Idluarsaijut 1 - Labrador Inuttitut Heritage Bible

Kinguvarêt Judakut aulatsivut unatadlarnermik Josua innangêrlugo.

¹ Josuab toᴋongata kingorngane Israelib ᴋitorngangita Nâlegak appertsorpât, oᴋarlutiglo: Kina akkunaptingne unatadlarnermik Kanaaniterinut aulatsijuksauva?

² Nâlegak oᴋarpok: Judakut aulatsijuksauvut tamattominga. Ahâk, nuna tunnimavara agganginut.

³ Tagva Judakut ᴋatangutimingnut Simeonekunut oᴋarput: Takpaungarᴋattigitigut immerautiptingnut, sorsugiarluta Kanaaniterinut, tagva aularᴋataujomagivogut imerautipsingnut. Taimak Simeonekut aularᴋattigivait.

⁴ Judakut mânna takpaungarmatta, Nâlekab Kanaaniterit, Feresiterillo tunnivait tapkoa agganginut, ullimarpaillo Besekeme angutit 10,000 dit,

⁵ Naipipâllo Adoni-Besek Besekeme, sorsugvigivâllo, ullimarpaillo Kanaaniterillo Feresiterillo.

⁶ Adoni-Besekele ᴋemâvok, unangmivâllo, angugamitsuglo, kublugik aggangine, puttoᴋogiglo itigangine nakᴋarpait.

⁷ Tagva Adoni Besek oᴋarpok: Atanit 70 git kippiviomajut kublomingnik aggangine, puttogomingniglo itigangine, kattersoilaukput nerrimârvingma atâne. Sorlo mânna uvanga pinnialaurama, taimak Gûdib akkinniarvigivânga. Atauvorlo Jerusalemut, toᴋolunelo tagvane.

⁸ Judable ᴋitorngangita Jerusalem sorsugvigilerpait, sâlagivaillo, ullimarlugillo saviksub kênanganut, iglugasaksuillo ikkipait.

⁹ Kingorngane Judab ᴋitorngangit attersarput, Kanaaniterit, nunaᴋalauktut ᴋakᴋane seᴋernganelo, nâksanelo sorsugvigilugit.

¹⁰ Judakullo aularput Kanaaniterinut Hebroneme nunaᴋartunut (Hebronele mattoma sivorngagut Kiriath-Arbamik ateᴋalaukpok) Sesailo, Ahimanelo Thalmailo ullimarpait.

¹¹ Tagvangallo aivut Debiremut (Debirele mattoma sivorngane ateᴋalaukpok Kiriath Seferemik)

¹² Kalelo oᴋarpok: Kina Kiriath-Seferemik ullimarniktok sâlaᴋartorlo, tamna panimnik Achsamik tunnitsivigijomavara nuliaksamut.

¹³ Tagva Athnielib, Kenasib, Kaleb nukkangata erningata sâlagivait. Tapsomalo tunnitsivigiva paniminik Achsamik nuliaksamut.

¹⁴ Pijoᴋalaukporlo, tamna ittermat oᴋautsaulaukpok, ᴋenuᴋovlugo atâtaminit perorsêvingmik; akᴋarporlo siuteᴋoktojomit. Tagva Kaleb oᴋautiva: ᴋanoêᴋit?

¹⁵ Tamna oᴋarpok: Saimanermik tunnitsivigilaunga. Perorsêvingmik seᴋernganêtomik tunnitsivigilauramga, tunnitsivigilaungatauk imektalingmik. Tagva tunnitsivigiva imektalingmik, ᴋollâne atânelo.

¹⁶ Keniteriblo Mosesib sakingata ᴋitorngangit, takpaungarput iglugasaksoarnit Palmitalingnit, Judab ᴋitorngangit ilagilugit Judab sunaᴋajuininganut, iglugasaksuit Arademik atigit seᴋernganetomut, ailutiglo, nunaᴋarlutiglo inugasaksuit akkorngane.

¹⁷ Judakullo aularput ᴋatangutitik Simeonekut ilagilugit, ullimarpaillo Kanaaniterit Zefateme, nungupaillo, iglugasaksuillo atserarpait Harmamik.

