Hosea 9 - Labrador Inuttitut Heritage Bible

¹ Kuviasuklutit, Israêle, ᴋiggertarniarnak inôᴋatigêksoatitut, Gudît tunulugo assiniaravit, assiniarnerub akkiksanga ungagidlarangne senaugaksat issiptervingine tamaine.

² Senaugaksat katjugvingata paungallônêt iptêjaivingata aᴋeartortiniangilait, tâmnalo ajoᴋsalârpoᴋ vainemik nutâmik.

³ Nâlekablo nunangane ineᴋartuksaungilat; Efraimele utertuksauvoᴋ Egiptenemut, nerᴋemiglo ivsornartomik nerrijuksauvut Assiriame.

⁴ Tunergutiksanik vainemik kovisijuksaungilat Nâlekamut, tunergutingillo ôtaksat ᴋuvianarniangilat tâpsomunga: tunergutingit ilingalârput tâpkonunga sorlo ogguartut nerᴋiksanginik; ilûnatik tagvangat nerrijut ivsornartitaulârput: nerᴋiksangit nangminermingnut ilingalârput, Nâlekab iglunganut itertuksaungilat.

⁵ Kanoᴋ ilingalârᴋisê uvlorme katimaviojome kuksasungnartome, Nâlekablo nerrimârvingata uvlunganê?

⁶ Takoitse, ᴋemâvut asserortaunermit, Egiptenible katersoromârpait: Memfisiblo iluveromârpait: perortut ônartut pigilârpait perᴋutingit silbereojut: ukpigaillo kakilautilit tupinginêlârput.

⁷ Uvlut nelipsaivît tikiput, uvlut akkiniarvît tikiput: Israêlib tamanna ᴋaujilârpâ: nelautaijoᴋ silaitôvoᴋ, angut anernermik pilik issumairutivoᴋ, idluitulinivît unurningit pivlujit, ômisungnerlo angijôdlarmat.

⁸ Efraimib Gude terliarasuarpâ; nelautaijoᴋ tingmiarniartib nigangatut ipoᴋ apᴋotingine tamaine, ômisungnerlo gudingata iglunganêpoᴋ.

⁹ Sôngojomik idluitiput nangminermingnik sorlo Gibiab uvlungine; idluituliningit tâpsoma erᴋaumalârpait, nelipsalârpaillo ajorningit.

¹⁰ Israêle naipilauᴋpara sorlo vaineliksat paungangit sunaᴋajuitome; atâtase takolauᴋpakka sorlo paungatannait innerᴋârtut paungatannaᴋuteme pijariortome: tikilauᴋpulle Baal-peoremut, kangunartomullo ingmikôrtiput, ungagijingititullo maᴋojungnartigijôvut.

¹¹ Efraimib pinnarnarninga tingmiaᴋtut tingisilârpoᴋ: erniangojoᴋarniangilaᴋ, singaijoᴋarniangilaᴋ, pitatsertaujoᴋarniangilarlo.

¹² Kitorngatik perorsâraloarpatigiglônêt, sulle ᴋitorngairutilârpakka, inuᴋarungnaiᴋovlugo: ilâ kapianarmêk tâpkoa aularuma tâpkonangat!

¹³ Efraim taimaipoᴋ sorlo Tirus takosimagapko, nunatsiariktome ilijauvoᴋ: taimaigaloartilugole Efraimib ᴋitorngane toᴋotsijomut anititaksarivait.

¹⁴ Nâlegaᴋ, tunitjivigikit: sumik tunitjijomavêt? Tunitjivigikit igliamik singaijungnangitomik iviangîniglo imuᴋangitunik.

¹⁵ Idluiningat ilûnane Gilgalemêpoᴋ; tagvane ômigivakka: piniarningita idluitoᴋsôningit pivlugit ᴋenugigomavakka iglumnit: nagligijungnairomavakka; angajoᴋâᴋsoangit ilûnatik tapatojoᴋsôvut.

¹⁶ Efraim annaujauvoᴋ, amânga panerpoᴋ, paungatârungnainiarpoᴋ; ilâ, ᴋitorngigaloarpatta sulle igliangita paungangit ungagijaujut toᴋotsomavakka.

¹⁷ Gudima ajaktoromârpait, nâlalaungimatta tâpsominga: saksârtôjomârput inôᴋatigêksuit akorngane.