Hosea 7 - Labrador Inuttitut Heritage Bible

¹ Israele, inûlijomagapko, Efraimib idluitoᴋsôninga naipitauvoᴋ, Samariablo ajortoᴋsôninga; saglotiksanik piniarmatta; tigliktorlo itârpoᴋ, arᴋtaijoᴋatigêllo opakput silame.

² Omatimingnelo aulajilungilat uvanga idluituliningit tamaita erᴋaumagapkit; mâna piniarningita ilumavait; kênama sânganêput.

³ Ataneᴋ ᴋuviasuktipât idluitulinermingnut, angajoᴋaᴋsuillo saglonermingnut.

⁴ Ilûnatik assiniarteovut; niaᴋojiorviktut niaᴋojiortemut ônarsititaujotut iput; aulajarijungnaipoᴋ ikomamik akutsijarêrnerminit senaugarmik pubjusiᴋârtinagonut.

⁵ Atanipta uvlungane angajoᴋâᴋsuit ᴋanimatiput vainib ônarsititsininganut; tagva tâpsoma aggane issagolukpait mitauteᴋartut ilagilugit.

⁶ Tâpkoa utaᴋitilugit ômatitik atuinarutipait niaᴋojiorviktut; niaᴋojiortingat sinikpoᴋ unnuaᴋ nâvlugo; uvlâkut ikoâlavoᴋ ikomaᴋsoatut.

⁷ Ilûnatik niaᴋojiorviktut ônartigigamik erᴋartuijitik nungupait; ataningit ilûnatik oggovut; atautsemiglônêt akornganêtoᴋangilaᴋ uvamnut ᴋaigarsuktomik.

⁸ Efraim akuliovoᴋ inôᴋatigêngnut; Efraim ᴋaᴋᴋôjaᴋtut mumiktausimangitotut ipoᴋ.

⁹ Takorngartat nukingêrutivât, tâmnalo missigilungilaᴋ tamattominga; ilâ, ilûnâne ᴋertôvoᴋ, ᴋaujimangilarle tamattominga.

¹⁰ Israêliblo pingijaininga kigligiutjivoᴋ kênangata sângane; sullele utilungilat Nâlekamut Gudimingnut, ᴋenilungilâllônêt taimaigaloartilugo.

¹¹ Efraimelo tingmiaᴋtut issumaᴋangitotut ipoᴋ, silatuneᴋangitoᴋ; Egipten ᴋaigarsugvigivât, Assiria aivigivât.

¹² Arvertajakpatta, nulluakka issipteromavakka tâpkonunga; kataktitsomavakka sorlo tingmiat ᴋilaub ikianganit; sugiaromavakka, sorlo ᴋaggimiojungit tusarêrmatta.

¹³ Kapianarmêk tâpkoa! allarmatta uvamnit; asserornerub pidlarpait, tapagingmanga; piulijomalauraloarpakka, saglûtigivângale.

¹⁴ Omatimingnullo ᴋaigarsugvigilungilânga, inangavingmingne ᴋaggudlaraloartilugit; katimavut senaugaksat vainelo pivlugit, pikablâvigivângale.

¹⁵ Ajoᴋertoraloarapkit talingillo pitsartutilugit, sulle idluitomik issumaliorvigivânga.

¹⁶ Sâgiarput, ᴋotsiktomêtomulle pinatik; pitiksitulle ᴋasungajotut iput; angajoᴋâᴋsoangit saviksoarmut oggolârput oᴋamik ᴋasilidlarningit pivlugit; tamanna mitautaujutigilârpât Egipteneme.