Hosea 8 - Labrador Inuttitut Heritage Bible

¹ Tiptulaut ᴋanernut pileruk; nektoraliktut Nâlekab iglunganut pivoᴋ; angiᴋatigêngnera tapagingmatsuk, perᴋojakkalo nâlagungnailugit.

² Uvamnut ᴋaigarsugomârput: Gudiga, Israêliojogut ilitarivaptigit.

³ Israêle iperaivoᴋ ajungitomik: ômigijib udlagomârpâ.

⁴ Atanernik ilijivut, uvapku-ungitorle; angajoᴋâᴋsoangortitsivut, ᴋaujimalungilangale; silberemingnit goldemingnillo gudingoaliorput piksamingnik, pêrtaujutiksarsiorlutik.

⁵ Noggangoat tâpsoma ajaktorpâ, Samaria; ningarnera tâpkonunga ilungertorpoᴋ; ᴋanoᴋ sivitutigilârᴋâ ivsornainermut tikiutiᴋârtinagît?

⁶ Tamanna Israêlemit pivoᴋ; senajib senavâ, gudeolungilarlo; ilâ, Samariab noggangoanga serᴋalitaujomârpoᴋ.

⁷ Anoremik karngasoivut, katersilârpulle ulajujaᴋsoarmik; iviksukaᴋangilaᴋ senaugaksanik; sulugainingit senaugaksatârnialungilat; pitârajaraloaruniglo, takorngartat ênajarpait.

⁸ Israêl êjauvoᴋ; mâna inôᴋatigêksuit akornganêpoᴋ pôgutatut ᴋuviagijaungitotut.

⁹ Majorarmatta Assiriamut siutiᴋortojotut nujoartotut inutôvlune ilaᴋarane; Efraim anguniarᴋatiksarsiorpoᴋ pajuklugit.

¹⁰ Pajugaksarsioraloarunigle inôᴋatigêksuit akorngane, mâna katersoromavakka; ikitlititaulilârpullo angajoᴋâᴋsuit ataningata oᴋumaiksartsininganut.

¹¹ Efraimib tunerguservit unuksitingmagit idluitulijomamut, tunerguservit tâpkoa idluijutigivait.

¹² Perᴋojakka aglagaloarupkit tâpsomunga 10,000nik perᴋojaᴋarlutik, tusarngartaugijautuinarput.

¹³ Pijaksamnik tunerguserput, nerᴋêjamik tunerguserput, nerrilugolo; Nâlekable nâmagilungilait; idluituliningille erᴋaumavait, ajorningillo takonâromavait; Egiptenemut utertuksauvut.

¹⁴ Israêle puigormat Pingortitiminik, igloᴋsoaliorlunelo; Jûdab iglugasaksuit sôngojut unuksitipait; uvangale ikomamik tilikleromavunga iglugasaksoanginut, nungutsijuksamik igloᴋsoanginik.