Hiobe 5 - Labrador Inuttitut Heritage Bible

Elifasib oᴋaranerninga Hiobe akkerartorlugo illilertorlugolo.

¹ ᴋaiᴋojilerit ilâ, atautsiblonêt kiomangâtit, kenâlerillo ivsornaitomik atautsemik.

² ᴋaujimangojartok naktertaugalloarpok ningarnerminut, sillaitorlo toᴋotauvok ᴋaningajarnerminut.

³ ᴋaujimangojartok mimernalik siamasertunik takkolaukpara, tagvainarlo iglunga oᴋarnerlotigivara.

⁴ ᴋittorngangit ungasingniarput piulijaunermit, annaulertauvlutiglo serᴋomitauniarput itterviksoarme piulijeᴋangitome.

⁵ Kattersininga kâktub nerriniarpâ, ainiarlâlo orpit kakkilautiggit akkornganit; perᴋutingillo immeruktut imerniarpait nungudlugit.

⁶ Siorniornek nunamit annilaungimat, ᴋanoênerlo perorsêvingmit nuilungilak;

⁷ Inugle inûlerpok ᴋanoênermik peᴋarᴋovlugo, sôrlo nutiktut ᴋongmuarmatta.

⁸ Ilâ uvanga Gûde sâviginajarpara, kotsingnerpâmullo illiornera perᴋonajarpara;

⁹ Angijunik pinniartok, nautsertortaujungnangitunik, tattamnartuniglo kittiksaungitunik.

¹⁰ Sillalungmik tunnijijok nunamut, imermiglo tilliklertok perorsêvingnut;

¹¹ Erᴋanangitunik angijorortitsijok, kiksartuniglo ᴋakᴋititsijok.

¹² Tâpsoma pingitsertortut isumangit sullingitipait, aggangit kajusimanermik nellautsititsijungnarᴋonagit.

¹³ Tâpsoma sillatôjut anguvait pingitsertorninginne, ochotitsilunelo mumiksimajut attannertuininginnik;

¹⁴ Uvlôtillugo tâksiorᴋovlugit, uvlublo ketterarningane Tapsiᴋârᴋovlugit unnuametut;

¹⁵ Aklujorlo ikajorpâ saviksoarmit, ᴋaninginnillo, pitsartujublo agganginnit;

¹⁶ Pattangajok nerriungneᴋarᴋovlugo, kassênerlo ᴋanerminik epumeriaᴋarᴋovlugo.

¹⁷ Ahâk pillorikpok inuk Gûdib pitlartanga; tamanna pivlugo ajugaᴋangitûb sugiarningit ᴋunnugitailikit.

¹⁸ Tâmna ikkilêvok, mangipsêlunelo; egitsilune serᴋomitsivok, aggangillo mammititsivut.

¹⁹ Kiksarnartune pingasujortune piuliniarpâtit, 7 inganelo idluinerit nelliata aktorniangilâtit.

²⁰ Kâvingme toᴋomit piuliniarpâtit, unatadlarnermelo saviksûb agganginnit.

²¹ Ijerniarpâtit oᴋab issaᴋautinginnit, asseroinerlo Erᴋsigijariaᴋangilet tikkileraikpat.

²² Asserortaunerme kângnermelo ijorniarpotit, ômajullo nujuartut nuname erᴋsiginiangilettit.

²³ Angerᴋattigêngneᴋarniarpotille ujarᴋanik naternamêtunnik, ômajullo nujuartut nuname ullapirsauteᴋarᴋattiginiarpâtit.

²⁴ Tukkisiniarpotillo igluit ullapirsauteᴋarmat; iglugijallo aulaniarpet, idluitullitaililutillo.

²⁵ Tukkisijomârpotillo nutaijoktoᴋotitit unuktôleromârmatta, kinguvâkotitillo iviksukatitut naternamêtutitut.

²⁶ Inutoᴋaunermelo illijartortaujomârpotit illuvermut, sôrlo kippitat ᴋakᴋôjaksataggit angerautitaungmatta nelliunermingne.

²⁷ Ahâk tamanna isumaksarsiornermut sakᴋerlaukpavut, taimaiporlo; tamanna nâleguk, kamagilugolo.