Hiobe 6 - Labrador Inuttitut Heritage Bible

Hiobib ârusungnine passijaungijutiksarsiorutigivâ, attupsarlâlo Elifasemut.

¹ Hiobe kiovok oᴋarlunelo:

² Kappiagijakka kiktitârtaunajarpatta, âniagijakkalo ᴋattilugit kiktitautingnut illijaunajarpatta:

³ Tagva oᴋumainersaunajarput siorkanit imarbiksûb kiglinganêtunit; tamanna pivlugo oᴋauserijakka sullitsengilet.

⁴ Ajugaᴋangitub ᴋârjungit kappusimangmatta illumne, tâpkoa kaningajadlarningita anernera immerpâ nungudlugo; Gûdiblo; sivôranarningita torârpânga.

⁵ Nergutit nujuartut niplialungilet iviksukaᴋarunik; tuktuvak angusâlluk niplialungilak nerripᴋautiksaᴋarune.

⁶ Tarêrsimangitok nerrijaujungnarivâ? Ubvalo kia (maniub) ᴋaunga itsib avatânêtok ôktoromavaûk?

⁷ Tarnima makkojugilauktanga aktorlugo, tamanna nerᴋigidlarpara angijomik.

⁸ ᴋanoktôk tuksiarnera malliktaule, Gûdiblo tunnitsivigilinga nerriungnimnik!

⁹ Gûde pigiarune annaulerlungalo serᴋomilunga, agganelo isumainaitilugit serᴋalitilungalo:

¹⁰ Tagva mannigorneᴋarajarpunga sulle, serridlaromanajarlungalo ânianerme, nikkasutuinarlungipat. Hailigeôjub oᴋauserijangit angiarilaungigalloartakka atsoilâ.

¹¹ Nukkika sunauvât, soᴋosijuituksaunajarama? Nâneralo ᴋanoêliniarᴋâ, tarniga ᴋenuêtuksaunajarmat?

¹² Nukkika atsoilâ ujaraulungilet, uvinigalo ᴋannujaulungilak.

¹³ Ikajorneᴋangimarikpunga illumne ilâ, sappinginerlo ᴋemâmavok uvamnit.

¹⁴ Nâpkiningnermik ᴋunujûb inûᴋattiminut, tâpsoma Ajugaᴋangitub sivôranarninga ᴋemakpâ.

¹⁵ ᴋattangutima nertornaratik sanerᴋopânga kôktut, sôrlo imiksuit sanerᴋotsivlutik kôdlarmatta;

¹⁶ Issoklutik kôktut sivakamut, appullo pullamavok tagvunga.

¹⁷ Nelliutome ônarsivingine ipterilingalerput; ᴋiaᴋalerpallo kamilerput inigijamingnit.

¹⁸ Ingerarᴋattigêktut sangulerput apᴋosinermit, ingerarput sunaᴋajuitomut, asserorlutiglo.

¹⁹ Têmab ingerarᴋattigêktungita kênâvait, Sâbablo ᴋattimgajungita sungertutigivait.

²⁰ Kangusuktitauvullo tettiksaᴋalauramik, tagvungaruniglo kangusukput.

²¹ Taimâlluatsiak illipsetauk mânna sunaungititauvose; kappianartomiglo takkogapse sivoravose.

²² Oᴋalauralloarᴋîk: ᴋaitsivigissinga? Perᴋutipsingnillo pilliutinnik tunnitsivigisinga?

²³ Piulissingalo omisuktub agganginnit, ᴋellarudjarlungalo attaniâlub agganginnit?

²⁴ Ajuᴋertorsinga nippangeromavunga; tammarumalo tamattominga illisaivigisinga.

²⁵ Oᴋâlanek idluartok ila ipiktoksôvok! Pitlarningnerle pitlarningnipsetut sunamik pitlarnigalloarᴋâ?

²⁶ Oᴋautsit pitlaromanasugivisigîk? Mungojûblo oᴋausingit sillatuinarmut?

²⁷ Illiarsuᴋulluk opalukpasse, inûᴋattiselo ittersalliorpasse.

²⁸ Ilâ nâmagijaule illipsingnut, takkonârlunga, pitilungalo ijipse sânginnut saglomangârma.

²⁹ Pigiarmititse, nellangaineᴋarniangilak tagvane; pigiapsârmititselo tagva idluarnera nachvârtauniarpok.

³⁰ Nâmanginek oᴋamnêgalloarᴋâ? ᴋilagalo ikpigingilâk kassilingnartok sunaungmangât?