Idluarsaijut 12 - Labrador Inuttitut Heritage Bible

Efraimekut akkerartorningat sâlagijauningallo.

¹ Efraimekullo katimalerput, ailutiglo avunga, oᴋarlutiglo Jeftamut: Sôg unatadlarnermut Ammonib ᴋitornganginut ailaukît, ᴋaikᴋolaungilaptigullo, aiᴋatauᴋovluta? Igloᴋotit illaliudlutit ikkitsomavavut ikkomamut.

² Jeftab oᴋautivait: Uvanga inuᴋotikkalo angijomik Pitjutiksaᴋalaukpogut Ammonib ᴋitornganginut; nipliutilaukpapselo piulilaungilapsingale agganginit.

³ Takolauramalo ikkajoromalaunginapse, tarniga pitilaukpara aggamnut, ailungalo Ammonib ᴋitornganginut, Nâlekablo tunnilaukpait aggamnut. Sôgle mânna mojorarvigivisinga, sorsugiarvigilunga?

⁴ Jeftablo angutit Gileademetut katterᴋovait, Efraimekullo sorsugvigivait. Angutillo Gileademiut Efraimekut ullimarpait, tamânna pivlugo, oᴋarmatta: Illipse Gileademiojose, Efraimekut Mânnassekullo akkorngane, ᴋemajutitut Efraimekune îtuinauvose.

⁵ Gileademiullo Efraimekut ingiarlugit, Jordanib ikᴋarvinga tiguvât, Efraimekullo ᴋemajut, mânna oᴋalaurunik: Ikᴋârlaulanga, tagva angutit Gileademiut oᴋautivât: Efraimeᴋumiôvît? Kiolaurunelo tagva: Aukak;

⁶ Tagva oᴋarᴋovât: Schibolet, tagva tamna oᴋarpok: Sibolet, oᴋauserijungnarlaungilâlo nâmaktomik. Tagva tiguvât ullimarlugolo Jordanib ikᴋârviane; taimak Efraimekunnit ocholaukput nalliutome taipsomane 42,000 dit.

⁷ Jeftalo idluarsailaukpok Israelitinik jârinik 6 inik. Jeftalo Gileademiok toᴋolerpok, illijartortaulunelo Gileadib iglugasaksoangita illangane.

⁸ Tapsoma kingorngane Ebzan Bethlehemiok idluarsailaukpok Israelitinik.

⁹ Erneᴋalaukpok 30 ginik, paniniglo 30 ginik tunnijivok, 30 giniglo illelliorivok ernerminut; Israelitiniglo idluarsailaukpok jârinik 7 nik,

¹⁰ Toᴋolunelo illijartortaulunelo Bethleheme.

¹¹ Tapsomalo kingorngane Elon, Sebuloneᴋomiok idluarsaivok Israelitinik; idluarsailaukporlo Israelitinik jârinik tallimaujortunik,

¹² Toᴋolunelo illijartortaularmelo Ajaloneme Sebulonekut nunangane.

¹³ Tapsomalo kingorngane idluarsaivok Israelitinik Abdon Hillelib erninga, Pireatonemiok,

¹⁴ Tamna erneᴋalaukpok 40 ginik, ᴋangiaᴋalarmelo 30 ginik, ablangalauktunik siuteᴋoktojut nochangine 70 gine; idluarsailaukporlo Israelitinik jârenik 8 inik,

¹⁵ Toᴋolunelo illijartortaularmelo Pireatoneme Efraimekut nunangane, Amalekiterit ᴋakᴋangane.