Hosea 6 - Labrador Inuttitut Heritage Bible

¹ Kaileritse, Nâlekamut utilerta; tâpsoma aliktulauᴋpâtigut, tâpsomalo inûlilârpâtigut; tâpsoma annaulauᴋpâtigut, tâpsomalo mangipsertulârpâtigut.

² Uvluk magguk ᴋângerpanik tâpsoma ômartilârpâtigut, uvluglo pingajuangne makitilârpâtigut, inôlârpogullo tâpsoma sângane.

³ Nâlegarlo ilitarilerlavut, ilâ, ilitariganerlugo; tâpsoma anininga uvlub ᴋaulerningatut nelonangitigivoᴋ; tikilârpâtigullo silaluktut, silaluktut kingorliojotut koveraijotut nunamik.

⁴ Sunamik piniarvigijaksarivagît, Efraim? Sumiglo piniarvigijaksarivagît, Judâ? Idluarnise uvlâb nuvujangatut ingmat, mitsuksoatullo nungusârtotut.

⁵ Tamanna pivlugo nalautaijutigut ulimârpakka, ᴋanermalo oᴋausinginut toᴋopakka; erᴋartuinikkalo nuivut ᴋaumajotut.

⁶ Idluarneᴋ ᴋilanârigapko, tunergutillo-ungitoᴋ; ilitarᴋsinerlo Gudemik angiluartomik tunergutinit ôtaksanit.

⁷ Tâpkoale Adametut angiᴋatigêngneᴋ uniorpât; tagvane nelangaisârvigivânga.

⁸ Gileade iglugasaksoangovoᴋ idluitulijoᴋtalik, aulingnik tumelik.

⁹ Sorlolo arᴋtaijoᴋatigêt inungmik kamasârmatta, taimak ajoᴋertuijut iligêt toᴋotsivut apᴋome Sikememut sangmijome; ilâ, piungitoᴋsoarnik piniarneᴋarput.

¹⁰ Maᴋᴋojungnartomik takovunga Israêlib ᴋitorngangine; assiniarneᴋ naipitauvoᴋ tagvane Efraimeme, Israêle ivsornartitauvoᴋ.

¹¹ Igvittauᴋ, Jûda, katersivik pijarêrpoᴋ ilingnut, inuᴋotikka aularutijaujut utertigupkit.