik.

⁵ Singailerniaravit, erniniarlutillo ernermik kipsautingnut pijaujuksaungitomik niaᴋunganut; nukapiak angerutaumajôniarmat Gûdemut, anâname timinganit; pigiarniarporlo Israelitit piulilugit Filisterit agganginit.

⁶ Tagva arnak ᴋaivok uinelo unipkautiva tamattominga, oᴋarlunelo: Gûdib anguteᴋotingata tikkipânga, kênangalo tautuᴋalaukpok Gûdib Engelingatut, kappianadlartomik; tamânna pivlugo apperilaungilara, nakit pingmangat namungarniarmangallonêt; oᴋautilaungilângalo ᴋanok ateᴋarnerminik.

⁷ Tapsoma oᴋautivânga: Ahâk singailerniarpotit, erniniarlutillo ernermik. Tagva mânna Weinemik imerniarnak, imiksamiglonêt pitsartujomik, nerrinaglo ivsornartomik; nukapiak angerutaumajojuksaungmat Gûdemut anâname timinganit, toᴋominut tikkilune.

⁸ Tagva Manoab Nâlegak tuksiarvigiva oᴋarlunelo: Nâlegak, Gûdib anguteᴋotinga tillilauktat, ᴋailaungmile uvaptingnut, ajuᴋertuiᴋovlugo uvaptingnik pinniaraksaptingnik nukapiame erniangoniartome.

⁹ Gûdiblo Manoab nippinga tussarpa; Gûdiblo Engelingata arnak tikkiniva. Iksivalaukporle perorsêvingme, uingalo tapsomanêlaungilak.

¹⁰ Tagva tuavidlune akpangerpok, unipᴋarlunelo tamattominga uiminut, oᴋarlunelo: Ahâk angutib uvlome tikkilauktama sakᴋervigivânga.

¹¹ Manoalo niᴋovipok malliklunelo nuliaminik, tikkilarmelo angumut tapsomunga, oᴋautilâla: Igvit anguteôvît tamna oᴋarᴋataulauktok arnamut omunga? Tamna oᴋarpok: Ahaila.

¹² Manoalo oᴋarpok: Oᴋauserilauktatit malliklugit pijoᴋarniarpat; ᴋanoêtunik nukapiak illuseᴋartuksauva, pinniartuksaulunelo?

¹³ Nâlekab Engelinga Manoamut oᴋarpok: Tamainik oᴋauserilauktamnik arnamut, ulloreasuktuksauvok;

¹⁴ Nerrijuksaungilak nappartomit Weineliksamit pijomik, imertuksaungilarlo Weinemik, imiksamiglonêt pitsartujomik, nerrijuksaungilarlo ivsornartomik; tamaita oᴋauserilauktakka tapsomunga (arnamut) malligaksarivait.

¹⁵ Manoalo Nâlekab Engelinganut oᴋarpok: Naglingnartotit, ovanesâlaurit, angusâlloârsumik tuktungajomik âkᴋiksoijomavogut illingnut.

¹⁶ Nâlekable Engelingata Manoa kiova: Ovaneᴋogalloarumga, sulle nerᴋiksaᴋotitit nerrilungilakka. Nâlekamulle tunnergutiksamik ikkoalajaksamik tunnijijomaguvit, tagva taimailiorungnarpotit. Mannoa ᴋaujilaunginame Nâlekab Engelegingmago.

¹⁷ Manoalo Nâlekab Engelinganut oᴋarpok? ᴋanok Ateᴋarᴋît? nertordlerᴋovlunuk illingnik, oᴋauserilauktatit malliklugit pijoᴋarniarpat.

¹⁸ Nâlekable Engelingata oᴋautiva; Sôg attera pivlugo apperivinga, tattamnadlaralloartok?

¹⁹ Tagva Manoab angusâlloârsuk tuktungajok tiguva, tunnergutiksarlo nerᴋiksak, tunnilâlo Nâlekamut ᴋairtome; tapsomalo (Engelib) sanava tattamnadlartomik. Manoalo nuliangalo takonârpuk.

²⁰ Ikkomalo ikkoalangmat Altaremit kôngmut ᴋillangmut, tagva Nâlekab Engelinga Altarib ikkoalaningagut ᴋongmuarpok. Manoab nuliangatalo tamânna takolauramikko, pamakterpuk nunamut ᴋênatik puvlugik.

²¹ Nâlekablo Engelinga sakᴋijarungnaipok Manoamut nulianganullo. Tagva Manoa tukisivok Nâlekab Engelegingmago.

²² Manoalo oᴋarpok nuliaminut: Toᴋotaksauvoguk illa, Gûde takolauraptigo.

²³ Nuliangatale kiova: Nâlegak issumaᴋarune toᴋotsomavlunuk, tagva tunnergut ikkoalajaksak, tunnergullo nerᴋiksak illelliorajalaungilâk aggaptingnit; taimaitomiglo taimainik sakᴋertitsiviginajalaunginivâtiguk tussarᴋonanuglonêt taimaitomik, sorlo mânna pilaungmat.

²⁴ Arnablo ernek erniariva, atserarpâlo Simsonemik. Nukapiarlo aglisivalliavok, Nâlekablo saimarpa.

²⁵ Nâlekablo Annerninga pigiarpok tesiorlugo Danekut tangmarvingane, Zareablo Esthaoliblo akkorngangne.