Hosea 14 - Labrador Inuttitut Heritage Bible

¹ Israele, utilaurit Nâlekamut Gudingnut, oggosimagavit idluinitit pivlugit.

² Oᴋausikka neksarsigik, uteritselo Nâlekamut, oᴋautisiuk: Ajornerit tamaita pêjalaukit, saimarsartigullo; taimaglo tunitjijomavogut ᴋangasinâpta paunganginik.

³ Assurib piulinialungilâtigut; horsene ablangajomangilagut aggaptalônêt senajanginut oᴋarungnairomavogut: gudigivapse: ilingne iliarsuit nâpkigijauneᴋsingmatta.

⁴ Kingupiartorsimaningit inûlijomavakka, ᴋunutuivlunga nagligijomavakka; ningarnera sangumat tâpsomangat.

⁵ Mitsuksoatut ilingajomavunga Israêlemut, nuvugulâᴋtâlârpoᴋ paunaujaujârtotut, amânelo siamartilârpait Libanonetut.

⁶ Akkerungit issivitsialârput, pinnarnarningalo napârtotut orᴋsuliktut ilârpoᴋ, tipingalo Libanonetut.

⁷ Taggaliningane ineᴋartuksat uteromârput, ômalârivoᴋ senaugaksatut, nuvugulâᴋtârlunelo vaineliksatut; tipeᴋalârporlo Libanonib vainingatut.

⁸ Efraim oᴋalârpoᴋ: Gudingoat suksarivigît sullê? Uvanga kiolauᴋpunga, kamagijomavaralo; ᴋeblariktotut tungujortatut ipunga; uvamne paungatit nagvârtaujuksauvut.

⁹ Kina ilisimavâ, tamakkoa tukkisijungnarlugît? Issumagiktôvlune, tamakkoa ilitarilugît? Nâlekab apᴋotigijangit idluadlarmatta, idluartullo tâpkonane arvertartuksauvut; tapatojulle oggolârput tâpkonane.