Hosea 2 - Labrador Inuttitut Heritage Bible

¹ Katangutise angutit imailiorvigisigik: Ammi, tamadja: Inuᴋotikka; ᴋatangutiselo arnat: Ruhama, tamadja: Nâpkigijauvose.

² Kajungersarasuarsiuk anânase, kajungersârasuarsiuk; nuliarilunginapko, tâpsomalo uigilungimanga; assiniarnine pêjarligit kênaminit, anguniarninelo iviângingme akorngangnit;

³ Ussertitsiᴋonanga tâpsominga, saᴋᴋijârtilugolo sorlo inûlervingmine ilaungmat, ilingatitsiᴋonangalo tâpsominga sunaᴋajuitotut, nunatut ipterilingajotut itilugo, toᴋolugolo ᴋêdlarnermut;

⁴ Ilâ, ᴋitorngangit nâpkigijomangilakka, anguniarpaktub ᴋitorngaringmagit.

⁵ Anânangat anguniarmat; singailauᴋtoᴋ tâpkoninga kangunartulivoᴋ; oᴋarmat: Anguniaᴋatigijaᴋᴋa maligomavakka, tunitjivigijikka nerᴋiksamnik, imiksamniglo, saukallo merᴋunginik, ilupâksarmiglo, orᴋsumiglo, imiksaniglo.

⁶ Tamanna pivlugo, ahâk, apᴋutiksat kakilautilingnik avaluᴋtâromavara, upkolioromavungalo tâpsomunga, apᴋutiksarsiᴋonago.

⁷ Anguniaᴋatigijanelo udlalârpait, angunagille; ᴋenilârpait nagvârnagille; oᴋalârpoᴋ tagva: uteromavunga uimnut sivorlermut, taipsomane idlugiarpalanersaulaurama mânamit.

⁸ Kaujimalaungimat uvanga tunitjivigilaurapko senaugaksanik, vainemiglo, orᴋsumiglo, avâgigapkolo goldemik silberemiglo, atortanginik Baale adsiliorlugo.

⁹ Tamanna pivlugo senaugaksakka aᴋsârnigarijomalerivakka neliuningane, vainigalo tâpsoma neliuningane, saukamalo merᴋungit, ilupâksaralo, ussinganingata uliksangit, tigûllagomavakka.

¹⁰ Mânalo kangunarninga ulêromavara anguniaᴋatigijangita takoane, tâpsomingalo piuliklerungnartoᴋalulângilaᴋ aggamnit.

¹¹ Aliagijangit tamaita sorairtitsomavakka, uvloᴋsiorvingit, taᴋᴋêlaᴋsiorvingillo, sabbatingillo, katimaviksauᴋojangillo tamaita.

¹² Napatungillo vaineliksataliksat paungatannaktaliksallo piojungnaititsomavakka, oᴋautigijangit: Akkiliusiarilauᴋtakka tamakkoa, anguniaᴋatima ᴋaitangit; napârtoliksoangortitsomavakka, naternaublo nergjutingita nerᴋiksarilârpait.

¹³ Uvlullo Baalenut atortangit akkiniarutigijomavakka tâpsomunga, tippigiksautinik isserluanititsivigijangit tâpkonunga, pinnarnarsitigame nangminerminik siumiutaminut pinnarnarsautiminullo, anguniaᴋatigijanelo ᴋeneriartoramigit, uvamniglo puigorlune, oᴋarpoᴋ Nâlegaᴋ.

¹⁴ Tamanna pivlugo, ahâk, uerisâromavara, tikiutilugolo sunaᴋajuitomut, ilanârnartomiglo oᴋarvigijomavara.

¹⁵ Tagvangallo tunitjivigijomavara vaineliksataliksanganik, Akoriblo naᴋsanganik nerriungnermut iterviksanganik; tagvanelo imgerlârpoᴋ sorlo inôsungnime uvlungine, sorlolo uvlorme majorarvigilauᴋtangane Egiptenemit.

¹⁶ Uvlormelo tâpsomane, oᴋarpoᴋ Nâlegaᴋ, atseralârparma: Ishimik, tamadja: uimnik; atserarungnailungalo: Baalimik, tamadja angajoᴋâmnik.

¹⁷ Baalit attingit pêjaromagapkit ᴋaninganit, attingitigut erᴋaumajaujungnairomârmatta.

¹⁸ Uvlormelo tâpsomane tâpkoa pivlugit angiᴋatigêngnelioromârpunga naternaub nergjutinginut, ᴋilaublo ikiangata tingmianginut, nunablo pâmgortunginut; pitikselo saviksoarlo unatarnerlo pêjaromavakka nunamit, inangatitsomavakkalo terliklutik.

¹⁹ Nuliarijomavagillo nâksaungitomut; ilâ, nuliarijomavagit idluarnerme, erᴋartuitsiarnermelo, naglingnermelo, nâpkiningnermelo.

²⁰ Nelâgôrnermelo ilâ nuliarijomavagit: Nâlegarlo ilitarilârᴋat.

²¹ Uvlormelo tâpsomane kiojomârpunga, oᴋarpoᴋ Nâlegaᴋ, ᴋilait kiojomârpakka, tâpkoalo nuna kiojomârpât;

²² Nunablo senaugaksat kiojomârpait, vainelo, orᴋsorlo; tâpkoalo Jesreele, tamadja: Gudib karngasortangit, kiojomârpât.

²³ Tâmnalo karngasoromârpara uvamnut nuname; tâmnalo nâpkigijaulaungitoᴋ nâpkigijomârpara; ipkoalo inuᴋutaulaungitut uvamnut oᴋautitsomârpakka: Inuᴋotigivapse; tâpkoalo oᴋaromârput: Gudigivaptigit.