Idluarsaijut 11 - Labrador Inuttitut Heritage Bible

Jeftab annerijauninga, sâlaᴋarningalo, angerningalo.

¹ Jefta Gileademiojok, songolaukpok sorsungnerme, tamangainâgaulaukporle. Gileadible Jefta ernetarilaukpa.

² Gileadible nulianga ᴋitorngilaungmat tapsomunga, nuliablo tapsoma ᴋitorngangit inumarioleramik, pingujarpât Jafta, oᴋautilugolo: kingormgujijuksaungilatit atâtapta iglungane, arnab asiata erneringmattit.

³ Tagva ᴋemâvok ᴋatangutiminit, nunaᴋalunelo nuname Tobemik atelingme. katimavullo tapsomunga inuit uivêtut aularᴋattigilugolo.

⁴ Ovaitsiarolo kingorngane Amonib ᴋitorngangita Israelitit sorsugvigivait.

⁵ Amoniblo ᴋitorngangit taimak sorsugialaungmatta Israelitinut, angajoᴋajat Gileademit aivut Jefta aijomavlugo Tobib nunanganit,

⁶ Oᴋautilugolo: ᴋailaurit angajoᴋaulutillo uvaptingnut, sorsuᴋovluta Amonib ᴋitornganginut.

⁷ Jeftable Gileademiut angajoᴋangit oᴋautivait; Illipseungilase omisulauktut uvamnik, pingunilauktullo uvamnik atâtama iglunganit? Mânnalo tikkipapsinga kappianartomênapse.

⁸ Angajoᴋajat Gileademit Jefta oᴋautivât: Tamânna pivlugo mânna tikkipogut ama illingnut, illauᴋovlutit uvaptingnut, ikkajorᴋovlutillo uvaptingnik, sorsukluta Amonib ᴋitornganginut, niaᴋungôᴋovlutillo uvaptingnut, ilûnainut Gileademe nunaᴋartunut.

⁹ Jeftab angajoᴋajat Gileademit oᴋautivait: Aimigupsinga sorsugiarlunga Amonib ᴋitornganginut, Nâlekablo tunniniarpagit uvamnut, tagva niaᴋôjuksauvîk illipsingnut?

¹⁰ Angajoᴋajat Gileademit Jefta oᴋautivât: Nâlegak tussarteôle akkonaptingne pinniarniangikupta oᴋauserijaktut.

¹¹ Taimak Jeftab angajoᴋajat Gileademit ilagivait, inugasaksuillo niaᴋungortipât angajoᴋangortilugolo ingmingnut. Jeftablo tamânna tamât oᴋauseriva Nâlekab sângane Mizpame.

¹² Tagva Jefta tilliklerpok akpartuksanik Amonib ᴋitorngangita ataninganut oᴋautsauᴋolâlo: Susiorvigijaksarivinga tikkinavit nunaga sursugvigilugo?

¹³ Amonib ᴋitorngangita ataningata Jeftab tillijangit kiovait: Tamânna pivlugo, Israelitit Egiptenemit aularlutik nunaga aksarnigarilaungmatsuk Arnonemit Jabokemut, Jordanemullo tikkilutik; tagva mânna sattortautiuk uvamnut ullapirsauteᴋarnerme.

¹⁴ Jeftable ama akpartuksat tillivait Ammonib ᴋitorngangita ataninganut,

¹⁵ Tapkoa oᴋautivât: Jefta oᴋarpok imâk: Israelitit nunamik aksarnilaungilat Moabiterinillonêt, Ammonib ᴋitornganginillonêt.

¹⁶ Egiptenemille aularlauramik Israelitit agvertarlaukput Sunaᴋajuitokut imarbik ivilik suvlulingnik tikkilugo, tikkilutiglo Kadesemut.

¹⁷ Tilliklerlutiglo akpartuksanik Edomiterit ataninganut, oᴋarlutiglo: Nunarᴋut ingergarᴋotigut. Edomiterille ataningata tussarlaungilait. Tilliklerlaurivuttauk Moabiterit ataninganut, tamna ᴋunnulaurivok. Taimak Israelitit Kadesemetuarlaukput.

¹⁸ Agvertarlaukpullo sunaᴋajuitome, Edomiterillo Moabiterillo nunagik kaivalerpakit, tikkilutiglo seᴋerngub nuijarviata nallânit Moabiterit nunanganut, tangmarlutiglo Arnonib akkiane, tikkinatiglo Moabiterit kiglilervinganut, Arnone kiglilerviôngmat Moabiterinut.

¹⁹ Israelitillo tilliklerput akpartuksanik Sihonemut Amoriterit ataninganut, Hesbonemelauktomut, Oᴋautsauᴋolugolo: Nunarkut ingergarᴋotigut inniksaptingnut.

²⁰ Sihonible Israelitit tattigilaungilait ingergarᴋonagit kiglilervikotimigut; inuᴋotinele ilûnaita kattertilaukpait, tangmarlunelo Jazame, Israelitillo sorsugvigilugit pivut.

