Hiobe 4 - Labrador Inuttitut Heritage Bible

Elifasib Hiobe pitlarpâ sivurlerpâmik.

¹ Tagva Elifas Têmanemiok kiovok oᴋarlunelo.

² Immaᴋâ pijominarpallungilak illingnut, ôktortaukpat oᴋarvigilutit; kinale oᴋautsinik nunojungnarᴋâ?

³ Ahâk unuktut ajuᴋertorlaukpâttit aggailo kassungajut nukkiksalaukpâttit.

⁴ Oᴋâlanivit pâlaksimajut makkitilaukpait, sêrᴋullo ajalujut pitsartutilaukpattit.

⁵ Mânnale igvit tikkitaugavit mailerpotit; mânnalo igvit uvigarmattit ᴋoaksârpotit.

⁶ Sivôramît Gûdemik manigorutigingikiuk? apᴋosinivîllo idluitailiningit sungertutigingikiuk?

⁷ Naglingnartotit isumagit, nanê passijaksaungitok asserortaulauᴋâ? Ubvalo nanê idluartut nungutaulauᴋât?

⁸ Sôrlo takkolauralloarama siorniornermik makpiteraijut, piulijaunangitomiglo kangasuilauktut, kattersuilaurivut tamattominga;

⁹ Gûdib annerninganut asserortaumangmatta, ningarningatalo annerninganut nerrijaumavut.

¹⁰ Loevit ᴋallingoarningit, Loevillo angijut nippingit, Loeviarkallo kigutingit serᴋomisimavut.

¹¹ Loeve asserortaumavok, aksârnigungnaiᴋovlugo, Loeviblo arnaub piarangit siamartitaumavut.

¹² Uvamnullo tikkitoᴋalaukpok oᴋautsemik angigutsinartomik, siutigalo nippemik tâpsomangat pilaukpok.

¹³ Takkotitjutinik ᴋemergolaurama unnuarme; inuit tupviotillugit sinningmut ittijomut.

¹⁴ Tagva sivuranermut sajudlarnermullo tikkitaulaukpunga, saunikkalo ilûnatik ᴋoaksâlaukput.

¹⁵ Annernerit illangita sennerᴋopânga; uvangalo nujaingomilaukpunga timipkut.

¹⁶ Tagva adsingoak nangilaukpok ijingma sângangne, tautualo illitarilaungilara; imingnalaukpok, nippemiglo tussarpunga:

¹⁷ ᴋanok inuk idluarnersaujungnarᴋâ Gûdemit? Angullonêt Ivsornainersaujungnarᴋa sanajiminit?

¹⁸ Ahâk kivgane tattigijungnangilait, tillijaminelo sillainersivok.

¹⁹ ᴋanorlo angiluartomik tâpkonane, maggarmik igloᴋartune, saningnut tungatitaujunne, kettulapiublo nerᴋingititut nungutaulertune?

²⁰ Sivitôvok uvlâmit unungmut, tagva serᴋomitaulerput; Mallugijauᴋârtinagolo sakᴋijârungnaimarikput.

²¹ Amiakungillo nunguᴋatauvut, toᴋolutiglo nerriugijaunatik.