Hiobe 40 - Labrador Inuttitut Heritage Bible

Gûdib Hiobe pitsartunerminik ilisimanerminiglo nallojungnaitipâ ômajoâlungmit Behemotemik atelingmit.

¹ Nâlekablo Hiobe kiovâ oᴋarlunelo:

² “Ajugaᴋangitomut aivanigomajub ajuᴋertorniarᴋaûk? Gûdemiglo ᴋakᴋiardlijub tamanna kiogutiginiarᴋaûk?

³ “Hiobible Nâlegak kiovâ oᴋarlunelo:

⁴ “Ahâk kuksalailaukpunga, sunamik kiojaksarivagît? Aggakka illivakka ᴋannimnut.

⁵ “Atausiardlunga oᴋâlalaukpunga, kiojomairpungalo; aipanganik piniaromairpara.

⁶ “Nâlekablo Hiobe kiovâ akkonaksoarmit, oᴋarlunelo.

⁷ “Makkitikik tapseruserᴋik angutetut; appertsoromavagit, ajuᴋertorlaunga.

⁸ “Attannertuineratauk sunaungititaksarinajarᴋiûk, passijaksaunerarlungalo, igvit idluarᴋovlutit?

⁹ “Talleᴋarkît Gûdetut nippemullo taimailuatsiartomut Kallerungnarᴋît, sôrlo tâmna piniarmat?

¹⁰ “Ananausilerit illingnik pinarnartomik, angijoksônermiglo; annorârit nertornarnermik ânanaudlarnermiglo.

¹¹ “Ningarnivit ilûngertorninga tamât serᴋitiuk; piojorijut ilûnaita takkonârkit, manigotitikillo.

¹² “Ilâ piojorijut ilûnaita takkonârᴋit okᴋotilugillo, Gûdeᴋangitullo akkutôtikit nanêmangâttalonêt.

¹³ “Illagêklutik saukit sannernut, tautungillo kivitikit sagvangitomut.

¹⁴ “Tagva kigligiudsivigijomavagittauk, tallerpikpît ikajorungnarmattit.

¹⁵ “Ahâk, tagga Behemote, saningne sanalauktara, iviksukanik nerrivok tuktuvaktut angusalluktut.

¹⁶ “Ahâk, pitsartuninga makkitinginnêpok; sappinginingalo nângata ᴋallasinganêpok.

¹⁷ “Pamiunga tessiterpok Cederetut; makkitikkita takᴋangit keratavut akkeroktut.

¹⁸ “Sauningit kannujatun serᴋopsêdlartotun-iput, sauningit ajaupiatitut kikkiangojutitut-iput.

¹⁹ “Gûdib apᴋosiningita tâmna pigiarnerivât; sanajingata mannijervigivâ saviksoanganik.

²⁰ “ᴋakᴋat nerripᴋautiksamik sakᴋêvut tâpsomunga, ômajullo nujuartut ilûnatik kettikput tagvane.

²¹ “Inangalauromavok ijersimavlune tachalinerme, ivijaujat suvluggit akkorngane ailupingme.

²² “Okpit ullikpât tachamingnut, okpillo kôgut sanianêtut illumavât.

²³ “Ahâk kôksoak êvâ, angijônasugingilâlo; isumavok Jordan kallugomavlugo nungudlugo ᴋanerminut.

²⁴ “Sullelo angujauvok ijiminut takkonârtillugo, aklunânullo nigaujunut kinganga puttortauvok.