Hiobe 41 - Labrador Inuttitut Heritage Bible

Gûdib oᴋâlaninga ômajoâluk Leviatan pivlugo.

¹ “Leviatan ᴋarsusanut amuarungnarᴋiuk, oᴋangalo aklunâmut tigujungnarᴋiûk?

² “ᴋarsusamik illijivigijungnarᴋiûk ᴋingangagut, niksimullo aglerogik puttorungnarpigîk?

³ “Isumavît ᴋennuviginiarmattit angijomik takkomorviginiarmattilônêt?

⁴ “Isumavît angerᴋattiginiarajarmattit, kivgaritsainarlugo perᴋovlutit?

⁵ “Pingoarijungnarᴋiuk tingmiatut? ᴋellaksorungnarkiuglônêt uigasukotitit pivlugit.

⁶ “Isumavît ᴋattimgajut nerrimârᴋataujutiginiarmatsuk, niuvertinut aviktauniarmat?

⁷ “Aminga nâmatitsungnarᴋiuk kakkilautinik, niaᴋungalo mingeriarniartit naulanginnik?

⁸ “Aggaktit illikit tâpsomunga, kingorngane sorsungnek isumagijungnainiarpet.

⁹ “Ahâk, nerriungninga (pinasuartub) sulliniangilak, takkoguniuglo ochovok.

¹⁰ “Taimâk nangiartuisartoᴋangilak atautsemiglonet, ningaksarungnarlugo: kinauva sângane nangerungnarajartok?

¹¹ “Kia piniarᴋârvigilaukpânga sunamik akkiniarlugo perᴋovlunga? ᴋilait ilûnatik attânêtut perᴋutigivakka.

¹² “Tamattomungalo taitailijomangilakka avatingit, sunalo oᴋautigijaujungnartok pitsartuninga pivlugo, tautungatalonêt takkoranidlarninga.

¹³ “Kia annorânganik ullêrsivigijungnarᴋaûk? Kinalo ôktorungnarkâ kigutingita akkorngannut pilune aggangminut?

¹⁴ “Kia kênangata aglerugik aitartitsungnarᴋagîk? Kigutingit kappianadlarlutik nappavut.

¹⁵ “Kabvisingit piojorijut sappulutatitut sôngojutitut iput, pallangairsimavut nippitinerᴋumut sôrlo.

¹⁶ “Ilangat asianut aktoavok, taimâk takitigijomik sillalonêt akkornganut pijungnangimat.

¹⁷ “Nippiutivut tigutilutiglo igupteriutilungilello.

¹⁸ “Tagiorninga ᴋeblerpok ᴋaumajotut; ijîgik ᴋaub aupalungningata kemeriangititut ipûk.

¹⁹ “ᴋaninganit ikkoalanek annivok, nutiktarnerillo annisâdlarput.

²⁰ “Kingangatalo pâgingnit isserluk annivok, ukkusingnit ᴋattanillo ônadlartunit sôrlo.

²¹ “Anerningata aumait ikkipait, ᴋaninganillo ikkoalanît annivut.

²² “Kongesingane pitsartunek siniktarpok, ᴋoaksârnek kiggertarpok sivurngane.

²³ “Nerᴋingata sagloingit attajigêkput, pallangilello tâpsomane, erparungnarᴋonago.

²⁴ “Omattinga ujarᴋatut sittitigijôvok, serᴋalitsiviublo ujaraktangatut atsingnersatut.

²⁵ “Tâmna makkitaleraikpat, tagva sôngojut kakkilâdlarput; tagvûnalo pittarutileraikpat, amaingavlutik nangerput.

²⁶ “Opaktaujuksaukpat saviksoarmut, tagva sullitsengilak, kallugiarlônêt, naularlônêt, sagvingmiutarlônêt.

²⁷ “Kikkiak iviktut înnasugivâ, ᴋannujarlo ᴋejuktut ausimajotut.

²⁸ “Karjub aijalingniangilâ; illoereutib ujaraktangit ivît nakkangititut îput tâpsomunga.

²⁹ “Ujaratsiak ivît nakkangititut înasugivâ, ᴋallugiarlo sajuktok mittautigivâ.

³⁰ “Attâne nallajoᴋarpok ujarᴋanik kênalingnik; kakkilautillo nallatipait allorluktut.

³¹ “Imarbik ittijok tertipâ ukkusiktut, aulalugolo akkupâ sôrlo mingoarut akkutaupangmat.

³² “Kingorngane apᴋosinek ingnarorpok; ittinerlo sinarnautidlarpâ.

³³ “Nuname adseᴋangilak; sanajaumavok erᴋsitailerᴋovlugo.

³⁴ “Pôktojut tamaita nachogivait; attaniôvok piojorijunut tamainut.”