Hosea 11 - Labrador Inuttitut Heritage Bible

¹ Israele sorusiotilugo nagligilauᴋpara, erneralo ᴋaiᴋolauᴋpara Egiptenemit.

² Tâpkoa ᴋaiᴋojarangamigit ipkoa ᴋemâvait: tunerguserput Baalinut, tipigiksautiniglo isserluanititsivut inungoaliarimajanut.

³ Uvangale Efraim pisungnermik ilisalauᴋpara; talimnut tigumiarpara; ᴋaujimalaungilalle uvanga inûligapkit.

⁴ Inûb amuarutinginut amualauᴋpaka, naglingnerub ᴋelaksûtinginut; tâpkonungalo ilingavunga pêjaijotut kingmiaramik aglerunginit, sânginullo ilijilauᴋpunga nerᴋiksanik.

⁵ Egiptenemut utertuksaungilaᴋ; Assiriamiorle atanerilârpât, sâgiaromangimatta.

⁶ Saviksoarlo katagomârpoᴋ iglugasaksoanginut palangairutingit asserorlugit nungulugillo, kajusijûtitik nangminerijatik pivlugit.

⁷ Inuᴋotikka kingupiartorsimangmatta uvamnit; ᴋotsiktomêtomut ᴋaiᴋojaugaloarmatta, atautsemiglônêt ᴋagverasuartoᴋangilaᴋ.

⁸ Kanorle sapkojungnarpagît, Efraim? Kanoᴋ piulijungnarpagît, Israêlê? Kanoᴋ ilingatitsungnarpagît Admatût? Kanoᴋ pititsungnarpagît Zeboimetût? Omatiga mumikpoᴋ ilumne, ilapsugosungnikka atautsikut ikoâladlartotut ilingavut.

⁹ Ningarnima ilungertudlarninga nâmaksititsomangilara, uteromangilanga Efraim asseroromavlugo; Gudeogama, inônginamalo; ivsornaitoᴋsôjunga akunapsingne; ningarlungalo iteromangilanga iglugasaksoarnut.

¹⁰ Nâlegaᴋ maligomârpât, tâmnalo loevetut kalingoaromârpoᴋ; tamna kalingoaromârmat, ᴋitorngaujullo sajudlarlutik tikitsomârput pângat.

¹¹ Tingmiaᴋtut Egiptenemit sajudlarlutik tikitsomârput, taubetullo nunamit Assiriamit: ineᴋartitsomârpakkalo iglomingne, oᴋarpoᴋ Nâlegaᴋ.

¹² Efraimib ilumavânga saglonermut, Israêliblo ᴋitorngangita uiveriklernermut; Jûdale atavoᴋ sulle Gudemut, nelâgôrporlo ivsornaitoᴋsôjomut.