Hosea 1 - Labrador Inuttitut Heritage Bible

¹ Nâlekab oᴋausinga Hoseamut Bêerib erninganut pimajoᴋ, Usiablo, Jotamiblo, Ahasiblo, Hesekiablo, Judab ataningita uvlungine, Jerobeamiblo, Joasib erningata, Israêlib ataningata, uvlungine.

² Nâlegaᴋ Hoseamut oᴋaᴋârame, Nâlekab Hosea oᴋautivâ: Ailerit, anguniarpaktomiglo, anguniarpaktut ᴋitorngangita ilanganik, nulianingnialerit, nuna assiniarmat angijomik, Nâlegaᴋ ᴋemaklugo.

³ Aivoᴋ tagva, Gomerelo, Diblaimib paninga, nuliarilerpâ, tâmnalo singailerpoᴋ, ernermiglo ernivoᴋ tâpsomunga.

⁴ Nâlekablo oᴋautivâ: Jesreelemik atseraruk; mânakut Jesreelib aunga akkiniarutigijomagapko Jehub kinguvânginut, Israêliblo ᴋitorngangita ataniovingat sorairtitsomavlugo.

⁵ Neliutomelo tâpsomane Israêlib pitiksinga navigomavara Jesreelib naᴋsangane.

⁶ Taimnalo singailerivoᴋ, paningmiglo ernivoᴋ. Nâlekablo oᴋautivâ: Atseraruk Lo-ruhamamik: Israêlib ᴋitorngangit nâpkigojomairapkit, issumagijungnaivigijomangimarikpakkalo.

⁷ Judable ᴋitorngangit nâpkigijomavakka, Nâlekamullo Gudinganut piulijomavakka, piulijomangilakkalo pitiksimut, saviksoarmullônêt, unatarnermullônêt, horsenullônêt, horsenelônêt ablângajunut.

⁸ Lo-ruhamalo amâmaktijungnailugo, singailerivoᴋ, ernermiglo ernivoᴋ.

⁹ Nâlegarlo oᴋarpoᴋ: Atseraruk Lo-ammimik, inuᴋotaulunginapse uvamnut, Gudeojomanginamalo ilipsingnut.

¹⁰ Israêlib ᴋitorngangit imarbiub siorangititut ôktortaujungnangitutitut kititaujungnangitutitullo unuktigijomârmatta, pijomârporle, inine oᴋautijauvigilauᴋtangine: Inuᴋutaulungilase uvamnut; tagvane oᴋautijaujomârput: Kitorngauvose Gudemut ômatsainartomut.

¹¹ Judablo ᴋitorngangit Israêliblo ᴋitorngangit katijomârput, ingmingnullo atauseᴋ nâlegangortitsomârpât, majoraromârpullo nunamit, Jesreelib uvluksanga angijodlaromârmat.