²¹ Nâlekable Israelib Gûdingata Sihone inuᴋotingit ilûnaita illaliudlugit tunnilaukpait Israelitit agganginut, ullimarniᴋovlugit tapkoninga. Taimak Israelitit Amoriterit, nuname tamattomane nunaᴋalauktut nunangat tamât aksarnigarilaukpât.

²² Amoriterillo kigilervingit ilûnaita aksarnigarilaukpait, Arnonemit Jabok tikkilugo, sunaᴋajuitomillo Jordane tikkilugo.

²³ Taimak mânna Nâlekab Israelib Gûdingata Amoriterit pejârlaukpait inuᴋotime Israelitit sivorngane; igvillo aksaromavigît?

²⁴ Tapkoa aksaraksarivattit, Gûdivit Kamosib pêjartitangit, uvagullo tapkoninga ilûnainik aksarnikoluta Nâlekab Gûdipta pêjartilauktanginik sivunaptingne.

²⁵ Issumavît idluarneᴋarnersaugavit Balakemit Ziporib erninganit, Moabiterit ataninganit? Tamna akkerartorlauralloariva unatadlalauᴋâlonêt Israelitinut?

²⁶ Israelitit mânna jârit 300 dit nâlugit nunaᴋajarêralloarmatta Hesboneme iglugasenginelo, Aroeremelo iglugasenginelo, iglugasaksoarnelo tamaine Arnonemetune? Sôg piulilaungipisigik nalliutome taipsomane?

²⁷ Idluitullivigilaungilagit sunamik, igvillo taimak idluitullivigivarma sorsugiaravit uvamnut. Nâlegak uvlome erᴋartuijôle Israelitit Amoniblo ᴋitorngangita akkorngane.

²⁸ Amoniterille ataningata Jeftab oᴋalaningit tillikliutilauktangit tapsomunga, tussarlungilait.

²⁹ Tagva Nâlekab Annerninga Jeftamut pivok, aularporlo Gileadekut, Mânnaseᴋullo, Mizpakullo Gileademetokut, Mizpamillo Gileademetomit Amonib ᴋitornganginut.

³⁰ Jeftablo Nâlegak angernermik angervigimarikpa, oᴋarlunelo: Ammonib ᴋitorngangit aggamnut tunniniarungne;

³¹ Igluma upkoanganit annijok pachrearlunga, Ammonib ᴋitornganginit ullapirsauteᴋarlunga utteruma, tamânna Nâlekamut illingajuksauvok, tunnergutautitsomavara ikkoalajaksamut.

³² Taimak Jefta ailaukpok Amonib ᴋitornganginut, sorsugvigilugit. Nâlekablo tunnivait tapsoma agganginut.

³³ Ullimarpaillo Aroeremit, Minnite tikkilugo, iglugasaksuit 20 git, perorsêvit nappartolingnik Weineliksanik naternangat tikkilugo, unatadlarnermik angijomik. Taimaglo Amonib ᴋitorngangit mannigotititaulaukput Israelib ᴋitornganginut.

³⁴ Jeftalo tikkilermat Mizpamut iglominut, tagva paninga annivok pachrearlugo, ᴋillautersoalijarlune imgerlunelo, ᴋitorngatualaukporlo, asianiglo erneᴋalaungilak paneᴋalaungilarlonêt.

³⁵ Takogamiuglo annorane allikpa, oᴋalunelo: Panîk miklilertiparma kiksartilungalo! ᴋanera angmarlaurapko Nâlekamut, uttertitsungnangilaralo.

³⁶ Tamnâle oᴋarpok: Atatâk ᴋanît angmarlaurungne Nâlekamut, tagva pinniarviginga sorlo ᴋanerit annilaungmat; Nâlekab akkiniarᴋolauᴋârlutit omigijingnik Ammonib ᴋitornganginik.

³⁷ Atâtaminullo oᴋarpok: Tamattominga pinniarᴋolaunga, tunnitsivigilungalo taᴋengnik maggûngnik, attersarᴋovlunga, majorarᴋovlungalo ᴋakᴋanut, uigasungnera ᴋêagilugo ikkingutikka illagillugit.

³⁸ Tamna oᴋarpok: Ailerit; aikᴋolugolo takᴋengnik Maggûngnik. Tagva aivok ikkingutine ilagilugit, uigasungninelo ᴋêagiva ᴋakᴋane.

³⁹ Takᴋâklo maggûk ᴋângilermanik, utterivok atâtaminut. Tamnalo taimailiorpok sorlo angerlaurame; angumiglo tamna illitarksilaungilak. Tamânnalo piusiolerlaukpok Israeleme,

⁴⁰ Israelitit paningit jârine tamaine annilauramik Jeftab Gileademiub pania oggorilugo uvlut sitamat nalugit.