Idluarsaijut 10 - Labrador Inuttitut Heritage Bible

Israelitit kivgartornek Gûdingoanik pivlugo Filisterinut kappiasuktitaulerput.

¹ Abimelechib kingorngane Thola makkilerpok Israelitit ikkajorlugit, angut Isascharekunit, Puab Dodob erningata erninga. Nunaᴋalaukporlo Samireme, Efraimib ᴋakᴋangine.

² Idluarsailunelo Israelitinik jârenik 23 ginik, toᴋolerlunelo, illuvertaularmelo Samireme.

³ Tapsoma kingorngane makkilerpok Jair, Gileademiok, idluarsailunelo Israelitinik jârinik 22 ginik;

⁴ Ernekalaukpok 30 ginik ablangalauktunik siuteᴋoktojut nochangine 30 gine; iglogasaksoakalaukporlo 30 ginik, ateᴋartunik Jairib iglugasanginik, uvlok tamânna tikkilugo, Gileademêpullo.

⁵ Jairelo toᴋolerpok, illuvertaulaukporlo Kamoneme.

⁶ Israelible ᴋitorngangit idluitullilaurivut Nâlekab sângane, kivgartorlutiglo Baalinik, Astarotemiglo, Siriamiullo Gûdinginik, Zidonemiullo Gûdinginik, Moabiterillo Gûdinginik, Amoniblo ᴋitorngangita Gûdinginik, Filisterillo Gûdinginik, Nâlegarlo ᴋemakpât kivgartornagolo.

⁷ Tagva Nâlekab ningarningata Israelitit ilûngertorutigivait, niorvgotigilugillo Filisterit Amoniblo ᴋitorngangita agganginut.

⁸ Tapkoalo Israelib ᴋitorngangit tullerarpait ullimarlugillo, jâremit taipsomanemit, jârit 18 kasait nâlugit, illa Israelib ᴋitorngangit ilûnaita Jordanib akkianelauktut Amoriterit nunagilauktangine, tagva Gileademe.

⁹ Tamânnalo tappilugo Amonib ᴋitorngangita Jordane Ikᴋârlaukpât, sorsugiarlutiglo Judakunik, Benjaminekuniglo, Eframiblo iglomioᴋotinginik, taimak, Israelitit kappiasuktitaulaungmatta angijomik.

¹⁰ Tagva Israelib ᴋitorngangit nipliarput Nâlekamut, oᴋarlutiglo: Idluitullilaukpogut illingnut: Gûdivut ᴋemalauraptigo, Baalelo kivgartorlaukpavut.

¹¹ Nâlekable Israelib ᴋitorngangit oᴋautivait; Egiptenemiut, Amoriterillo, Amoniblo ᴋitorngangita, Filisterillo,

¹² Zidonemiullo, Amalekiterillo, Moaniterillo, aksorortilaunginivasse, uvangalo ikkajorlaukpapse agganginit, nipliarvigilaurapsinga?

¹³ Sulle ᴋemalaukpapsinga, Gûdillo asingit kivgartorlugit pilaukpose; tamânna pivlugo ikkajoromairpapse.

¹⁴ Aileritse Gûdillo anerijasse nipliarvigisigik; tapkoa ikkajorlise kappiasugvipsingne.

¹⁵ Israelible ᴋitorngangit Nâlekamut oᴋarput: Idluitullilaukpogut, igvit piniarvigituinartigut namagijarnut; kissiane piulitigut nalliutome tamattomane.

¹⁶ Ipperarpaillo Gûdit takorngartat, Nâlegarlo kivgartorpât. Illapsugosutigilaukpalo, Israelitit taimak kappiasuktitaulaungmatta.

¹⁷ Amoniblo ᴋitorngangit nipliadlarput, tangmarlutiglo Gileademe; Israelible ᴋitorngangit katimalerput, tangmarlutiglo Mizpame.

¹⁸ Inugasaksuillo angajoᴋajello Gileademe ingminut oᴋalerput: Pigialertok sorsugiarlune Amonib ᴋitornganginut, tamna niaᴋôjuksauvok, ilûnainut Gileademêtunut.