Hiobe 9 - Labrador Inuttitut Heritage Bible

Hiobe sorsugutigivok ingminik Bildademut.

¹ Hiobe kiovok oᴋarlunelo:

² Ilâ, ᴋaujimatsiaralloarpunga taimaimat, inuglo idluartôjungnarlungimat Gûdib sângane.

³ ᴋuviasuteᴋarpat akkerartorlugo, tagva tausendinut atautsemiglônêt kiojungnarlungilâ.

⁴ Sillatôvok sôngudlarlunelo; kina nalliutut nalliane sulilauralloarᴋâ, akkerartulauktok tâpsomunga?

⁵ Tâpsoma ᴋakᴋât nûtipait missigiᴋârtinnagit, mumikpaillo ningarnermine.

⁶ Nuna aulatipâ inninganit, sukkangit sajukpiludlarᴋovlugit.

⁷ Sekᴋinermut oᴋarpok, tagva nuilungilak; uvloritjallo naiterpait.

⁸ ᴋillak issivipâ inutôlune, pisuklunelo imarbiksûb mallingita ᴋânginne.

⁹ Tâpsoma tuktujok udlaktullo, sakkiatsiallo sannavait, uvloritsallo sagvangitut sekkinaptingnetut.

¹⁰ Tâpsoma pinniarnersuit pinniarpait nautsertortaujungnangitut, tattamnartullinerillo kittitaujungnangitut unnumut.

¹¹ Ahâk, sâkopânga, takkolungilaralo tamanna; agvertarlunelo tagvûna, mallugosulungitungalo tamattominga.

¹² Ahâk, tâmna aksorornermut tigusikpat, kia aijomavaûk? Kia oᴋautitsomavaûk: Sunamik pinniarᴋît?

¹³ Gûdeôvok, ningarninga saimartaujungnangilak kinamut; tâpsoma atânut okᴋojariaᴋarput ikajortut piojorijut.

¹⁴ ᴋanok uvanga tagva kiojaksarijungnarajarpigô, oᴋausiksarsijungnarlungalo akkerartorlugo?

¹⁵ Idluarneᴋarajaralloaruma, kiojomanajangilara sulle; erᴋartortigale ᴋennuviginajarpara.

¹⁶ Niplianajaruma, tâpsomalo kionajarumga: tagva sulle okperomanajangitunga tâpsoma nippiga tussarmago.

¹⁷ Tâpsoma opalugalloarmanga aksorornermut, ikkeᴋartilungalo unnuktunnik pitjuteᴋarane.

¹⁸ Anernera nekkoksijauᴋotailivâ, nâmaksitipângale kassilingnartomik.

¹⁹ Sôngonermik oᴋauseᴋaruma, tagva sôngoluarpok; idluarnermiglo, kina idluarsaijôjomava uvamnut?

²⁰ Idluartôjomaguma, tagva ᴋannerma ôminarnerariaᴋarpânga, idluitailiguma, tagva tâpsoma sulle idluitipânga.

²¹ Idluitailigalloaruma, tagva nangminimnik illitarijasaringitunga, inôseralo ôminariaᴋarpok uvamnut.

²² Atausiôvok, oᴋautigijara: Tâpsoma tammarmik idluitailijok, Gûdeᴋangitorlo asserorpak.

²³ Pigiarune issakailune, tagva sivumuarsârpok toᴋo tikkidlugo, passijaksaungitublo isumajârningit tikkitautigijangit mittautigivait.

²⁴ Nuna tunijaulerpok Gûdeᴋangitub agganginnut, ullikserᴋovlugo idluarsaijungita kênanginnik. Taimaingilâk? Nanelo assianik illinganeᴋarᴋâ?

²⁵ Uvlukka tuavinersaulaukput akpangerpaktomit; ᴋemâlaukput, tukkisilaungilello ajungitomik sunamiglônêt.

²⁶ Nipaksimavut umiaraktitut oitutitut; sôrlolo nektoralik nerᴋiksamut tingimat.

²⁷ Isumaleraiguma, ârusungnera puigoromavara, kingorlungnikkalo ipperarlugit, nekkoksititsomalungalo:

²⁸ Tagva ânianikka tamaita sivuragivakka, ᴋaujimagama igvit passijaksaunginerarlunginamga.

²⁹ Gûdeᴋangitôvîk ila: sôg serleinartok taimaitok pitjuteᴋangitok tukkisivigô?

³⁰ Ubvarajaralloaruma imermut apputaulauktomut, aggakkalo sujungaitinajarupkit imektarvingme:

³¹ Tagva igvit sulle misungniarparma ailupingmut annorârmalo pinarnaidlartiniarpânga.

³² Tâmna adsiginginapᴋo, kiojungnarlugo, idluarsainerub sânganut tikkeᴋattigêgungnarajarlunuk.

³³ Akkongaptingne pijitserteᴋalungilak namaksêjomik, aggangminik illijijomik tamaptingnut.

³⁴ Issaᴋautine tigulerliuk uvamnit, ᴋoaksârnarninelo aularkoligit uvamnit;

³⁵ Oᴋarungnarᴋovlunga, erᴋsijuteᴋariaᴋarajarᴋonangalo tâpsominga; uvamnele nangminimne taimailungilanga.