Hiobe 39 - Labrador Inuttitut Heritage Bible

Gûdib Hiobe ajugaᴋanginerminik nallojungnaitipâ ômajut illinganinginnit. Hiobe kigligiutsivok kangusuktitaugame nippangertuksaugamelo.

¹ “Nalliutok ᴋaujimaviuk tuktungajut nujuartut ernivingat ᴋairtune? Ubvalo mallugosulauᴋît ᴋanga tuktut nochaᴋarangatta?

² “Tâpkoa takᴋingit kittilaukpigît nâmaksikpatta? Erniangoningitalônêt nalliuningit ᴋaujimavigît?

³ “Okᴋôlerput ernilerlutiglo piaramingnik, annititsilutiglo sillimanermingnik.

⁴ “ᴋittorngangit koinilerput angijororlutiglo ᴋakᴋôjaksat akkorngane; aularput utterungnailutiglo tâpkonunga.

⁵ “Kia siuteᴋoktojok nujuartok kippalutjarlaukaûk? Kia Siuteᴋoktojub nujuartub pitutanga pitudjalauᴋaûk?

⁶ “Tunitsivigilauktama inuilarmik igluksanganik, Sunaᴋajuitomiglo sioraujalingmik inniksanganik.

⁷ “Iglugasaksuit perajâdlarningit ijutigivâ, ungortiblo kaggudlarninga tussarlungilâ.

⁸ “ᴋakᴋat takkosarpait nerripᴋautiksataggit tâpsomunga, perortullo tungojortat sunatuinait ᴋennerasuarpait.

⁹ “Isumavît tuktûjârtub kivgartorniarmattit, sinniktarniarmallo nercheveᴋotingne?

¹⁰ “Kakᴋaumik atsungersuivigijungnarᴋiûk, makpiteraijungnarᴋovlutit perorsêvingmik? Kingunerne niksiᴋartausijarniarᴋa naksane?

¹¹ “Sungertutigijungnarᴋiuk sôngojoksongmat? Sanaᴋoniarᴋiuglo illingnut?

¹² “Tattigijungnarᴋiuk kangâsortiksaᴋotitit uttertiniarmagit illingnut, kattersorlugillo ᴋematulliviᴋotingnut?

¹³ “ᴋuviasuklune tingmiab Straussib esarunga tingmerojukpok; ilâ esaroᴋarpok sulluᴋalarmelo Storchetut.

¹⁴ “Sullele mannine ᴋemakpait nunatuinarmut, ivajaukolugillo sannerne.

¹⁵ “Puigorpok tullerajartaujungnarajarmatta ittikkat illanginnut, ômajublo nujuartub serᴋomitsungnarajarmagit.

¹⁶ “Taimâk piarkane nikkasujuivigivait, nangmineringipagit sôrlo; kamalungilak, sullinane sanagame.

¹⁷ “Gûdib ilisimanêrotimago, illangiutitilaungilâlo sillatunermik.

¹⁸ “Makkitavingminele tamarmik horselo ablangajorlo horseme ijutigivak.

¹⁹ “Igvit horse pitsartuneᴋartitsungnarᴋiûk, ᴋongesingalônêt ânanausilugo ᴋallingoarninganik?

²⁰ “Igvit kiggertartitsungnarkiuk piglertattitut? Kingangata annerteridlarningata ânanauninga kappianadlarpok.

²¹ “Tukᴋarpok (itikaminut) nunamut, ᴋuviasukporlo Pitsartuneᴋarᴋasiutjilune, aularporlo sakkolijartut pachreartorlugit.

²² “Nangiarnek mittautigivâ, ᴋoaksâranelo, saviksoarlo ᴋemâlungilâ;

²³ “Pittiksertak nierᴋudlaralloarpat akkerartorlugo, kappullo kallugiarlo tammarmik keblidlaralloarpanik.

²⁴ “Sajukpok, perajarludlarlunelo, aggarsudlalarmelo nunamik, kamalungilarlo tiptulautit nippinginnik.

²⁵ “Tiptulaut sôngojomik tussaksaulerangat tagva huilavok, naimalunelo sorsungnermik ᴋaningitomit, attanît kaggudlarninginnik igiaᴋomijarninginniglo. —

²⁶ “Sillatunernut kigaviojârtok tingiᴋa esarogiglo issakpagik uarngnarluangmut?

²⁷ “Perᴋojat malliklugo nektoralik taimâk pôktotigijomik tingikâ, uvlune sanalugo pôktojome?

²⁸ “ᴋairtune nunaᴋarpok, ᴋairtullo ᴋakᴋâluillo erᴋlalângine nokᴋangavok.

²⁹ “Tagvangat nerᴋiksat kenâvait, ijîgiglo ᴋaningitomut tautukpûk.

³⁰ “Piarangit aungmik millugiarput; nanelo killoᴋartome tagvanêpok.”