Hosea 10 - Labrador Inuttitut Heritage Bible

¹ Israele napârtôvoᴋ vaineliksaᴋ siamangatsiartoᴋ, paungatârpaktoᴋ: paungangita unurningititut taimak tunerguservine unuksitipait; nuname piloringninga maliklugo taimak napajoliorpoᴋ.

² Omatingit maggoilisimavut; mâna pidlaraksauvlutik naipitauniarput; tâpsoma annaulârpait tunerguservingit, napajoliarimajangillo asserorlugit.

³ Mâna oᴋalârput: Ataneᴋangilagut: Nâlegaᴋ sivôragigaptigo; ataniublo ᴋanoᴋ ikajorungnarpâtigût?

⁴ Oᴋauseᴋarput tukkeᴋangitunik, saglovlutik angerput angiᴋatigêngnelioramik; tamanna pivlugo erᴋartuineᴋ nuilerpoᴋ perornerluktutitut toᴋonartutitut perorsêviub makpertertangine.

⁵ Samariamiut noggangoat Bet-avenemêtut oggorijomârpait, inungita kiksautigivât, ajoᴋertuijungitatauᴋ ᴋuviasuteᴋalauᴋtut tâpsominga, pinnarnarnerilauᴋtanga pêjartaungmat.

⁶ Tâmnatauᴋ aularutijaujomârmat Assiriamut, tujutiksauvlune atanermut Jârebemut: Efraimib kangusungneᴋ pilârpâ, Israêliblo atanertuinine kangusutigilârpâ.

⁷ Samaria kipijauvoᴋ atanine ilagilugo, sorlo imab ᴋapunga.

⁸ Poᴋtojut Aveneme, Israêlib ajornerijangit, asserortaulârput: ukpigait kakilautilît perornerluktullo kakilanartut nuitajomârput tunerguservingine; ᴋaᴋᴋâlungnut oᴋaromâlerput: Uliktigut! ᴋaᴋᴋârulangnullo: Sitorvigidlartigut!

⁹ Israêle, Gibeab uvlunginit idluitulidlarpotit; tagvane nangilauᴋput; tikitauᴋonagit unatarnermut idluinerub ᴋitornganginit pijomut.

¹⁰ Pijomaguma, sugiaromârpakka; inôᴋatigêksuillo katimajomârput tâpkonunga, ᴋelaksortaukpatta idluinitik magguit pivlugik.

¹¹ Efraimelo tuktuvârauvoᴋ sungiutisârtaujoᴋ, ᴋuviasuteᴋartoᴋ tullerarnermik sulugainernik; uvangale ᴋongesinganut pinnarnartomut ablangavunga: Efraim ikimajoᴋartitsomavara; Jûda poagijartuksauvoᴋ, Jâkolo maniksaijuksauvoᴋ.

¹² Karngasoigitse nangminipsingnut idluarnerme, katersoiluselo nâpkiningneᴋ maliklugo; nunase poagijartaumangitoᴋ poagijarsiuk: neliutilermat Nâlegaᴋ ᴋenerlugo, tikerᴋartinago, koverarluselo idluarnermik.

¹³ Idluinermik poagijalalaurapse, idluitulinermiglo katersoiluse; saglonerublo paunganginik nerrivose; apᴋotigijat pitsartujoᴋsoaᴋotivillo unurningit tatigilaurangne,

¹⁴ Taimaimat pikablâdlartoᴋalârpoᴋ inuᴋotivit akorngane, serngnigijauviksatillo ilûnatik asserortaulârput, sorlo Salmanib Betarbele asserorlaungmago taipsomane unatarnerme: anânaᴋ egitauvlune serᴋalitaulaungmat ᴋitorngane ilagilugit.

¹⁵ Taimak piniarviolârpose Beteleme idluitoᴋsônise pivlugit: ᴋaulertainartilugo Israêlib ataninga kipijaumarigomârpoᴋ.