Hosea 4 - Labrador Inuttitut Heritage Bible

¹ Nâlekab oᴋausinga tusarsiuk, ilipse Israêlib ᴋitorngangit: Nâlegaᴋ nunab inunginut akkerartoruteᴋarmat, mikseᴋârneᴋangimat, nâpkiningneᴋangimallo, ilitarᴋsineᴋangimallo Gudemik nuname.

² Oᴋarnerlutjineᴋ, sagloneᴋ, inuarneᴋ, tiglingneᴋ, assiniarnerlo pitôvut, asseᴋangilat; sugaluluarput, auglo malikpoᴋ aungmik.

³ Tamanna pivlugo nuna oggualârpoᴋ, ilûnatiglo tagvane nunaᴋartut âlalârput, naternaub nergjutingit, tingmiallo ᴋilaub ikianganêtut ilagilugit; ilâ, mingeriat imarbingmêtut aglât pêjartaulârput.

⁴ Akkerartortoᴋarniaranele, sivôrasârijoᴋarniaranelônêt; inôᴋatitit akkerartortutitut ajoᴋertuijunik ilingavut.

⁵ Oggoinalârpotit uvlôtilugo, nelautaijorlo ilagilutit oggoinalârpoᴋ unnuarme; anânaillo asseroromavara.

⁶ Inuᴋotikka asserortauvut ilisimaneᴋanginamik; ilisimaneᴋ ajaktorangne, uvangatauᴋ ajaktoromagivagit, uvamnut ajoᴋertuijôᴋonak; Gudivît perᴋojangit puigorangne, uvangatauᴋ puigoromagivunga ᴋitorngarnik.

⁷ Angijororpalianingit maliklugit, idluitulivaliavigivânga; nertornautigijangat mumiklugo naggonautiksangortitsomavara.

⁸ Nerᴋiksaᴋarput inuᴋotima ajorninginik, kajungilârpullo idluitulinernik.

⁹ Taimaimat sorlo inuit ilingalârmatta, taimaluatsiaᴋ ajoᴋertuijut ilingalârivut; ilusingit pivlugit pidlaromârpakka, akkiniaromârlugillo piniarningit pivlugit.

¹⁰ Nerrilârpullo, aᴋeartoratigle; assinialârpullo, unuksivalialugatigle; Nâlegaᴋ kamagijungnairamitsuk.

¹¹ Assiniarneᴋ, vainelo, vainiksallo iptingat silaitôtitsivut.

¹² Inuᴋotima ᴋejuit atanertortiksarsiorvigivait, ajaupiamiglo nelonaijaivigivait: assiniarnerub anerningata tamartingmagit, Guditiglo tunulugo assiniariartorput.

¹³ Tunergutinik ôtaksanik tunitjivut ᴋaᴋᴋaᴋsuit ᴋângine, tipigiksautiniglo isserluanititsivut ᴋaᴋᴋane, napârtut sittijuksajat, ᴋairoliujallo, kutsulillo atâne, taggaliningit piojorijôgamigit; tamanna pivlugo panise assiniarput, nuliaksaselo anguniarput.

¹⁴ Pidlaromalungilakka panise assiniarpatta, nuliaksaselônêt anguniarpatta; tâpkoa nangmineᴋ ingmigolingatigamik assiniarpaktut ilagilugit, tunerguseramiglo anguniarpaktut ilagilugit; inuillo silatuneᴋangitut oggotitaujomârput.

¹⁵ Igvit, Israêle, anguniarpagaloaruvit, Jûda pidlaraksautiniaranetôᴋ; majorarniaraselo Gilgalemut, paungarniaraselônêt Bet-a-venemut, angermariniaraselo oᴋarluse: Sorlo mikseᴋârtomik Nâlegaᴋ inôngmat.

¹⁶ Israêle ᴋepêsermat, tuktuvâraᴋtut ᴋepêsertotut; mânale Nâlekab nerripkaromavait saugârsutut naternarsoarme.

¹⁷ Efraimib gudingoat ilasiarivait; kamaginiarasiuk.

¹⁸ Imiksangit sênarput: sorairatik assiniarput; angajoᴋângita kangunartoᴋ ungagidlarpât.

¹⁹ Anorib erᴋisimiarpâ esaruminut; tâpkoalo tunergutiksatik kangusûtigilârpait.