¹⁸ Tamakkoa tappilugit Judakut Gaza ilagijangit illaliudlugit sâlagivait, Askalonelo ilagijangit illaliudlugit, Ekronelo ilagijangit illaliudlugit.

¹⁹ Nâlekablo Judakut ilagivait, sâlaᴋarᴋovlugit ᴋakᴋanetunik, naksarmiulle sâlagijungnarlaungilait, kikkiengnik aksalloalikuteᴋalaungmatta.

²⁰ Kalelo tunnitsivigivât Hebronemik, sorlo Mosese oᴋalaungmat; tapsomalo aulartipait tagvangat Enakib erningit pingasut.

²¹ Benjaminible ᴋitorngangita Jebusiterit Jerusaleme nunaᴋalauktut aulartilaungilait, Jebusiterille Benjaminib ᴋitorngangine Jerusaleme nunaᴋalaukput uvlok tamânna tikkilugo.

²² Taimaktauk Josefib ᴋitorngangit takpaungarlaukput Bethelemut, Nâlekablo ilagivait.

²³ Josefekullo Bethele, sivorngane Lusemik ateᴋalauktut, nautsertoriartorpait.

²⁴ Nautsertortullo angut iglugasaksoarnit annijok takovât, oᴋautilugolo: Unertotitigut, naukut tikkitsungnarniptingnik iglugasaksoarnut, tagva napkiningnermik pinniarvigijomavaptigit.

²⁵ Unertotimagillo naukut iglugasaksoarnut tikkininganik, ullimarpait iglugasaksoarmiut saviksub kênanganut; angulle tamna, illangillo ilûnaita aularᴋovait.

²⁶ Tagva angut tamna ailaukpok Hetitherit nunanganut, sanalunelo iglugasaksoarnik, taisilunelo tapkoninga Lusemik; sullelo uvlome, uvlorme tamattomane taimak taijauvut.

²⁷ Mânnassekullo Beth-Seanemiut iglugasaksoaᴋattingitalo inungit aulartilaungilait, Taenahemiullonêt iglugasaksoaᴋattingitalo inungit, Toremiullonêt iglugasaksoaᴋattingitalo inungit, Meggidomiullonêt iglugasaksoaᴋattingitalo inungit; Kanaaniterillo nunaᴋalerlaukput nuname tamattomane.

²⁸ Israelitille songolerlauramik Kanaaniterit akkilêjuksangortipait, aulartilaungilaillo,

²⁹ Taimaktauk Efraimekut Kanaaniterit Gaseremelauktut aulartilaungilait: Kanaaniterille tapkoa akkorngane nunaᴋalaukput Gasereme.

³⁰ Sebulonekullo Kitronemiut Nahalolemiullo aulartilaungilait; Kanaaniterillo tapkoa akkorngane nunaᴋalaukput akkilêjuksangortitaumalutiglo.

³¹ Asserekut Akomiut, Zidonemiullonêt, Ahelabemiullonêt, Achsibemiullonêt, Helbamiullonet, Afikemiullonet, Rehobemiullonêt aulartilaungilait;

³² Asserekulle nunaᴋalaukput Kanaaniterit nunamelauktut akkorngane; aulartilaungimattigik.

³³ Naftalikut Bethsemesemiut, Beth-Anatemiullonet aulartilaungilait; nunaᴋalaukpulle Kanaaniterit nuname nunaᴋalauktut akkorngane; Bethsemesemiulle Beth-Anatemiullo akkilêjuksangolerput.

³⁴ Amoriterillo Danib ᴋitorngangit singipait ᴋakᴋanut, naksarnullo tikkitailitipait.

³⁵ Amoriterillo nunaᴋalerput ᴋakᴋane Heresemik atilingne, Ajaloneme, Saalbimemelo. Josefekulle aggangit oᴋumailualilaukput tapkonunga, akkilêjuksangolerpullo.

³⁶ Amoriterillo kiglilervingat takpaungarvingmelaukpok apkome Akrabimut, kairtomillo, kotsiktomillo.