Hiobe 42 - Labrador Inuttitut Heritage Bible

Hiobib ᴋakᴋialerninga, idluarnerartauningalo ilannârijangita pingasut sânginne. Akluipsârninga, illingatsiarninga, toᴋungalo.

¹ Hiobiblo Nâlegak kiovâ oᴋarlunelo:

² Illitarksilerpunga, igvit tamainik sappinginavit, sagvangitoᴋalungilarlo illingnut isumamik atautsemiglonêt.

³ Ilâ kinauva tâmna kajusimanermik ulliksijok sillainermut? Tamana pivlugo ipaksilaungitara oᴋautigilaukpara; pijoᴋartut inorlauktakka, illitarilaungitakka.

⁴ Tagva igvit mânna tussalaurit, oᴋarlanga; apperijomavagit, ajuᴋertulaunga.

⁵ Tussarᴋauvagit siutimnut, ijimalo takkogivâtit mânna.

⁶ Tamanna pivlugo passijaksaunerarpunga, ᴋakᴋialerlungalo sannerne arsannelo.

⁷ Nâlekab mânna oᴋautsinik makkoninga Hiobe oᴋarᴋattigijarêrmago, Elifase Têmanemiok oᴋautivâ: Ningarnerma igvit ilannârijakiglo ilûngertutigivâse; nâmaktomik oᴋautigilaunginapsinga, kivgaptut Hiobetut.

⁸ Tagva mânna tuktuvângnik angusâllungnik 7 nik, sauganniglo angusâllungnik 7 nik, tigusileritse, ailerluselo kivgamnut Hiobemut, tunnijiluselo pivluse tunnergutinik ôtaksanik, kivgaralo Hiobe tuksiutjerᴋosiuk illipsingnik. Tâmna takkonâromagapᴋo, piniarvigiluse perᴋonanga sillainisse malliklugo: nâmaktomik oᴋautigilaunginapsinga kivgaptut Hiobetut.

⁹ Tagva Elifase Têmanemiok, Bildadelo Suamiok, Zofarelo Naêmamiok aivut, taimailiorlutiglo sôrlo Nâlekab oᴋautilaungmagit. Nâlekablo Hiobe takkonârpâ.

¹⁰ Nâlekablo Hiobib pallangairsortaumaninga mumikpâ ilannârijane tuksiutingmagit. Nâlekablo Hiobe tunnitsivigivâ maggoertordlutik unuktigijunik pigilauktanginnit.

¹¹ ᴋattangutingillo angutit ilûnatik, najangitalo ilûnatik tikkipât, ilûnatiglo illitarilauktingita, ᴋakᴋôjaktorᴋattigivâllo iglungane, oggurivâllo mannigorlugolo, idluinek tamât pivlugo, Nâlekab tikkerᴋolauktanga tâpsomunga. Ilûnatiglo atunit tunnitsivigivât kênaujamik, suvlulingmiglo Goldeojomik siumiutamik.

¹² Nâlekablo kingorngane Hiobe pitsartutinersarilaukpâ sivurnganemit, peᴋartilugolo sauganik 14,000 dinik; Kamêliniglo 6,000 dinnik, tuktuvangniglo aiparênik ᴋakᴋautinnut 1,000 dinnut, siuteᴋoktojunniglo 1,000 dinik.

¹³ Ernetâlaukporlo 7 nik, panetârlarmelo pingasunik.

¹⁴ Tâpkonangallo angajuklek atteᴋalaukpok Jemimamik, tuglialo Keziamik, pingajuak, Kerenhapuchemik.

¹⁵ Nunanelo ilûnaine naipitaujoᴋalaungilak arnanik taimâk ânanautigijunnik Hiobib paningititut. Atâtangatalo kingormgutijaᴋartipait anningita akkornganne.

¹⁶ Tamattomalo kingorngane Hiobe inôlaukpok sulle jârinik 140 ginik, takkolunelo ᴋittornganik erngutaniglo kinguvârêt sitamangit tikkidlugit.

¹⁷ Hiobelo toᴋovok inutoᴋaulune, inônermiglo nâmaksilune.