Hosea 5 - Labrador Inuttitut Heritage Bible

¹ Tamanna tusarsiuk, ilipse ajoᴋertuijose, nâlagitselo ilipse Israêlib ᴋitorngangit, siutiselo manisigik, ilipse ataniub ᴋitorngangit, ilipsingnut erᴋartuijûtit ilingangmatta; nigarniutaulaurapse Mispame, nuluangovluselo issivisimajut Tâboreme.

² Pikablâjut itijomut pisimangmatta toᴋotsijomavlutik; uvangale tâpkonunga tamainut pidlataujomavunga.

³ Efraim ilitarivara, Israêlelo ijersimangilaᴋ uvamnut; igvit Efraim, assiniarpotit mâna, Israêlelo ivsornadlarpoᴋ.

⁴ Piniarningita sâgiartailitipait Gudimingnut: assiniarnerub anerningata inigingmagit, ilitarᴋsingilallo Nâlekamik.

⁵ Israêliblo pingijaininga kigligiutsivoᴋ kênangata sângane; tamanna pivlugo Israêle Efraimelo oggolârput idluitulinermingne; Jûdatauᴋ oggolârivoᴋ tâpkoa ilagilugik.

⁶ Saugaᴋotitik tuktuvaᴋotitiglo naksarlugit Nâlegaᴋ ᴋeneriartulârpât; nagvâromangilâlle; tâmna allarmat tâpkonangat.

⁷ Tâpkoa Nâlegaᴋ nelangaisârvigivât; ᴋitorngigamik takorngartarnik; mâna taᴋᴋetuinaub nungutsomârpait perᴋutitik ilagilugit.

⁸ Nipliajolijaritse Gibeame, tiptulausijaritse Ramame: kamasârileritse Bet-aveneme, tunungne, Benjamin.

⁹ Efraim asserorsimaningoromârpoᴋ uvlorme pidlartauvingme; Israêlib kinguvârênginut nelonaijaivunga pijomârtuksanik.

¹⁰ Jûdab angajoᴋâᴋsoangita adsigivait nûtitsijut nunab kiglingata nelunaikutanganik; ningarnera kovijomavara tâpkonunga imeᴋtut.

¹¹ Efraim aksorortijauvoᴋ, nênertauvoᴋ erᴋartortaunerme, nâmaksilaungmat perᴋojaᴋ maliklugo arvertaromavlune.

¹² Uvanga Efraimemut ketulapiktut ipunga, Jûdablo ᴋitornganginut aunertut.

¹³ Efraimib ᴋanimanine takogamiuk, Jûdablo ikkine takogamiuk, Efraim Assiriamut aivoᴋ, tiliklerlunelo atanermut Jârebemut; tâpsomale inûlijungnangilâse, ikkiselônêt mamititsungnangilait.

¹⁴ Efraim ilingavigijomavara loevetut, Judablo ᴋitorngangit loevearaᴋtut; uvanga, ilâ, uvanga aliktuijomavunga, aularlungalo; aularutjijomavunga, piuliklerungnartoᴋalulângilarlo.

¹⁵ Aularlunga uteromavunga inimnut, kigligiksarᴋârtinagit idluitulinermingnik, kênaralo ᴋenerlugo; kapiasungnermingne ilungertorlutik ᴋenerasualârpânga.