Hiobe 7 - Labrador Inuttitut Heritage Bible

Hiobib inub illiorninga tamât ârusutigivâ, piluartomigle ajulernine; tuksiarpok Gûdemit nellojungnaititaunermik, toᴋomiglônêt.

¹ Inuk sorsungnermêtsainariaᴋangilâk nuname, uvlungillo sanajuksab uvlok nâlugo uvlungititut îngilat?

² Sôrlo kivgab tachalinek kajungervigingmago, sôrlolo sanajuksak uvlok nâlugo, nerriungmat sullijaksame sorairningannik.

³ Taimâk uvangatauk takᴋinnik siorniornartunnik kingormgutijaksamut pilaukpunga, unnuanniglo kappianartunnik kittitsiviomavunga.

⁴ Inilarangama oᴋarpunga: ᴋanga makkiniarᴋîk? Unnublo ivianginnit uimajârnermik immerpunga, nâmaksilunga uvlogatârninga tikkidlugo.

⁵ Uviniga illûnane ᴋoppergosimavok kinnâliolunelo; amiga erᴋingavok marneᴋarmilunelo.

⁶ Uvlukka ᴋângersarainersaulaukput ᴋablunâktaijalliortib aksaloanganit, nâlauklutiglo nerriungneᴋartitsinatik.

⁷ Erᴋailerit, inôsera annoreôngmat, ijîkalo utterungnaimanik ajungitok takkolugo.

⁸ Ijiblo atautsiblonêt takkotima. tautungnersariniangilânga. Ijikpit takkonârpânga, tamattomunga nungutaulerpunga.

⁹ Nuvujak nungulerpok ingergaulunelo tagvunga; taimâktauk tâmna unnungartok kappianartovingmut (annernerit inninganut) majoarungnaipok;

¹⁰ Utterungnailunelo iglominut, innigilauktangatalo illitarijungnaipâ.

¹¹ Tamanna pivlugo uvangatauk ᴋanera agviaromangilara; ômattima kappiasungninga oᴋarutigijomavara, tokkailungalo oᴋaromavunga tarnima kiksarninganik.

¹² Imarbingogalloarkik, arviolungalonêt, taimâk udsertoramga?

¹³ Isumaguma aumitingma mannigoraksarivânga, inanangavingma ârusungnera oiglijaksariva:

¹⁴ Tagva igvit ᴋoaksârtiparma sinnektomanernut, takkotitjutinullo kêongomitiparma;

¹⁵ Tarniga tussulermat kimitaujomavlune, saunikkalo tussuvut toᴋomik.

¹⁶ Makkojukpunga, inôtsainaromalungitunga. Nokᴋarvigilaunga uvlukka pujôngmatta.

¹⁷ Inuk sunauvâ, angijônasugigangne, kamagigangnelo?

¹⁸ Uvlullo tamaita nellipsarangne, nautsertorlugolo Stundinne tamaine?

¹⁹ ᴋanok akkunêrtigijomik takkonârtailijungnaipingâ, allarnangalo, nuvamnik êserᴋârnanga?

²⁰ Idluitullilauruma: sunamik piniarvigijungnarpagît, udsertorteôjotit inungnik? Sôg apporviksangortipinga illingnut, oᴋumaijutiksaulungalo nangminimnut?

²¹ Sôglo idluitullinimnit isumagijungnaivigingipinga, pêrtaililugillo ajornikka? Mânnale innilaniarpunga nunab illuanut; ᴋaupallo ᴋennertauniaruma, ovanêniangilanga.